‏1 ھاباقۇق پەيغەمبەرنىڭ «شىگيونوت» دېگەن ئاھاڭدا ئېيتىلغان دۇئاسى:

‏2 ئەي پەرۋەردىگار، مەن خەۋىرىڭنى ئاڭلاپ، ئەيمىنىپ قالدىم.

ئەي پەرۋەردىگار، بۇ يىللاردا ئۆز ئىشلىرىڭنى قايتىدىن كۆرسەتكىن،

بىزنىڭ زامانىمىزدا ئۇلارنى ئاشكارىلىغىن.

لېكىن غەزىپىڭ كەلگەندە

رەھىمدىللىقىڭنى ئېسىڭدىن چىقارمىغىن. ^■  

‏3 خۇدا تېماندىن كېلىپ،

مۇقەددەس بولغۇچى پاران تېغىدىن كېلىپ ئاشكارا بولدى. سېلاھ.

ئۇنىڭ ئۇلۇغلۇقى ئاسمانلارنى قاپلىدى،

يەر يۈزى ئۇنىڭ شان-شەرىپى بىلەن تولدى. ^■  

‏4 كۈننىڭ نۇرىدەك پارلاقلىق پەيدا بولدى.

ئۇنىڭ قولىدىن نۇر چېچىلدى.

ئۇنىڭ قۇدرىتى بۇنىڭ ئىچىدە يوشۇرۇنۇپ تۇردى.

‏5 ۋابا ئۇنىڭ ئالدىدا ماڭدى،

تەپنىڭ ئوتى ئۇنىڭ پۇتلىرىدىن چىقتى.

‏6 ئۇ قوپقاندا يەر يۈزى تەۋرىنىپ كەتتى.

ئۇ نەزەر سالغاندا، خەلقلەر پاراكەندە بولدى،

قەدىمىي تاغلار پارە-پارە قىلىندى

ۋە ئەزەلدىن بار بولغان ئېگىزلىكلەر چۈشۈپ كەتتى.

ئۇنىڭ يوللىرى ئەبەدىيدۇر.

‏7 كۇشاننىڭ چېدىرلىرىنىڭ بالا-قازاغا ئۇچرىغىنىنى،

مىدىيان زېمىنىدىكى چېدىر يوپۇقلىرىنىڭ سىلكىنىپ كەتكىنىنى كۆردۈم.

‏8 ئەي پەرۋەردىگار، دەريالارغا غەزەپلەندىڭمۇ؟

ئېقىنلارغا ئاچچىقىڭ كەلدىمۇ؟

قەھرىڭ دېڭىزغا قارشى قوزغالدىمۇ؟

شۇڭا ئاتلىرىڭغا،

غەلىبىلىك جەڭ ھارۋىلىرىڭغا مىندىڭمۇ؟

‏9 سېنىڭ ئوقيايىڭ سۇغۇرۇلدى،

قەسەم بىلەن قىلغان سۆزۈڭنىڭ ئوقلىرى چىقىرىلدى. سېلاھ.

سەن يەر يۈزىنى ئېقىنلار بىلەن يېرىۋەتتىڭ.

‏10 تاغلار سېنى كۆرگەندە تىترەپ كەتتى.

سۇلار كەلكۈن بولۇپ ئېقىپ كەتتى.

چوڭقۇر دېڭىز ئاۋازىنى چىقىرىپ، قوللىرىنى يۇقىرىغا كۆتۈردى.

‏11 سېنىڭ ئۇچۇۋاتقان ئوقلىرىڭنىڭ چاقنىشىدا

ۋە سېنىڭ پارقىراۋاتقان نەيزەڭنىڭ چېقىشىدا

كۈن بىلەن ئاي ئۆز ماكانىدا توختاپ قالدى.

‏12 سەن قەھرىڭدە يەر يۈزىنى كېزىپ ئۆتتۈڭ،

غەزىپىڭدە ئەللەرنى دەپسەندە قىلىۋەتتىڭ.

‏13 سەن ئۆز خەلقىڭنى قۇتقۇزۇش ئۈچۈن،

تاللاپ مەسىھلىگىنىڭنىڭ نىجاتلىقى ئۈچۈن چىقتىڭ.

سەن يامان كىشىنىڭ ئۆيىنىڭ ئۆگزىسىنى يىقىتىۋېتىپ،

ئۇلىنى تامامەن ئېچىپ چىقىرىۋەتتىڭ. سېلاھ.

‏14 سەن ئۆز نەيزىسى بىلەن پالۋانلىرىنىڭ بېشىغا سانجىۋەتتىڭ.

ئۇلار مېنى پاراكەندە قىلغىلى قۇيۇندەك چىقىپ كەلدى.

ئۇلارنىڭ خۇشاللىقى بىچارىنى يوشۇرۇن جايدا يۇتۇۋېلىشتۇر.

‏15 لېكىن سەن ئاتلىرىڭغا مىنىپ دېڭىزنى دەسسەپ،

دولقۇنلاپ ئېقىۋاتقان چوڭ سۇلارنى كېسىپ ئۆتتۈڭ.

‏16 مەن بۇلارنى ئاڭلىغىنىمدا، ئىچىم تىت-تىت بولدى.

بۇ ئاۋازدىن لەۋلىرىم دىرىلداپ تىتراپ كەتتى.

سۆڭەكلىرىم چىرىپ كەتكەندەك بوشاپ،

تۇرغان جايىمدا جۇغۇلداپ قالدىم.

لېكىن شۇندىمۇ بىزگە ھۇجۇم قىلغۇچى خەلق ئۈستىگە بالايىئاپەت كېلىدىغان كۈننى سەۋرچانلىق بىلەن كۈتىمەن. ^■  

‏17 ئەنجۈر دەرىخى چېچەكلىمىسىمۇ،

ئۈزۈم تېلىدا مېۋە تېپىلمىسىمۇ،

زەيتۇن دەرىخىنىڭ ھوسۇلى يوق بولۇپ كەتسىمۇ،

ئېتىزلىقلار ھېچ ھوسۇل بەرمىسىمۇ،

قوتاندىكى قويلار يوقىلىپ كەتسىمۇ

ۋە ئېغىلدا كالىلار قالمىغان بولسىمۇ،

‏18 مەن يەنىلا پەرۋەردىگاردىن شادلىنىمەن،

نىجاتكارىم بولغان خۇدادىن سۆيۈنىمەن.

‏19 رەب پەرۋەردىگار مېنىڭ كۈچ-قۇدرىتىم.

ئۇ پۇتلىرىمنى كېيىكنىڭكىدەك قىلىدۇ،

مېنى ئېگىز جايلىرىمغا كۆتۈرىدۇ.

‹بۇ نەغمىچىلەرنىڭ بېشىغا تاپشۇرۇلۇپ، تارلىق سازغا تەڭكەش قىلىپ ئېيتىلسۇن›.