‏1 سىلەر ئۆزۈڭلار ئۈچۈن ھېچقانداق بۇت ياسىماڭلار. ئويما بۇت ياكى ھەيكەل-تۈۋرۈك تۇرغۇزماڭلار، چوقۇنۇش ئۈچۈن ئويۇلغان رەسىملىك تاشلارنىمۇ زېمىنىڭلاردا زىنھار تىكلىمەڭلار. چۈنكى مەن خۇدايىڭلار پەرۋەردىگاردۇرمەن.

‏2 مېنىڭ شابات كۈنلىرىمگە رىئايە قىلىڭلار ۋە مۇقەددەس جايىمغا ھۆرمەت قىلىڭلار. مەن پەرۋەردىگاردۇرمەن.

‏3 ئەگەر سىلەر مېنىڭ قانۇن-بەلگىلىمىلىرىم بويىچە مېڭىپ، ئەمرلىرىمنى تۇتۇپ، ئۇلارغا ئەمەل قىلساڭلار، ‏4 يەر ھوسۇلىنى بەرسۇن ۋە زېمىندىكى دەرەخلەر مېۋىسىنى بەرسۇن دەپ، مەن ۋاقتىدا يامغۇر ئەۋەتىمەن. ‏5 شۇنداقكى، ئۈزۈم يىغىش ۋاقتىغىچە خامان تېپىلىدۇ، يېڭى تېرىلغۇ مەزگىلىگىچە ئۈزۈم يىغىلىدۇ. ۋە سىلەر نېنىڭلارنى تويغۇچە يەپ، زېمىندا تىنچ-ئامان تۇرىسىلەر. ‏6 مەن بۇ زېمىنغا تىنچ-ئامانلىق ئاتا قىلىمەن. شۇنىڭ بىلەن سىلەر ھېچكىمدىن قورقماي، ئارام ئېلىپ يېتىپ ئۇخلايسىلەر. يىرتقۇچ ھايۋانلارنى زېمىنىڭلاردىن يوقىتىۋېتىمەن ۋە شۇنداقلا قىلىچ زېمىنىڭلاردىن ئۆتمەيدۇ. ‏7 سىلەر ئۆز دۈشمەنلىرىڭلارنى قوغلىغىنىڭلاردا ئۇلار ئالدىڭلاردا قىلىچلىنىپ يىقىلىدۇ. ‏8 سىلەردىن بەش كىشى يۈز كىشىنى قوغلاپ، يۈز كىشى ئون مىڭنى قاچۇرىدۇ. دۈشمەنلىرىڭلار ئالدىڭلاردا قىلىچ زەربىسىدە يىقىلىدۇ. ‏9 مەن يۈزۈمنى سىلەرگە قارىتىپ، سىلەرگە كۆپ پەرزەنت ئاتا قىلىپ، نەسلىڭلارنى كۆپەيتىمەن ۋە سىلەر بىلەن تۈزگەن ئەھدەمدە چىڭ تۇرىمەن. ‏10 سىلەر يىغىپ ساقلىغان كونا ئاشلىقنى يەۋاتقىنىڭلاردا، يېڭى ئاشلىق چىققاندا، يەپ تۈگىتەلمىگەن كونىسىنى چىقىرىشقا مەجبۇر بولىسىلەر. ‏11 مەن ئاراڭلاردا ماكانىمنى تۇرغۇزىمەن ۋە سىلەردىن بىزار بولۇپ سىلەرنى تاشلىۋەتمەيمەن. ‏12 مەن ئاراڭلاردا مېڭىپ، خۇدايىڭلار بولىمەن ۋە سىلەر مېنىڭ خەلقىم بولىسىلەر. ‏13 ئۇ يەردە قۇل بولۇپ تۇرماسلىقىڭلار ئۈچۈن، سىلەرنى مىسىردىن ئېلىپ چىقىپ، بويۇنتۇرۇقۇڭلارنى سۇندۇرۇپ، سىلەرنى تىك تۇرغۇزۇپ ماڭغۇزغان خۇدايىڭلار پەرۋەردىگار مەندۇرمەن.

