‏1 مانا بۇلار سىلەر ئىگىلەيدىغان زېمىنغا بارغىنىڭلاردا ئەمەل قىلسۇن دەپ، مېنىڭ سىلەرگە ئۆگىتىشىم ئۈچۈن خۇدايىڭلار پەرۋەردىگارنىڭ تەرىپىدىن بۇيرۇلغان ئەمر، قانۇن ۋە ئەھكاملاردۇر. ‏2 سىلەر ئۆزۈڭلار، بالىلىرىڭلار ۋە نەۋرىلىرىڭلار ئۆمرۈڭلاردىكى ھەممە كۈنلەردە پەرۋەردىگار خۇدايىڭلاردىن قورقۇپ، ئۇنىڭ مەن سىلەرگە بۇيرۇپ تاپىلىغان ھەممە قانۇن-بەلگىلىمىلىرى ۋە ئەمرلىرىگە رىئايە قىلساڭلار، ئۇزۇن ئۆمۈر كۆرىسىلەر. ‏3 ئەمدى، ئەي ئىسرائىل، ئۇلارنى ئاڭلاپ، ئۇلارغا ئەستايىدىل ئەمەل قىلساڭلار، راھەتتە ياشاپ، ئاتا-بوۋىلىرىڭلارنىڭ خۇداسى پەرۋەردىگار سىلەرگە ئېيتقاندەك، سۈت بىلەن ھەسەل ئېقىپ تۇرىدىغان زېمىندا ئىنتايىن ئاۋۇپ روناق تاپىسىلەر.

‏4 ئەي ئىسرائىل، ئاڭلاڭلار: پەرۋەردىگار خۇدايىمىز، پەرۋەردىگار بىردۇر. ‏5 سىلەر پەرۋەردىگار خۇدايىڭلارنى پۈتۈن قەلبىڭلار بىلەن، پۈتۈن جېنىڭلار بىلەن، پۈتۈن كۈچۈڭلار بىلەن سۆيۈڭلار.

‏6 مەن بۈگۈن سىلەرگە بېرىدىغان بۇيرۇقلىرىمنى كۆڭلۈڭلاردا ساقلاپ، ‏7 ئۇلارنى بالىلىرىڭلارغىمۇ ئۆگەتكىن. سىلەر ئۆيۈڭلاردا ئولتۇرساڭلار، يولدا ماڭساڭلار، ياتساڭلار، قوپساڭلار، ھەر ۋاقىت ئۇلار توغرىسىدا سۆزلەپ تۇرۇڭلار. ‏8 ئۇلارنى قولۇڭلارغا بىر ئەسلەتمىدەك باغلاپ، پېشانەڭلارغا بىر بەلگىدەك تاقاڭلار. ‏9 ئۇلارنى ئۆيۈڭلاردىكى ئىشىكلەرنىڭ كېشىكىگە ۋە دەرۋازىلىرىڭلارغا پۈتۈپ يېزىپ قويۇڭلار.

‏10 پەرۋەردىگار خۇدايىڭلار قەسەم بىلەن ئاتا-بوۋىلىرىڭلار ئىبراھىم، ئىسئھاق ۋە ياقۇبقا سىلەرگە بېرىشكە ۋەدە قىلغان زېمىنغا ۋە سىلەر قۇرمىغان ياخشى شەھەرلەرگە سىلەرنى كىرگۈزۈپ، ‏11 سىلەر تولدۇرمىغان ھەر خىل ياخشى نېمەت بىلەن تولغان ئۆيلەر ۋە سىلەر كولىمىغان، ئىلگىرى كولانغان قۇدۇق ۋە سىلەر ياسىمىغان ئۈزۈم ۋە زەيتۇن باغلىرىنى سىلەرگە بەرگىنىدە، ئۇنىڭدىن يەپ تويىسىلەر. ‏12 شۇڭا ئاگاھ بولۇپ، قۇللۇق ئۆيى بولغان مىسىر زېمىنىدىن سىلەرنى ئېلىپ چىققان پەرۋەردىگارنى ئۇنتۇماڭلار،

