‏1 ئىبادەت چېدىرىنى تاللانغان ئاق كەندىر يىپتىن ۋە كۆك، سۆسۈن ۋە توق قىزىل رەڭلىك يىپتىن نەپىس توقۇلغان ئون دانە پەردىدىن ياسىغىن. ئۈستىگە ئۇستا ھۈنەرۋەننىڭ قولى بىلەن كېرۇبلارنىڭ سۈرىتى كەشتىلەنسۇن. ‏2 ھەربىر پەردىنىڭ ئۇزۇنلۇقى يىگىرمە سەككىز گەز، كەڭلىكى تۆت گەز بولسۇن. ھەربىر پەردە ئوخشاش ئۆلچەمدە بولسۇن. ‏3 پەردىلەرنىڭ بەشى بىر-بىرىگە ئۇلانسۇن، قالغان بەش پەردىمۇ بىر-بىرىگە ئۇلانسۇن. ‏4 سەن بىر ئۇلاشقان پەردىنىڭ ئەڭ چېتىدىكى پارچىسىنىڭ تۇتىشىدىغان يان تەرىپىگە كۆك رەڭلىك ئىزمە قادىغىن. ئىككىنچى ئۇلاشقان پەردىنىڭ ئەڭ چېتىدىكى پارچىسىنىڭ تۇتىشىدىغان يان تەرىپىگىمۇ شۇنداق قىلغىن. ‏5 بىر پەردىگە ئەللىك ئىزمە قادىچىن. ئىككىنچى پەردىنىڭ ئەڭ چېتىدىكى تۇتىشىدىغان يان تەرىپىگىمۇ ئەللىك ئىزمە قادىغىن. ئىزمىلەر بىر-بىرىنىڭ ئۇدۇلىدا بولسۇن. ‏6 ئىبادەت چېدىرىنىڭ بىر پۈتۈن بولۇشى ئۈچۈن، ئالتۇندىن ئەللىك ئىلمەك ياساپ، پەردىلەرنى بۇ ئىلمەكلەر بىلەن بىر-بىرىگە تۇتاشتۇرغىن.

‏7 ئىبادەت چېدىرىنى يېپىش ئۈچۈن ئۆچكە يۇڭىدىن يوپۇقلار ياسىغىن. شۇنداق يوپۇقلاردىن ئون بىر دانە ياسىغىن. ‏8 ھەر يوپۇقنىڭ ئۇزۇنلۇقى ئوتتۇز گەز، كەڭلىكى تۆت گەز بولسۇن. ئون بىر يوپۇقنىڭ ھەممىسى ئوخشاش ئۆلچەمدە بولسۇن. ‏9 يوپۇقلارنىڭ بەشىنى بىر-بىرىگە ئۇلىغىن. قالغان ئالتە يوپۇقنىمۇ بىر-بىرىگە ئۇلىغىن. ئالتىنچى پارچە يوپۇقنى چېدىرنىڭ ئالدى تەرىپىگە، ئىككىگە قاتلاپ ئۇزۇنىسىغا ئېسىپ قويغىن. ‏10 سەن بىرىنچى ئۇلاشقان يوپۇقنىڭ ئەڭ چېتىدىكى پارچىسىنىڭ يان تەرىپىگە ئەللىك ئىزمە، ئىككىنچى ئۇلاشقان يوپۇقنىڭ بىرىنچىسىگە يانداشقان پارچىسىنىڭ يان تەرىپىگىمۇ ئەللىك ئىزمە قادىغىن. ‏11 سەن مىستىن ئەللىك ئىلمەك ياساپ، ئۇلارنى ئىزمىلەرگە ئۆتكۈزۈپ، ئىككى يوپۇقنى بىر-بىرىگە ئۇلاپ بىر پۈتۈن قىلىپ بىرلەشتۈرگىن. ‏12 چېدىر يوپۇقىنىڭ ئېشىپ قالغان قىسمى، يەنى ئېشىپ قالغان يېرىم پەرچىسى ئىبادەت چېدىرىنىڭ كەينى تەرىپىدە ساڭگىلاپ تۇرسۇن. ‏13 چېدىر يوپۇقلىرىنىڭ بويىدىن ئېشىپ قالغان قىسمى ئىبادەت چېدىرىنى يېپىش ئۈچۈن ئۇ تەرەپتىن بىر گەز، بۇ تەرەپتىن بىر گەز چېدىرنىڭ ئىككى تەرىپىدىن ساڭگىلاپ تۇرسۇن.

‏14 بۇنىڭدىن باشقا، سەن چېدىرنى قاپلاش ئۈچۈن قىزىل بويالغان قوچقار تېرىسىدىن بىر يوپۇق ۋە ئۇنىڭ ئۈستىگە قويۇلىدىغان دېلفىن تېرىسىدىن بىر يوپۇق ياسىغىن.

