‏1 ئاندىن كېيىن پەرۋەردىگار مۇساغا سۆز قىلىپ: «فىرئەۋننىڭ ئالدىغا بېرىپ ئۇنىڭغا: ‹ئىبرانىيلارنىڭ خۇداسى پەرۋەردىگار مۇنداق دەيدۇ: «ماڭا ئىبادەت قىلىشى ئۈچۈن خەلقىمنى قويۇپ بەرگىن. ‏2 ئەگەر ئۇلارنى قويۇپ بەرمەي تۇتۇپ تۇرساڭ، ‏3 مانا، پەرۋەردىگارنىڭ قولى ئېتىزلىقتىكى چارۋا ماللارنىڭ ئۈستىگە، يەنى ئات، ئېشەك، تۆگە، كالا ۋە قويلارنىڭ ئۈستىگە چۈشۈپ، ئېغىر بىر ۋابا كەلتۈرىدۇ. ‏4 لېكىن پەرۋەردىگار ئىسرائىلنىڭ چارۋىلىرىنى مىسىرلىقلارنىڭ چارۋىلىرىدىن پەرقلەندۈرىدۇ. بۇ تەرىقىدە ئىسرائىلنىڭ چارۋىلىرىدىن ھېچبىرى ئۆلمەيدۇ»› دەپ ئېيتقىن» دېدى. ‏5 ئاندىن پەرۋەردىگار بىر ۋاقىتنى توختىتىپ: «ئەتە پەرۋەردىگار بۇ زېمىندا مۇنداق قىلىدۇ» دېدى. ‏6 ئەتىسى پەرۋەردىگار شۇنداق قىلدى. مىسىرلىقلارنىڭ ھەممە چارۋىلىرى ئۆلۈپ كەتتى، لېكىن بەنى ئىسرائىلنىڭ چارۋىلىرىدىن بىرىسىمۇ ئۆلمىدى. ‏7 فىرئەۋن كىشى ئەۋەتىپ تەكشۈرتسە، مانا، ئىسرائىلنىڭ چارۋا ماللىرىدىن ھېچبىرى ئۆلمىگەن ئىكەن. لېكىن فىرئەۋننىڭ كۆڭلى قاتتىق جاھىل بولغاچ، خەلقنى قويۇپ بەرمىدى.

‏8 ئاندىن پەرۋەردىگار مۇسا ۋە ھارۇنغا: «خۇمداننىڭ كۈلىدىن سىقىملاپ ئېلىڭلار. ئاندىن كېيىن مۇسا ئۇنى فىرئەۋننىڭ كۆز ئالدىدا ھاۋاغا چاچسۇن. ‏9 شۇنداق قىلىشى بىلەن كۈل پۈتۈن مىسىرنىڭ زېمىنىغا تارقىلىدىغان چاڭ-توزانغا ئايلىنىپ، ئادەملەر ۋە ھايۋانلارغا چۈشىدۇ. شۇنىڭ بىلەن پۈتۈن مىسىر زېمىنىدا ئۇلارنىڭ بەدەنلىرىدە يىرىڭلىق چاقىلار پەيدا بولىدۇ» دېدى. ‏10 ئۇلار خۇمداندىن كۈل ئېلىپ، فىرئەۋننىڭ ئالدىغا بارغىنىدا، مۇسا ئۇنى ھاۋاغا چاچتى. شۇنىڭ بىلەن ئادەملەر ۋە ھايۋانلارنىڭ بەدىنىدە يىرىڭلىق چاقىلار پەيدا بولدى. ‏11 جادۇگەرلەر، چاقىنىڭ دەستىدىن مۇسانىڭ ئالدىدا تۇرالماي قالدى. چۈنكى باشقا مىسىرلىقلارنىڭكىگە ئوخشاش جادۇگەرلەرنىڭ بەدىنىگىمۇ يىرىڭلىق چاقىلار يامراپ كەتكەنىدى. ‏12 لېكىن پەرۋەردىگار فىرئەۋننىڭ كۆڭلىنى قاتتىق قىلىپ قويغىنى ئۈچۈن، پەرۋەردىگارنىڭ مۇساغا ئېيتقىنىدەك ئۇ ئۇلارغا قۇلاق سالمىدى.

