‏1 ئاسىيلىق قىلىپ بۇلغانغان ۋە زۇلۇمغا تولغان شەھەرنىڭ ھالىغا ۋاي! ‏2 ئۇ ھېچكىمنىڭ گېپىگە قۇلاق سالمايدۇ، نەسىھەتلەرنىمۇ قوبۇل قىلمايدۇ، پەرۋەردىگارغا ئىشەنمەيدۇ، ئۆز خۇداسىغا يېقىنلىشىشنى خالىمايدۇ.

‏3 ئۇنىڭ ئىچىدىكى ئەمىرلىرى ھۆركىرەيدىغان شىرلاردەك، ئۇنىڭ ھاكىملىرى ئاخشىمى چىقىپ يورۇغۇچە ھېچنېمىنى قالدۇرمايدىغان بۆرىلەردەك. ‏4 پەيغەمبەرلىرى يوغان سۆزلەيدىغان ھىيلىگەر كىشىلەر، ئۇنىڭ كاھىنلىرى پاك بولغاننى ناپاك قىلىپ، تەۋرات قانۇنىنى بۇرمىلايدىغان كىشىلەردۇر. ^■   ‏5 لېكىن پەرۋەردىگار ئۇنىڭ ئوتتۇرىسىدا تۇرۇپ، ھېچ ئادىلەتسىزلىك قىلمايدۇ. ھەر ئەتىگەندە ئادالەتنى بايان قىلىدۇ. بىراق ئىنساپسىزلار نومۇس قىلمايدۇ.

‏6 «مەن خەلقلەرنى يوقىتىپ، ئۇلارنىڭ مۇنارلىرىنى چېقىۋېتىپ، كوچىلىرىنى كىشى ماڭالمىغۇدەك دەرىجىدە ۋەيران قىلىۋەتتىم. ئۇلارنىڭ شەھەرلىرى ئادەمزاتسىز خارابىلىككە ئايلاندى. ئۇ يەردە ھېچكىم ماكان تۇتۇپ ياشىمايدۇ. ‏7 مەن نەسىھەت بېرىپ: ‹مەندىن قورقۇپ، تەربىيەمنى قوبۇل قىلىڭلار› دېدىم. ئۇلار شۇنداق قىلغاندا، بېكىتكىنىم ئۇلارنىڭ بېشىغا چۈشمەيتتى، ئۇلارنىڭ ماكانى ۋەيران بولۇپ كەتمەيتتى، لېكىن ئۇلار يامانلىق قىلىشقا ئالدىرىدى. ‏8 شۇڭا مەن ئولجا ئېلىشقا چىقىدىغان كۈنگىچە مېنى سەۋر-تاقەت بىلەن كۈتۈڭلار» دەيدۇ پەرۋەردىگار، «چۈنكى خەلقلەرنىڭ ئۈستىگە ھەممە ئوتلۇق قەخر-غەزىپىمنى تۆكۈش ئۈچۈن خەلقلەرنى يىغىشقا ۋە پادىشاھلىقلارنى جەم قىلىشقا قارار قىلدىم. غەزىپىمنىڭ ئوتى بىلەن پۈتۈن يەر يۈزى كۆيدۈرۈۋېتىلىدۇ».

‏9 «ئۇ ۋاقىتتا خەلقلەرنىڭ ھەممىسى پەرۋەردىگارنىڭ نامىنى چاقىرىپ، بىر كۆڭۈل بىلەن ئۇنىڭغا ئىبادەت قىلسۇن دەپ، مەن ئۇلارغا پاك تىللار بېرىمەن. ‏10 كۇشنىڭ دەريالىرىنىڭ ئۇ تەرىپىدىن ماڭا ئىبادەت قىلغۇچىلار، يەنى تارقالغان خەلقىم كېلىپ، ماڭا ھەدىيە ئېلىپ كېلىدۇ. ‏11 لېكىن ئۇ كۈندە سىلەر ماڭا قىلغان ھەممە ئاسىيلىقلىرىڭلار ئۈچۈن نومۇس قىلىشىڭلار لازىم بولمايدۇ، چۈنكى پەخىرلىنىپ يوغانچىلىق قىلغۇچىلارنى ئاراڭلاردىن ئېلىپ تاشلىغىنىم ئۈچۈن، سىلەر مۇقەددەس تېغىمدا ئۆزۈڭلارنى يەنە چوڭ تۇتمايسەن.

