‏1 پەرۋەردىگار مۇساغا يەنە سۆز قىلىپ: «سەن ھارۇنغا: ‹پاقىلارنىڭ مىسىر زېمىنىنىڭ ئۈستىگە چىقىشى ئۈچۈن ھاسا تۇتقان قولۇڭنى ئېقىنلار، ئۆستەڭلەر ۋە كۆللەر تەرەپكە ئۇزاتقىن› دەپ ئېيتقىن» دېدى. ‏2 ھارۇن ئۆز قولىنى مىسىرنىڭ سۇلىرى تەرەپكە ئۇزاتتى. شۇنداق قىلغاندا، پاقىلار چىقىپ مىسىر زېمىنىنى باستى. ‏3 لېكىن جادۇگەرلەرمۇ ئۆز جادۇسى بىلەن ئوخشاش ئىشنى قىلىپ، مىسىر زېمىنىغا پاقا چىقاردى. ‏4 فىرئەۋن مۇسا ۋە ھارۇننى چاقىرتىپ: «پاقىلارنىڭ مەن بىلەن خەلقىمدىن يىراق كېتىشى ئۈچۈن پەرۋەردىگارغا دۇئا قىلىڭلار. ئاندىن كېيىن مەن خەلقنىڭ پەرۋەردىگارغا قۇربانلىق قىلغىلى بېرىشىغا ئىجازەت بېرىمەن» دېدى. ‏5 مۇسا فىرئەۋنگە: «پاقىلارنىڭ پەقەت نىل دەرياسىدا قېلىپ، ئۆزۈڭدىن ۋە ئۆيلىرىڭدىن يىراق كېتىشى ئۈچۈن، سېنىڭ ھەم خىزمەتكارلىرىڭ ۋە خەلقىڭ ئۈچۈن دۇئا قىلىدىغان ۋاقتىمنى سەن بېكىتكىن» دېدى. ‏6 «ئەتە بولسۇن» دەپ جاۋاب بەردى ئۇ. مۇسا: «پەرۋەردىگار خۇدايىمىزنىڭ ئوخشىشى يوقلۇقىنى بىلىشىڭ ئۈچۈن سېنىڭ ئېيتقىنىڭدەك بولسۇن. ‏7 پاقىلار سەندىن، ئۆيلىرىڭدىن، خىزمەتكارلىرىڭ ۋە خەلقىڭدىن يىراق كېتىپ، پەقەت نىل دەرياسىدا قالىدۇ» دېدى. ‏8 شۇنىڭ بىلەن مۇسا ۋە ھارۇن فىرئەۋننىڭ ئالدىدىن چىقىپ كەتتى. مۇسا فىرئەۋننىڭ ئۈستىگە ئەۋەتىلگەن پاقىلار توغرىسىدا پەرۋەردىگارغا يالۋۇرۇپ دۇئا قىلدى. ‏9 پەرۋەردىگار مۇسانىڭ تىلىگىنىنى ئورۇنلىدى. بۇنىڭ بىلەن پاقىلار ئۆلۈپ، ئۆي، ھويلا ۋە ئېتىزلاردىن يوق بولۇپ كەتتى. ‏10 خەلق ئۇلارنى دۆۋە-دۆۋە قىلىپ توپلىدى، پۈتۈن زېمىن سېسىقچىلىققا تولدى. ‏11 لېكىن فىرئەۋن پاقىلاردىن خالاس بولغىنىنى كۆرگەندە قاتتىق جاھىللىق قىلىپ، پەرۋەردىگار ئېيتقىنىدەك ئۇلارغا قۇلاق سالمىدى.

‏12 ئاندىن كېيىن پەرۋەردىگار مۇساغا: «سەن ھارۇنغا: ‹ھاساڭنى ئۇزىتىپ يەرنىڭ توپىسىغا ئۇرغىن. بۇنىڭ بىلەن پۈتۈن مىسىر زېمىنىدىكى توپا-چاڭلار پاشىغا ئايلىنىدۇ› دەپ ئېيتقىن» دېدى. ‏13 ئۇلار شۇنداق قىلدى. ھارۇن قولىنى ئۇزىتىپ ھاسىسى بىلەن يەردىكى توپىغا ئۇرسا، ئادەم ۋە ھايۋانلارنى پاشا بېسىپ كەتتى. پۈتۈن مىسىر زېمىنىدىكى ھەممە يەرنىڭ توپا-توزانلىرى پاشىغا ئايلاندى. ‏14 جادۇگەرلەر ئۆز جادۇسى بىلەن پاشا پەيدا قىلىشقا تىرىشسىمۇ، ئۇلارنى پەيدا قىلالمىدى. پاشىلار ھەم ئادەملەرنىڭ، ھەم ھايۋانلارنىڭ ئۈستىبېشىنى قاپلاپ كەتتى. ‏15 جادۇگەرلەر فىرئەۋنگە: «بۇ ئىشتا خۇدانىڭ بارمىقى بار» دېيىشتى. لېكىن فىرئەۋن قاتتىق جاھىللىق قىلىپ، خۇددى پەرۋەردىگارنىڭ ئېيتقىنىدەك ئۇلارغا قۇلاق سالمىدى.