‏15 ئىبادەت چېدىرىنىڭ تىك تاختايلىرىنى ئاكاتسىيە ياغىچىدىن ياسىغىن. ‏16 ھەر تاختاينىڭ ئۇزۇنلۇقى ئون گەز، كەڭلىكى بىر يېرىم گەز بولسۇن. ‏17 ھەربىر تاختاينىڭ ئىككى ئۇلىغۇچى بولسۇن. ئىبادەت چېدىرىنىڭ ھەممە تاختايلىرىنى شۇنداق ياسىغىن. ^■   ‏18 ئىبادەت چېدىرىنىڭ تاختايلىرىنىڭ يىگىرمىسىنى جەنۇبقا قارىتىپ، جەنۇب تەرىپىگە قويغىن. ‏19 بۇ يىگىرمە تاختاينىڭ تېگىگە كۈمۈشتىن قىرىق پۇت ياسىغىن. ھەربىر تاختاينىڭ ئاستىغا، ئىككى ئۇلىغۇچى ئۈچۈن ئىككىدىن پۇت ئورناتقىن. ‏20 شۇنىڭدەك ئىبادەت چېدىرىنىڭ يەنە بىر تەرىپىگە، يەنى شىمال تەرىپىگە يىگىرمە تاختاينى قويۇپ، ‏21 بۇلار ئۈچۈنمۇ كۈمۈشتىن قىرىق پۇت ياسىغىن، ھەربىر تاختاينىڭ تېگىگە ئىككىدىن پۇت ئورناتقىن. ‏22 ئىبادەت چېدىرىنىڭ كەينى تەرىپى، يەنى غەرب تەرىپى ئۈچۈن ئالتە تاختاي ياسىغىن. ‏23 ئىبادەت چېدىرىنىڭ كەينى تەرىپىدىكى ئىككى بۇلۇڭغا ئىككى تاختاينى ياساپ ئورناتقىن. ‏24 ھەر ئىككى بۇلۇڭدىكى ئىككى تاختاي تۆۋەن تەرىپىدىن بىر-بىرىگە چىڭ تۇتاشتۇرۇلۇپ، يۇقىرى تەرىپىدە بىر ھالقا بىلەن ئۇلانسۇن. ئىككى تاختاي شۇنداق قىلىنىپ، ئىككى بۇلۇڭغا قويۇلسۇن. ‏25 بۇ تەرىقىدە سەككىز تاختاي بولىدۇ. ھەربىر تاختاينىڭ تېگىگە ئىككىدىن پۇت، جەمئىي ئون ئالتە دانە كۈمۈش پۇت بولىدۇ.

‏26 بۇنىڭدىن باشقا، سەن ئاكاتسىيە ياغىچىدىن بالداقلار ياسىغىن: ئىبادەت چېدىرىنىڭ بىر تەرىپىدىكى تاختايلار ئۈچۈن بەش، ‏27 ئىبادەت چېدىرىنىڭ يەنە بىر تەرىپىدىكى تاختايلار ئۈچۈن بەش، ۋە ئىبادەت چېدىرىنىڭ كەينى تەرىپىدىكى، يەنى غەرب تەرىپىدىكى تاختايلار ئۈچۈنمۇ بەش ياغاچ بالداق تەييارلىغىن. ‏28 تاختايلارنىڭ ئوتتۇرىسىدا تۇرىدىغان ئوتتۇرا بالداق، بىر چېتىدىن يەنە بىر چېتىگە يەتكۈزۈلسۇن. ‏29 تاختايلارنى ئالتۇن بىلەن قاپلىغىن. ياغاچ بالداقلار ئۆتكۈزۈلىدىغان ھالقىلارنى ئالتۇندىن ياسىغىن. بالداقلارنىمۇ ئالتۇن بىلەن قاپلىغىن. ‏30 ئىبادەت چېدىرىنى ساڭا تاغدا كۆرسىتىلگەن نۇسخا بويىچە ياساپ تىكلىگىن.

‏31 سەن كۆك، سۆسۈن، توق قىزىل رەڭلىك يىپ ۋە ئاق كەندىر يىپتىن نەپىس توقۇلغان بىر ئايرىما پەردە ياسىغىن. ئۇنىڭدا ئۇستا ھۈنەرۋەننىڭ قولى بىلەن كېرۇبلارنىڭ سۈرىتى كەشتىلەنسۇن. ‏32 ئۇنى ئاكاتسىيە ياغىچىدىن ياسالغان ۋە ئالتۇن بىلەن قاپلانغان تۆت تۈۋرۈككە ئېسىپ قويغىن. ئىلمەكلىرى ئالتۇندىن بولسۇن. تۈۋرۈكلەر كۈمۈشتىن ياسالغان تۆت پۇت ئۈستىگە ئورنىتىلسۇن. ‏33 ئۇ ئايرىما پەردىنى ئىلمەكلەرنىڭ ئاستىغا ئېسىپ قويغىن. شاھادەت ساندۇقىنى ئۇ يەرگە كەلتۈرۈپ، ئايرىما پەردىنىڭ ئىچىگە ئېلىپ كىرگىن. بۇ ئايرىما پەردە سىلەر ئۈچۈن مۇقەددەس جاي بىلەن ئەڭ مۇقەددەس جاينى ئايرىپ تۇرسۇن.

‏34 ئاندىن سەن ئەڭ مۇقەددەس جايدا مەرھەمەت تەختىنى شاھادەت ساندۇقىنىڭ ئۈستىگە قويغىن.

‏35 لېكىن شىرەنى ئايرىما پەردىنىڭ سىرتىدا ئورۇنلاشتۇرغىن. چىراغداننى شىرەنىڭ ئۇدۇلىغا ئىبادەت چېدىرىنىڭ جەنۇب تەرىپىگە، شىرەنى شىمال تەرىپىگە قويغىن.

‏36 بۇنىڭدىن باشقا، سەن چېدىرنىڭ كىرىش ئېغىزى ئۈچۈن كۆك، سۆسۈن، توق قىزىل رەڭلىك يىپ ۋە ئاق كەندىر يىپتىن نەپىس توقۇلغان ۋە كەشتىلەنگەن بىر پەردە ياسىغىن. ‏37 بۇ پەردە ئۈچۈن ئاكاتسىيە ياغىچىدىن بەش تۈۋرۈك ياساپ، ئۇلارنى ئالتۇن بىلەن قاپلىغىن. تۈۋرۈكلەرنىڭ ئىلمەكلىرىنىمۇ ئالتۇندىن ياسىغىن. تۈۋرۈكلەرنىڭ تېگىگە قويىدىغان بەش دانە پۇتنى مىستىن قۇيۇپ تەييارلىغىن.