‏1 ئاندىن كېيىن مۇسا ۋە ھارۇن فىرئەۋننىڭ ئالدىغا بېرىپ، ئۇنىڭغا: «ئىسرائىلنىڭ خۇداسى پەرۋەردىگار مۇنداق دەيدۇ: ‹خەلقىمنى مەن ئۈچۈن چۆلدە ھېيت ئۆتكۈزۈش ئۈچۈن قويۇپ بەرگىن› » دېدى. ‏2 لېكىن فىرئەۋن ئۇلارغا: «مەن ئۇنىڭ بۇيرۇقى بىلەن ئىسرائىلنى قويۇپ بېرىدىغان پەرۋەردىگار كىم بولىدۇ؟ مەن پەرۋەردىگارنى تونۇمايمەن، ئىسرائىلنىمۇ قويۇپ بەرمەيمەن» دېدى. ^■   ‏3 ئۇلار سۆز قىلىپ: «ئىبرانىيلارنىڭ خۇداسى بىزگە كۆرۈندى. شۇڭا ئۆتۈنىمىزكى، بىزگە چۆل ئىچىگە ئۈچ كۈنلۈك يول يۈرۈپ، پەرۋەردىگار خۇدايىمىزغا قۇربانلىق قىلىشىمىزغا ئىجازەت بەرگەيسەن، بولمىسا ئۇ ئۈستىمىزگە ۋابا ياكى قىلىچ ئەۋەتىشى مۇمكىن» دېدى. ‏4 لېكىن مىسىرنىڭ پادىشاھى ئۇلارغا: «ئەي مۇسا ۋە ھارۇن، نېمىشقا خەلقنى ئىشلىرىدىن توختىتىسىلەر؟ بېرىپ، ئىشىڭلارنى قىلىڭلار» دېدى. ‏5 فىرئەۋن يەنە: «مانا، خەلق زېمىندا زىيادە ئاۋۇپ كەتتى. سىلەر بولساڭلار ئۇلارنى ھاشار مەجبۇرىيىتىدىن ئازاد قىلماقچىسىلەر» دېدى.

‏6 شۇ كۈنى فىرئەۋن خەلقنىڭ ئەمگەك نازارەتچىلىرى ۋە ھەيدەكچىلىرىگە بۇيرۇق بېرىپ مۇنداق دېدى: ‏7 «خەلققە ئىلگىرىكىدەك خىش قۇيۇشقا سامان بەرمەڭلار، ئۇلار ئۆزلىرى سامان يىغسۇن. ‏8 لېكىن ئۇلار ئىلگىرى قانچىلىك خىش قۇيۇپ كەلگەن بولسا، ھېلىمۇ كەم قىلماي، شۇنچىلىك خىش قۇيدۇرۇڭلار. چۈنكى ئۇلار ھۇرۇن، شۇڭا ئۇلار: ‹خۇدايىمىزغا قۇربانلىق قىلغىلى بېرىشىمىزغا ئىجازەت بەرگىن› دەپ ۋارقىرىشىپ تۇرىدۇ. ‏9 بۇ ئادەملەر ئىش بىلەن مەشغۇل بولۇپ، يالغان گەپلەرگە قۇلاق سالماسلىقى ئۈچۈن، ئېغىر ئەمگەككە سېلىنسۇن».