‏16 ئاندىن كېيىن پەرۋەردىگار مۇساغا مۇنداق دېدى: «تاڭ سەھەر قوپۇپ، فىرئەۋن دەريا بويىغا چىققىنىدا ئۇنىڭ ئالدىدا تۇرۇپ، ئۇنىڭغا: ‹پەرۋەردىگار مۇنداق دەيدۇ: «ماڭا ئىبادەت قىلىشى ئۈچۈن خەلقىمنى قويۇپ بەرگىن. ‏17 ئەگەر خەلقىمنى قويۇپ بەرمىسەڭ، مانا، مەن ئۆزۈڭگە، خىزمەتكارلىرىڭ، خەلقىڭ ۋە ئۆيلىرىڭگە چىۋىن توپلىرى ئەۋەتىمەن. شۇنداقكى، مىسىرلىقلارنىڭ ئۆيلىرى ۋە ئۇلار تۇرۇۋاتقان تۇپراقمۇ چىۋىنلار بىلەن تولۇپ تاشىدۇ. ‏18 لېكىن ئۇ كۈندە ئۆز خەلقىم تۇرۇۋاتقان گوشەن ۋىلايىتىنى ئايرىپ قويىمەن. شۇنداقكى، ئۇ يەردە چىۋىن توپلىرى تېپىلمايدۇ. شۇنىڭ بىلەن سەن مېنىڭ بۇ زېمىندا پەرۋەردىگار ئىكەنلىكىمنى بىلىسەن. ‏19 بۇ تەرىقىدە ئۆز خەلقىمنى سېنىڭ خەلقىڭدىن پەرقلەندۈرىمەن. بۇ مۆجىزىلىك كارامەت ئەتە كۆرۈلىدۇ»› دېگىن». ‏20 پەرۋەردىگار دېگىنىنى قىلدى. چىۋىنلار توپ-توپ چىقىپ، فىرئەۋن ۋە خىزمەتكارلىرىنىڭ ئۆيلىرىگە كىرىپ، پۈتۈن مىسىر زېمىنىنى بېسىپ ۋەيران قىلدى. ‏21 فىرئەۋن مۇسا ۋە ھارۇننى چاقىرتىپ، ئۇلارغا: «بېرىپ، مۇشۇ زېمىندا خۇدايىڭلارغا قۇربانلىق قىلىڭلار» دېدى. ‏22 لېكىن مۇسا جاۋاب بېرىپ: «ئۇنداق قىلىش توغرا بولمايدۇ، چۈنكى بىز پەرۋەردىگار خۇدايىمىز ئۈچۈن قىلىدىغان قۇربانلىق مىسىرلىقلارغا يىرگىنچلىك كۆرۈنىدۇ. ئەمدى بىز مىسىرلىقلارنىڭ كۆز ئالدىدا ئۇلار يىرگىنچلىك كۆرگەن نەرسىنى قۇربانلىق قىلساق، ئۇلار بىزنى چالما-كېسەك قىلىۋەتمەمدۇ؟ ‏23 بۇنىڭ ئۈچۈن بىز چۆل-باياۋانغا بېرىپ ئۈچ كۈنلۈك يول مېڭىپ، پەرۋەردىگار خۇدايىمىز بىزگە بۇيرۇغىنىدەك ئۇنىڭغا قۇربانلىق قىلىشىمىز كېرەك» دېدى. ‏24 فىرئەۋن: «سىلەرنىڭ خۇدايىڭلار پەرۋەردىگار ئۈچۈن چۆل-باياۋاندا قۇربانلىق قىلغىلى بېرىشىڭلارغا ئىجازەت بېرىمەن. لېكىن بەك يىراق كېتىپ قالماڭلار. مەن ئۈچۈن دۇئا قىلىڭلار» دېدى. ‏25 مۇسا جاۋاب بېرىپ: «مانا، مەن سېنىڭ ئالدىڭدىن چىقىپ، پەرۋەردىگاردىن: ‹ئەتە چىۋىن توپلىرى فىرئەۋن، خىزمەتكارلىرى ۋە خەلقىدىن چىقىپ كەتسۇن› دەپ تىلەپ دۇئا قىلىمەن. لېكىن فىرئەۋن يەنە ھىيلىگەرلىك قىلىپ، خەلقنى پەرۋەردىگارغا قۇربانلىق قىلغىلى بېرىشتىن توسمىسۇن» دېدى. ‏26 مۇسا فىرئەۋننىڭ ئالدىدىن چىقىپ، پەرۋەردىگارغا يالۋۇرۇپ دۇئا قىلدى. ‏27 پەرۋەردىگار مۇسا تىلىگىنىدەك قىلىپ، فىرئەۋن، خىزمەتكارلىرى ۋە خەلقتىن چىۋىن توپلىرىنى چىقىرىۋەتتى. شۇنداقكى، بىر تالمۇ قالمىدى. ‏28 لېكىن فىرئەۋن بۇ نۆۋەتمۇ قاتتىق جاھىللىق قىلىپ، خەلقنى قويۇپ بەرمىدى.