‏13 بەلكى پەرۋەردىگار خۇدايىڭلاردىن قورقۇپ، ئۇنىڭغا ئىبادەت قىلىپ، ئۇنىڭ نامى بىلەن قەسەم قىلىڭلار. ‏14 سىلەر باشقا ئىلاھلارغا ئەگەشمەڭلار، چۆرەڭلاردىكى خەلقلەرنىڭ ئىلاھلىرىنىڭ كەينىدىن يۈرمەڭلار. ‏15 چۈنكى ئاراڭلاردىكى پەرۋەردىگار خۇدايىڭلار قىزغىنىدىغان خۇدا بولغاچقا، ئېھتىيات قىلىش لازىمدۇر. پەرۋەردىگار خۇدايىڭلارنىڭ غەزىپى سىلەرگە قوزغىلىپ، سىلەرنى يەر يۈزىدىن يوقىتىۋەتمىسۇن.

‏16 سىلەر خۇدايىڭلار پەرۋەردىگارنى ماسسادا سىنىغىنىڭلاردەك، يەنە سىنىماڭلار، ‏17 خۇدايىڭلار پەرۋەردىگار سىلەرگە بەرگەن يوليورۇقلىرىنى ۋە قانۇنلىرىنى چىڭ تۇتۇڭلار. ‏18 سىلەر پەرۋەردىگارنىڭ نەزىرىدە توغرا ۋە ياخشى بولغاننى قىلىڭلار. ئەگەر سىلەر راھەتتە ياشاپ، پەرۋەردىگار قەسەم بىلەن ئاتا-بوۋىلىرىڭلارغا ۋەدە قىلغان زېمىنغا كىرىپ ئۇنى ئىگىلىۋېلىشنى ‏19 ۋە پەرۋەردىگار ئېيتقاندەك ئالدىڭلاردىن ھەممە دۈشمەنلىرىڭلارنى قوغلاپ چىقىرىشنى خالىساڭلار، شۇنداق قىلىڭلار.

‏20 كەلگۈسىدە ئوغلۇڭ سەندىن: ‹پەرۋەردىگار خۇدايىمىزنىڭ سىلەرگە بەرگەن يوليورۇق، قانۇن ۋە ئەھكاملىرىنىڭ مەنىسى نېمىدۇر؟› دەپ سورىسا، ‏21 سەن ئوغلۇڭغا جاۋاب بېرىپ مۇنداق دېگىن: ‹بىز مىسىردا فىرئەۋننىڭ قۇللىرى ئىدۇق، لېكىن پەرۋەردىگار بىزنى كۈچلۈك قولى بىلەن مىسىردىن ئېلىپ چىقتى. ‏22 پەرۋەردىگار بىزنىڭ كۆز ئالدىمىزدا مىسىردا فىرئەۋن ۋە ئۇنىڭ ھەممە ئائىلىسىدىكىلەرنىڭ ئۈستىگە ھەيۋەتلىك ھەم دەھشەتلىك كارامەتلەر ۋە مۆجىزىلەرنى كۆرسەتتى. ‏23 ئۇ بىزنى ئۆزى قەسەم بىلەن ئاتا-بوۋىلىرىمىزغا ۋەدە قىلغان زېمىنىغا كىرگۈزۈش ئۈچۈن ۋە ئۇنى بىزگە بېرىش ئۈچۈن، بىزنى مىسىردىن ئېلىپ چىقتى. ‏24 پەرۋەردىگار بىزگە بۇ ھەممە قانۇنلارغا ئەمەل قىلىپ، پەرۋەردىگار خۇدايىمىزدىن قورقۇشنى بۇيرۇدى. شۇنداق قىلساق بىز خۇددى بۈگۈنكىدەك تىرىك ساقلىنىپ، داۋاملىق ياخشىلىق كۆرىمىز. ‏25 ئەگەر بىز ئۇ بىزگە بۇيرۇغاندەك، پەرۋەردىگار خۇدايىمىزنىڭ ئالدىدا بۇ ھەممە ئەمرلەرگە ئەستايىدىل ئەمەل قىلساق، بۇ بىزنىڭ ھەققانىيلىقىمىز بولىدۇ›.