‏10 شۇنىڭ بىلەن، خەلقنىڭ ئۈستىدە تۇرغان ئەمگەك نازارەتچىلىرى ۋە ھەيدەكچىلەر بېرىپ، خەلققە: «فىرئەۋن مۇنداق دەيدۇ: ‹مەن سىلەرگە سامان بەرمەيدىغان بولدۇم. ‏11 ئۆزۈڭلار بېرىپ قەيەردىن سامان تاپالىساڭلار، ئېلىپ كېلىڭلار، لېكىن قىلىدىغان ئىشلىرىڭلار قىلدەكمۇ كېمەيتىلمەيدۇ›» دېيىشتى. ‏12 بۇنىڭ بىلەن خەلق پۈتۈن مىسىرنىڭ زېمىنىغا تارىلىپ، سامان ئورنىغا قۇرۇق پاھاللارنى يىغىشقا باشلىدى. ‏13 ئەمگەك نازارەتچىلىرى بولسا ئۇلارنى ئالدىرىتىپ: «سىلەرگە سامان بېرىلگەن چاغدىكىدەك ھەر كۈنلۈك ئىشنى شۇ كۈنى ئورۇنلاڭلار» دېدى. ‏14 فىرئەۋننىڭ ئەمگەك نازارەتچىلىرى تەرىپىدىن تەيىنلەنگەن بەنى ئىسرائىلدىن بولغان ھەيدەكچىلەر تاياق يەپ: «نېمىشقا تۈنۈگۈن ۋە بۈگۈن ئىلگىرىكىدەك سىلەرگە تەقسىم قىلىنغان خىش قۇيدۇرۇش ۋەزىپىسىنى ئورۇنلىمىدىڭلار؟» دەپ سوراق قىلىندى. ‏15 شۇڭا بەنى ئىسرائىلنىڭ ھەيدەكچىلىرى فىرئەۋننىڭ ئالدىغا بېرىپ: «نېمىشقا ئۆز قۇللىرىڭغا مۇنداق قىلىسەن؟ ‏16 ئۇلار ئۆز قۇللىرىڭغا سامان بەرمىسىمۇ: ‹خىش قۇيدۇرۇڭلار› دەپ بىزگە بۇيرۇپ تۇرىدۇ. مانا، قۇللىرىڭ تاياق يەيدۇ، ئەمما گۇناھ ئۆزۈڭنىڭ ئادەملىرىدە» دەپ پەرياد قىلىشتى. ‏17 لېكىن فىرئەۋ ئۇلارغا: «بەرھەق، ھۇرۇن ئىكەنسىلەر! ھۇرۇن بولغىنىڭلار ئۈچۈن: ‹بىز بېرىپ، پەرۋەردىگارغا قۇربانلىق قىلىشقا بىزگە ئىجازەت بەرگەيسەن› دەۋاتىسىلەر. ‏18 ئەمدى بېرىپ، ئىشىڭلارنى قىلىڭلار. سىلەرگە سامان بېرىلمەيدۇ، لېكىن سىلەر تاپشۇرىدىغان خىشنىڭ سانى ئاۋۋالقىدەك بولىدۇ» دېدى.

‏19 «سىلەر ھەر كۈنى قۇيىدىغان خىشلارنىڭ سانىنى ھېچ كېمەيتمەيسىلەر» دەپ بۇيرۇلغىنىدا، بەنى ئىسرائىلنىڭ ھەيدەكچىلىرى بېشىغا بالا-قازا كەلگىنىنى بىلىشتى.

‏20 ئۇلار فىرئەۋننىڭ ئالدىدىن چىقىپ كېلىۋاتقىنىدا، ئۇ يەردە ئۇلارنى كۈتۈپ تۇرغان مۇسا ۋە ھارۇن بىلەن ئۇچرىشىپ، ‏21 ئۇلارغا: «سىلەر فىرئەۋن ۋە ئۇنىڭ خىزمەتكارلىرىنىڭ بىزدىن سەسكىنىپ كېتىشىگە سەۋەب بولۇپ، ئۇلارنىڭ قولىغا بىزنى ئۆلتۈرۈشكە قىلىچ تۇتقۇزغىنىڭلار ئۈچۈن، پەرۋەردىگار سىلەرنىڭ ئۈستۈڭلاردىن ھۆكۈم قىلسۇن» دېيىشتى.

‏22 مۇسا پەرۋەردىگارنىڭ ئالدىغا قايتىپ بېرىپ: «ئەي ئىگەم، نېمىشقا بۇ خەلقنى بالاغا تىقتىڭ؟ نېمىشقا مېنى ئەۋەتتىڭ؟ ‏23 مەن فىرئەۋننىڭ ئالدىغا كېلىپ، سېنىڭ نامىڭ بىلەن سۆز قىلغىنىمدىن تارتىپ، ئۇ بۇ خەلققە يامانلىق قىلىپ كەلدى. ئەمما سەن ئۆز خەلقىڭنى ھېچ قۇتقۇزمىدىڭ» دېدى.