‏14 لېكىن سىلەر ماڭا قۇلاق سالماي، بۇ ئەمرلەرنىڭ ھەممىسىگە ئەمەل قىلماي، ‏15 مېنىڭ قانۇن-بەلگىلىمىلىرىمنى تاشلىساڭلار ۋە جانلىرىڭلار ھۆكۈملىرىمدىن بىزار بولسا ۋە پۈتۈن بۇيرۇقلىرىمغا ئەمەل قىلماي، ئەھدەمنى بۇزساڭلار، ‏16 مەنمۇ سىلەرگە شۇنداق قىلىپ، سىلەرگە قورقۇنچ سېلىپ، كۆزۈڭلارنى تورلاشتۇرىدىغان، جېنىڭلارنى زەئىپلەشتۈرىدىغان كېزىك-ۋابالارنى ئۈستۈڭلارغا ئەۋەتىمەن. سىلەرگە تېرىپ تىككىنىڭلارنىڭ پايدىسى بولمايدۇ، چۈنكى دۈشمەنلىرىڭلار ئۇنى يەپ كېتىدۇ. ‏17 مەن سىلەرگە قارشى چىققىنىمدا، سىلەر دۈشمەنلىرىڭلارنىڭ ئالدىدا مەغلۇپ بولىسىلەر. سىلەرنى ئۆچ كۆرگەن كىشىلەر ئۈستۈڭلارغا ھۆكۈمرانلىق قىلىدۇ. ھېچكىم سىلەرنى قوغلىمىسىمۇ، سىلەر قېچىپ كېتىسىلەر. ‏18 بۇلارنىڭ ھەممىسىدىن ئىبرەت ئالماي، يەنىلا ماڭا قۇلاق سالمىساڭلار، مەن سىلەرگە گۇناھىڭلار ئۈچۈن يەتتە ھەسسە ئارتۇق جازا بېرىپ، ‏19 ئۆز كۈچۈڭلارنىڭ ھاكاۋۇرلۇقىنى سۇندۇرىمەن ۋە ئاسمىنىڭلارنى تۆمۈردەك، يېرىڭلارنى مىستەك قىلىۋېتىمەن. ‏20 تارتقان جاپايىڭلار بىكار بولىدۇ، يېرىڭلار ھوسۇل بەرمەيدۇ ۋە زېمىندىكى دەرەخلەرمۇ مېۋە بەرمەيدۇ.

‏21 ماڭا قارشى چىقىپ، ماڭا قۇلاق سالمىساڭلار، مەن گۇناھلىرىڭلارغا لايىق تەرىقىدە سىلەرنى يەتتە ھەسسە ئارتۇق ئۇرۇپ، ‏22 ئاراڭلاردا بالىلىرىڭلارنى ئۆلتۈرۈپ، چارۋا ماللىرىڭلارنى يوقىتىدىغان، يوللىرىڭلار چۆلدەرەپ قالغۇدەك دەرىجىدە سىلەرنى ئازايتىدىغان يىرتقۇچ ھايۋانلارنى ئەۋەتىمەن.