‏13 ئاندىن كېيىن پەرۋەردىگار مۇساغا مۇنداق دېدى: «تاڭ سەھەر قوپۇپ، فىرئەۋننىڭ ئالدىغا بېرىپ، ئۇنىڭغا: ‹ئىبرانىيلارنىڭ خۇداسى پەرۋەردىگار مۇنداق دەيدۇ: «ماڭا ئىبادەت قىلىشى ئۈچۈن خەلقىمنى قويۇپ بەرگىن. ‏14 بولمىسا مەن بۇ قېتىم ھەممە بالايىئاپەتلىرىمنى ئۆزۈڭ، خىزمەتكارلىرىڭ ۋە خەلقىڭنىڭ ئۈستىگە ئەۋەتىمەن. بۇنىڭ بىلەن پۈتۈن يەر يۈزىدە مېنىڭ تەڭدىشىمنىڭ يوقلۇقىنى بىلىسەن. ‏15 چۈنكى مەن ئۆز قولۇمنى ئۇزىتىپ، ئۆزۈڭ ۋە خەلقىڭنى ۋابا بىلەن ئۇرغان بولسام ئىدى، بۇ ۋاقىتقىچە سەن يەر يۈزىدىن يوق بولۇپ كېتەتتىڭ. ‏16 لېكىن ئۆز قۇدرىتىمنى ساڭا كۆرسىتىپ، نامىمنىڭ پۈتكۈل يەر يۈزىدە جاكارلىنىشى ئۈچۈن سېنى ئورنۇڭغا تىكلىدىم. ‏17 سەن تېخىچىلا خەلقىمگە تەكەببۇرانە مۇئامىلە قىلىپ، ئۇلارنى قويۇپ بەرمەيۋاتامسەن؟ ‏18 مانا، ئەتە مۇشۇ ۋاقىتلاردا مىسىر دۆلىتى بىنا بولغاندىن تارتىپ ھازىرغىچە كۆرۈلۈپ باقمىغان قاتتىق مۆلدۈر ياغدۇرىمەن. ‏19 شۇنىڭ ئۈچۈن، ھازىر كىشى ئەۋەتىپ چارۋا ماللىرىڭ ۋە ئېتىزدىكى ھەممە نەرسىلىرىڭنى يىغىپ دالدىغا ئالغىن. چۈنكى ئىچكىرىگە كىرمەي تاشقىرىدا قالغان ئادەملەر ۋە ھايۋانلارنىڭ ھەممىسى مۆلدۈر ئاستىدا قېلىپ ئۆلۈپ كېتىدۇ»› دەپ ئېيتقىن». ‏20 فىرئەۋننىڭ خىزمەتكارلىرىنىڭ ئىچىدىن پەرۋەردىگارنىڭ سۆزىدىن قورققان ھەر كىشى ئۆز خىزمەتكارلىرى ۋە چارۋا ماللىرىنى ھەيدەپ ئۆيلىرىگە كىرىۋالدى. ‏21 لېكىن پەرۋەردىگارنىڭ سۆزىگە ئەھمىيەت بەرمىگەنلەر ئۆز خىزمەتكارلىرى ۋە چارۋا ماللىرىنى تاشقىرىدا قالدۇردى. ‏22 پەرۋەردىگار مۇساغا: «پۈتۈن مىسىر زېمىنىدىكى ئادەملەر ۋە ھايۋانلارنىڭ ئۈستىگە ۋە ئېتىزدىكى ھەممە زىرائەتلەرنىڭ ئۈستىگە مۆلدۈر ياغسۇن دەپ، ئاسمانغا قاراپ قولۇڭنى كۆتۈرگىن» دېدى. ‏23 مۇسا ئۆز ھاسىسىنى ئاسمانغا كۆتۈرگەندە پەرۋەردىگار ھاۋانى گۈلدۈرلىتىپ، مۆلدۈر ياغدۇرۇپ، يەر يۈزىگە ئوت-چاقماق چاقتۇردى. بۇ تەرىقىدە پەرۋەردىگار مىسىر زېمىنى ئۈستىگە مۆلدۈر ياغدۇردى. ‏24 مۆلدۈر يېغىپ تۇردى ۋە مۆلدۈر ئارىسىدا ئوت-چاقماق چاقتى. مىسىر دۆلىتى بىنا بولغاندىن تارتىپ ئۇ يەردە ئۇنداق قاتتىق مۆلدۈر يېغىپ باقمىغانىدى. ‏25 مۆلدۈر پۈتۈن مىسىر زېمىنىغا يېغىپ، ئىنسان بولسۇن، ھايۋان بولسۇن، تاشقىرىدىكىلەرنىڭ ھەممىسىنى ئۇرۇۋەتتى. مۆلدۈر ئېتىزدىكى ھەممە زىرائەتلەرنى ئۇرۇپ، ھەممە دەل-دەرەخلەرنىمۇ سۇندۇرۇۋەتتى. ‏26 پەقەت بەنى ئىسرائىل تۇرۇۋاتقان گوشەن ۋىلايىتىدا مۆلدۈر ياغمىدى.

