‏1 ئەگەر بىر كىشى بىر ئامانلىق قۇربانلىقى كەلتۈرىدىغان بولۇپ، بۇنى كالىلاردىن سۇنۇشنى خالىسا، ئۇ پەرۋەردىگارنىڭ ئالدىغا ئەيىبسىز بىر ئەركەك ياكى چىشى ھايۋاننى كەلتۈرسۇن.

‏2 ئۇ قۇربانلىق قىلىدىغان بۇ ھايۋاننىڭ بېشىغا ئۆز قولىنى قويۇپ، ئاندىن ئۇنى ئۇچرىشىش چېدىرىنىڭ كىرىش ئېغىزى يېنىدا بوغۇزلىسۇن. ئاندىن كېيىن ھارۇننىڭ ئوغۇللىرى، يەنى كاھىنلار، قېنىنى قۇربانلىق سۇپىسىنىڭ چۆرىسىگە چاچسۇن. ^■   ‏3 ئۇ بۇ ئامانلىق قۇربانلىقىدىن ئۈچەي-باغىرلىرىنى قاپلىغان ياغ ۋە قالغان ئىچ يېغىنىڭ ھەممىسىنى ئېلىپ، ‏4 ئىككى بۆرىكى ۋە ئۇلارنىڭ ئۈستىدىكى ئىككى يانپىشىدىكى ياغنى ئاجرىتىپ، جىگەرنىڭ ئۈستىدىكى چاۋا ياغنىمۇ بۆرەك بىلەن قوشۇپ كېسىۋېلىپ، ئوتتا كۆيدۈرۈلىدىغان قۇربانلىق سۈپىتىدە ئېلىپ كەلسۇن. ‏5 ھارۇننىڭ ئوغۇللىرى بولسا بۇ نەرسىلەرنى قۇربانلىق سۇپىسىنىڭ ئۈستىگە كەلتۈرۈپ، ئوت ئۈستىگە قويۇلغان ئوتۇننىڭ ئۈستىدىكى كۆيدۈرمە قۇربانلىققا قوشۇپ كۆيدۈرسۇن. بۇ ئوتتا كۆيدۈرۈلىدىغان، پەرۋەردىگارنىڭ ئالدىغا خۇش پۇراق كەلتۈرىدىغان قۇربانلىق بولىدۇ.

‏6 ئەگەر بىر كىشى ئۇششاق مالدىن پەرۋەردىگار ئۈچۈن بىر ئامانلىق قۇربانلىقى كەلتۈرۈشنى خالىسا، ئۇ ئەيىبسىز بىر ئەركەك ياكى چىشى ھايۋاننى ئېلىپ كەلسۇن.

‏7 ئەگەر ئۇنىڭ قۇربانلىقى بىر قوي بولسا ئۇنى پەرۋەردىگارنىڭ ئالدىغا كەلتۈرۈپ، ‏8 قۇربانلىق قىلىدىغان بۇ ھايۋاننىڭ بېشىغا ئۆز قولىنى قويسۇن، ئاندىن ئۇنى ئىبادەت چېدىرىنىڭ كىرىش ئېغىزىنىڭ يېنىدا بوغۇزلىسۇن. ئاندىن كېيىن ھارۇننىڭ ئوغۇللىرى قېنىنى ئېلىپ، قۇربانلىق سۇپىسىنىڭ چۆرىسىگە چاچسۇن. ‏9 بۇ ئامانلىق قۇربانلىقىنىڭ ياغلىق قۇيرۇقىنى ئومۇرتقىدىن پۈتۈن ئاجرىتىۋېلىپ، ئۈچەي-باغىرلىرىنى قاپلىغان ياغ ۋە قالغان ئىچ يېغىنىمۇ ئېلىپ، ‏10 ئىككى بۆرىكى ۋە ئۇلارنىڭ ئۈستىدىكى ئىككى يانپىشىدىكى ياغنى ئاجرىتىپ، جىگەرنىڭ ئۈستىدىكى چاۋا ياغنىمۇ بۆرەك بىلەن قوشۇپ كېسىۋېلىپ، پەرۋەردىگار ئۈچۈن ئوتتا كۆيدۈرۈلىدىغان قۇربانلىق سۈپىتىدە ئېلىپ كەلسۇن. ‏11 كاھىن بۇ نەرسىلەرنى قۇربانلىق سۇپىسىنىڭ ئۈستىدە كۆيدۈرسۇن. بۇ پەرۋەردىگارغا ئاتالغان تائام ھەدىيەسى بولۇپ، ئوتتا كۆيدۈرۈلىدىغان قۇربانلىق بولىدۇ.

‏12 ئەگەر بىر كىشى بىر ئۆچكە قۇربانلىق قىلىشنى خالىسا، بۇنى پەرۋەردىگارنىڭ ئالدىغا كەلتۈرۈپ، ‏13 ئۇنىڭ بېشىغا ئۆز قولىنى قويۇپ، ئاندىن ئۇنى ئۇچرىشىش چېدىرىنىڭ ئالدىدا بوغۇزلىسۇن. ئاندىن كېيىن ھارۇننىڭ ئوغۇللىرى قېنىنى ئېلىپ قۇربانلىق سۇپىسىنىڭ چۆرىسىگە چاچسۇن. ‏14 قۇربانلىق قىلغۇچى بۇ قۇربانلىقتىن ئۈچەي-باغىرلىرىنى قاپلىغان ياغ ۋە قالغان ئىچ يېغىنى ئېلىپ، ‏15 ئىككى بۆرىكى ۋە ئۇلارنىڭ ئۈستىدىكى ئىككى يانپىشىدىكى ياغنى ئاجرىتىپ، جىگەرنىڭ ئۈستىدىكى چاۋا ياغنىمۇ بۆرەك بىلەن قوشۇپ كېسىۋېلىپ، پەرۋەردىگار ئۈچۈن ئوتتا كۆيدۈرۈلىدىغان قۇربانلىق سۈپىتىدە ئېلىپ كەلسۇن. ‏16 كاھىن بۇ نەرسىلەرنى قۇربانلىق سۇپىسىنىڭ ئۈستىدە كۆيدۈرسۇن. بۇ ئوتتا كۆيدۈرۈلىدىغان تائام ھەدىيەسى بولۇپ، خۇش پۇراق كەلتۈرىدىغان قۇربانلىق بولىدۇ. ياغنىڭ ھەممىسى پەرۋەردىگار ئۈچۈندۇر. ‏17 سىلەر تۇرىدىغان ھەممە جايلىرىڭلاردا ياغ ۋە قان يېمەسلىكىڭلار كېرەك. بۇ سىلەر ئۈچۈن نەسىلدىن نەسىلگە مەڭگۈلۈك قانۇن-بەلگىلىمە بولىدۇ›».