‏23 ئەگەر بۇنىڭدىنمۇ ئىبرەت-تەربىيە ئالماي، ماڭا قارشى تۇرساڭلار، ‏24 مەنمۇ سىلەرگە قارشى چىقىپ، سىلەرنى گۇناھىڭلار ئۈچۈن يەنە يەتتە ھەسسە زىيادە ئۇرۇپ، ‏25 ئەھدە بۇزغاننىڭ ئىنتىقامىنى ئېلىش ئۈچۈن ئۈستۈڭلارغا قىلىچ ئەۋەتىمەن. سىلەر شەھەرلەرگە يىغىلغىنىڭلاردا ئاراڭلارغا ۋابا ئەۋەتىمەن. سىلەر دۈشمەنلەرنىڭ قولىغا چۈشۈپ قالىسىلەر. ‏26 مەن رىزقىڭلارنى كەسكىنىمدە، ئون ئايال بىرلىشىپ بىر تونۇردا نان يېقىپ، نانلىرىڭلارنى سىلەرگە تارازىدا تارتىپ بېرىدۇ، ئەمما بۇنى يېگىنىڭلار بىلەن تويمايسىلەر. ‏27 ئەگەر سىلەر پۈتۈن بۇلاردىن ئىبرەت ئالماي، يەنىلا ماڭا قۇلاق سالماي، ماڭا قارشى تۇرساڭلار، ‏28 مەنمۇ غەزەپ بىلەن سىلەرگە قارشى چىقىپ، گۇناھلىرىڭلار ئۈچۈن سىلەرنى يەنە يەتتە ھەسسە زىيادە ئۇرىمەن. ‏29 شۇنداقكى، سىلەر ئوغۇللىرىڭلارنىڭ گۆشىنى ۋە قىزلىرىڭلارنىڭ گۆشىنى يەيسىلەر. ‏30 شۇنداقلا مەن تۆپىلىكلەردىكى سەجدىگاھلىرىڭلارنى ۋەيران قىلىپ، كۈن تۈۋرۈكلىرىڭلارنى چېقىۋېتىپ، ئۆلۈكلىرىڭلارنى سۇنۇق نىجىس بۇتلىرىڭلارنىڭ ئۈستىگە تاشلىۋېتىمەن. ئۇ چاغدا مېنىڭ روھىم سىلەردىن بىزار بولىدۇ. ‏31 مەن شەھەرلىرىڭلارنى ۋەيران قىلىپ، مۇقەددەس جايلىرىڭلارنى بۇزۇۋېتىمەن. خۇشبۇي ئىسرىقىڭلارنى يەنە پۇرىماقچى بولمايمەن. ‏32 مەن زېمىننى ئۇ يەردە ئولتۇراقلاشقان دۈشمەنلىرىڭلار ھەيران قالغۇدەك تەرىقىدە ۋەيران قىلىۋېتىمەن.

‏33 مەن سىلەرنى يات ئەللەرگە تەرقىتىۋېتىمەن ۋە كەينىڭلاردىن قىلىچنى سۇغۇرۇپ قوغلايمەن. بۇ تەرىقىدە زېمىنىڭلار ۋەيران بولۇپ، شەھەرلىرىڭلار خارابىلىككە ئايلىنىدۇ. ‏34 ئۇ ۋاقىتتا، سىلەر دۈشمەنلىرىڭلارنىڭ زېمىنىدا تۇرۇۋاتقىنىڭلاردا، زېمىن بىكار تۇرۇپ، ئۆز شابات كۈنلىرىدىن سۆيۈنىدۇ. شۇ چاغدىلا زېمىن ئارام ئېلىپ، ئۆز شاباتلىرىدىن سۆيۈنۈپ، ‏35 قۇرۇق تۇرغان ھەممە كۈنلىرىدە ئارام ئالىدۇ، چۈنكى سىلەر ئۇ يەردە تۇرغان ۋاقىتتا شابات يىللىرىدا زېمىن ئارام تاپمىغانىدى.

‏36 قۇتۇلۇپ قالغانلىرىڭلار دۈشمەنلەرنىڭ زېمىنىدا تۇرغىنىدا، مەن ئۇلارنىڭ كۆڭۈللىرىگە قورقۇنچاقلىق ئەۋەتىمەن. شۇنداقكى، ئۇلار چۈشكەن يوپۇرماقنىڭ شەپىسىنى ئاڭلىسا، قىلىچتىن قاچقاندەك قاچىدۇ. ھېچكىم ئۇلارنى قوغلىمىسىمۇ، يىقىلىپ چۈشىدۇ. ‏37 ھېچكىم ئۇلارنى قوغلىمىسىمۇ، قىلىچتىن يىقىتىلغاندەك بىر-بىرىنىڭ ئۈستىگە يىقىلىشىپ چۈشىدۇ. سىلەر دۈشمەنلىرىڭلارغا قارشى تۇرۇشقا كۈچ تاپالماي، ‏38 يات ئەللەر ئارىسىدا ھالاك بولىسىلەر. دۈشمەنلىرىڭلارنىڭ زېمىنى سىلەرنى يەپ كېتىدۇ.