‏27 فىرئەۋن كىشى ئەۋەتىپ، مۇسا ۋە ھارۇننى چاقىرتىپ، ئۇلارغا: «بۇ قېتىم مەن گۇناھ قىلدىم. پەرۋەردىگار ئادىلدۇر، مەن ۋە خەلقىم بولسا گۇناھكاردۇر. ‏28 پەرۋەردىگارغا يالۋۇرۇپ دۇئا قىلىڭلار. بۇ ھەيۋەتلىك گۈلدۈرلەش ۋە مۆلدۈر يېتەر ئەمدى. مەن سىلەرنى قويۇپ بېرىمەن. بۇ يەردە يەنە تۇرۇشۇڭلار لازىم ئەمەس» دېدى. ‏29 مۇسا ئۇنىڭغا جاۋاب بېرىپ: «مەن شەھەردىن چىقىپ كەتكەندە پەرۋەردىگار تەرەپكە قوللىرىمنى كۆتۈرىمەن. بۇنىڭ بىلەن گۈلدۈرلەش توختايدۇ ۋە مۆلدۈر يەنە ياغمايدۇ. يەر يۈزى پەرۋەردىگارنىڭكىدۇر دەپ بىلىشىڭ ئۈچۈن شۇنداق بولىدۇ. ‏30 لېكىن سەن ۋە خىزمەتكارلىرىڭنىڭ تېخى پەرۋەردىگار خۇدادىن قورقمايدىغانلىقىڭلارنى بىلىمەن» دېدى. ‏31 زىغىر ۋە ئارپا مۆلدۈردىن ۋەيران قىلىنغانىدى، چۈنكى ئارپا باش چىقارغان ۋە زىغىر غۇنچىلىغان ۋاقىت ئىدى. ‏32 بىراق بۇغداي ۋە داغال بۇغداي تېخى بىخ چىقارمىغاچقا، ۋەيران قىلىنمىغانىدى. ^■   ‏33 مۇسا فىرئەۋننىڭ ئالدىدىن ئايرىلىپ شەھەردىن چىقىپ، پەرۋەردىگار تەرەپكە قوللىرىنى كۆتۈردى. شۇنىڭ بىلەن گۈلدۈرلەش ۋە مۆلدۈر توختىدى. قاتتىق يامغۇرنىڭ يەرگە تۆكۈلۈشىمۇ توختىدى. ‏34 ئەمما فىرئەۋن يامغۇر، مۆلدۈر ۋە گۈلدۈرلەشنىڭ توختىغىنىنى كۆرگەندە، ئۇ گۇناھ قىلىشنى داۋام قىلدى. ئۇ ۋە خىزمەتكارلىرى تېخىمۇ قاتتىق جاھىللىق قىلىشتى. ‏35 فىرئەۋن قاتتىق جاھىللىق قىلىپ، خۇددى پەرۋەردىگار مۇسا ئارقىلىق ئېيتقاندەك بەنى ئىسرائىلنى قويۇپ بەرمىدى.