‏1 ئاندىن كېيىن پەرۋەردىگار مۇساغا: «يەنە بىر ئاپەتنى فىرئەۋن ۋە مىسىرنىڭ ئۈستىگە ئەۋەتىمەن. ئاندىن كېيىن ئۇ سىلەرنى بۇ يەردىن كېتىشكە قويۇپ بېرىدۇ. ئۇ سىلەرنى قويۇپ بەرگىنىدە سىلەرنى بۇ يەردىن تامامەن قوغلاپ چىقىرىدۇ. ‏2 ئەمدى سەن خەلققە: ‹مەيلى ئەر كىشى ياكى ئايال بولسۇن، ھەربىرىڭلار ئۆز قوشناڭلاردىن ئالتۇن-كۈمۈش بۇيۇملارنى سوراپ ئېلىڭلار› دېگىن» دېدى. ‏3 پەرۋەردىگار خەلقنى مىسىرلىقلارنىڭ ئالدىدا ئىلتىپاتقا ئېرىشتۈردى. مۇسا بولسا مىسىر زېمىنىدا فىرئەۋننىڭ خىزمەتكارلىرىنىڭ ۋە خەلقنىڭ نەزىرىدە ئۇلۇغ ئادەم ئىدى. ‏4 مۇسا يەنە سۆز قىلىپ: «پەرۋەردىگار مۇنداق دەيدۇ: ‹مەن يېرىم كېچىدە مىسىرنى كېزىپ چىقىمەن. ‏5 شۇ ۋاقىتتا تەختتە ئولتۇرغان فىرئەۋننىڭ تۇنجى ئوغلىدىن تارتىپ يارغۇنچاقتا ئۇن تارتىدىغان دېدەكنىڭ تۇنجى ئوغلىغىچە بولغان مىسىردىكى بارلىق تۇنجى ئوغۇللار، شۇنداقلا ھەممە چارۋا ماللارنىڭ تۇنجىلىرىمۇ ئۆلىدۇ. ‏6 بۇ سەۋەبتىن پۈتۈن مىسىر زېمىنىدا ئۇنىڭدىن ئىلگىرى بولۇپ باقمىغان ۋە بۇندىن كېيىنمۇ بولمايدىغان چوڭ پەرياد كۆتۈرۈلىدۇ. ‏7 لېكىن بەنى ئىسرائىلنىڭ ئىچىدىن، مەيلى ئادەم ياكى ھايۋانغا بولسۇن، ھېچبىرىگە ھەتتا بىر ئىتمۇ قاۋاپ قويمايدۇ. سىلەر بۇنى كۆرۈپ پەرۋەردىگارنىڭ ئىسرائىلنى مىسىرلىقلاردىن پەرقلەندۈرگەنلىكىنى بىلىسىلەر›. ‏8 ئاندىن ھەممە خىزمەتكارلىرىڭ ئالدىمغا كېلىپ، ئالدىمدا تەزىم قىلىپ: ‹ئۆزۈڭ ۋە ساڭا ئەگەشكەن ھەممە خەلق چىقىپ كېتىڭلار› دېيىشىدۇ. ئاندىن كېيىن مەن بۇ يەردىن چىقىپ كېتىمەن» دەپ قاتتىق غەزەپلىنىپ فىرئەۋننىڭ ئالدىدىن چىقىپ كەتتى.

‏9 پەرۋەردىگار مۇساغا: «مىسىردا كۆرسىتىدىغان مۆجىزىلىرىمنىڭ تېخىمۇ كۆپ بولۇشى ئۈچۈن، فىرئەۋن سىلەرگە قۇلاق سالمايدۇ» دېدى. ‏10 مۇسا ۋە ھارۇن بۇ مۆجىزىلەرنىڭ ھەممىسىنى فىرئەۋننىڭ ئالدىدا كۆرسەتتى. لېكىن پەرۋەردىگار فىرئەۋننىڭ كۆڭلىنى قاتتىق قىلىپ قويغىنى ئۈچۈن بەنى ئىسرائىلنىڭ ئۆز زېمىنىدىن كېتىشىگە يول قويمىدى.