‏39 قۇتۇلۇپ قالغانلىرىڭلار بولسا ئۆز يامانلىقى تۈپەيلى دۈشمەنلىرىڭلارنىڭ زېمىنىدا زەئىپلىشىپ، ئاتا-بوۋىلىرىنىڭ يامانلىقىدا يۈرۈپ، خۇددى شۇلار ئاجىزلىشىپ كەتكەندەك ئۇلارمۇ ئاجىزلىشىپ كېتىدۇ.

‏40 ھالبۇكى، ئۇلار ئۆزى قىلغان يامانلىقىنى ۋە ئاتا-بوۋىلىرىنىڭ ماڭا قارشى چىقىپ ئاسىي بولۇپ تۇرغىنىنى ئىقرار قىلىپ، ‏41 ئۇلارنىڭ ئۆز ئاسىيلىقى مېنىڭ ئۇلارغا قارشى چىقىپ ئۇلارنى دۈشمەنلىرىنىڭ قولىغا تاپشۇرغىنىمنىڭ سەۋەبى ئىكەنلىكىنى ئېتىراپ قىلسا، شۇنىڭ بىلەن بىر ۋاقىتتا ئۇلار خەتنىسىز كۆڭۈللىرىنى تۆۋەن تۇتۇپ، ئۆز يامانلىقىنىڭ جازاسىنى قوبۇل قىلسا، ‏42 ئۇنداقتا مەن ياقۇب بىلەن تۈزگەن ئەھدەمنى ئېسىمگە كەلتۈرۈمەن، شۇنداقلا ئىسئھاق بىلەن تۈزگەن ئەھدەمنى ۋە ئىبراھىم بىلەن تۈزگەن ئەھدەمنىمۇ ئېسىمگە كەلتۈرىمەن، زېمىننىمۇ ياد ئېتىمەن.

‏43 زېمىن ئۇلاردىن تاشلىنىپ قېلىپ، ئۇلار يوق بولغىنىدا بىكار تۇرۇپ، ئۆز شاباتلىرىدىن سۆيۈنىدۇ. ئۇلار بولسا يامانلىقىنىڭ جازاسىنى تارتىدۇ، چۈنكى ئۇلار مېنىڭ ئەھكاملىرىمنى تاشلىغانىدى ۋە جانلىرى قانۇن-بەلگىلىمىلىرىمدىن بىزار بولغانىدى.

‏44 ھالبۇكى، شۇنداق بولسىمۇ، ئۇلار ئۆز دۈشمەنلىرىنىڭ زېمىنىدا تۇرغان ۋاقتىدا، مەن ئۇلارنى يوقىتىپ، ئۇلار بىلەن تۈزگەن ئەھدەمنى بۇزغۇدەك تەرىقىدە ئۇلاردىن بىزار بولۇپ ئۇلارنى تاشلىۋەتمەيمەن. چۈنكى مەن ئۇلارنىڭ خۇداسى پەرۋەردىگاردۇرمەن. ‏45 لېكىن مەن ئۇلارنىڭ خۇداسى بولۇش ئۈچۈن، ئەللەرنىڭ كۆز ئالدىدا مىسىردىن ئېلىپ چىققان ئاتا-بوۋىلىرى بىلەن تۈزگەن ئەھدەمنى ئۇلارنىڭ ياخشىلىقى ئۈچۈن ئېسىمدە تۇتىمەن. مەن پەرۋەردىگاردۇرمەن›».

‏46 مانا بۇلار پەرۋەردىگار مۇسانى ۋاسىتە قىلىپ، سىناي تېغىدا ئۆزى بىلەن بەنى ئىسرائىلنىڭ ئارىسىدا بېكىتكەن ھۆكۈم ۋە قانۇنلاردۇر.