‏12 مەن ئىچىڭلاردا بىر ئېزىلگەن مىسكىن خەلقنى قالدۇرىمەن. ئۇلار پەرۋەردىگارنىڭ نامىغا تايىنىدۇ. ‏13 ئىسرائىل خەلقىنىڭ ئامان قالغانلىرى يەنە ئادالەتسىزلىك قىلمايدۇ، يالغان سۆزلىمەيدۇ، ئۇلارنىڭ ئاغزىدىمۇ ئالدامچى تىل تېپىلمايدۇ. بىراق ئۇلار قويلاردەك بىغەم ئوتلايدۇ، ياتىدۇ ۋە ھېچكىم ئۇلارنى قورقۇتمايدۇ».

‏14 ئەي سىئون قىزى، شادلىق بىلەن ناخشا ياڭراتقىن. ئەي ئىسرائىل، خۇشاللىقتىن چۇقان سالغىن. ئەي يېرۇسالېم قىزى، پۈتۈن قەلبىڭ بىلەن شادلانغىن. ^■   ‏15 پەرۋەردىگار سېنى جازالاشتىن ياندى. ئۇ دۈشمىنىڭنى قوغلاپ چىقىرىۋەتتى. ئىسرائىلنىڭ پادىشاھى بولغان پەرۋەردىگار سېنىڭ ئاراڭدە ماكان تۇتقاچقا، سەن يەنە بالا-قازاغا ئۇچرىمايسەن. ‏16 ئۇ ۋاقىتتا يېرۇسالېمغا مۇنداق دېيىلىدۇ: «ئەي يېرۇسالېم، قورقمىغىن. ئەي سىئون، قوللىرىڭ بوشاشمىسۇن. ‏17 پەرۋەردىگار خۇدايىڭ ئاراڭدىدۇر. ئۇ كۈچ-قۇدرەت ئىگىسى بولۇپ، قۇتقۇزۇشقا قادىردۇر. ئۇ سەندىن خۇرسەن بولۇپ خۇشاللىنىدۇ. ئۇ مۇھەببىتىدە شۈك تۇرىدۇ. ئۇ سەندىن شادلىنىپ، ئاۋازىنى ياڭرىتىدۇ».

‏18 «ئۇ ۋاقىتتا مەن ھېيت ئۆتكۈزەلمەي غەم يېگەنلەرنى جەم قىلىمەن، سەندىن ئايرىلىپ ئاھانەتكە قالغانلارنى يىغىمەن. ‏19 مانا، ئۇ چاغدا مەن ساڭا زۇلۇم سالغانلارنىڭ ھەممىسىنى جازاغا تارتىمەن، توكۇرلارنى ساقايتىپ، تارقىلىپ كەتكەنلەرنى جەم قىلىمەن. مەن ئۇلار ئاھانەتكە قالغان پۈتۈن يەر يۈزىدە ئۇلارنى نام-شۆھرەتكە ئېرىشتۈرىمەن. ‏20 ئۇ چاغدا، يەنى مەن سىلەرنى يىغقان چاغدا، مەن سىلەرنى ئېلىپ كېلىمەن. مەن كۆز ئالدىڭلاردا سىلەرنى ئاسارەتتىن قۇتقۇزۇپ ئەسلىڭلارغا كەلتۈرگىنىمدىن كېيىن، سىلەرنى يەر يۈزىنىڭ ھەممە خەلقلەر ئارىسىدا نام-شۆھرەت ۋە شان-شەرەپكە ئېرىشتۈرىمەن» دەيدۇ پەرۋەردىگار.