‏1 لاۋىيلاردىن بولغان كاھىنلار ۋە پۈتۈن لاۋىي قەبىلىسى قالغان ئىسرائىل بىلەن نېسىۋە ياكى مىراس ئالمايدۇ. ئۇلار پەرۋەردىگارغا ئاتالغان ئوتتا كۆيدۈرۈلىدىغان قۇربانلىقلاردىن ۋە ئۇنىڭ مىراسىدىن يەيدۇ. ‏2 قېرىنداشلىرى ئارىسىدا ئۇلارنىڭ ھېچ مىراسى بولمىغاچ، پەرۋەردىگار ئۇلارغا ئېيتقىنىدەك ئۇ ئۆزى ئۇلارنىڭ مىراسى بولىدۇ. ‏3 كاھىنلارنىڭ كالا ۋە قوي قۇربانلىق قىلغان خەلقتىن ئالىدىغان ھەققى: قۇربانلىقنىڭ ئالدى قولى، ئىككى ئېڭىكى ۋە قېرىنى بولسۇن. ‏4 بۇنىڭدىن باشقا، ئۇلارغا تۇنجى پىشقان زىرائەتلىرىڭلار، يېڭى شاراب ۋە يېڭى ياغلىرىڭلارنى بېرىسىلەر، قويلىرىڭلارنىڭ تۈنجى قىرقىلغان يۇڭىنىمۇ ئۇلارغا بېرىسىلەر. ‏5 چۈنكى ئۇ ئۆزى ۋە ئوغۇللىرى پەرۋەردىگارنىڭ نامىدا خىزمەت قىلسۇن دەپ پەرۋەردىگار خۇدايىڭلار ئۇنى سىلەرنىڭ ھەممە قەبىلىلىرىڭلارنىڭ ئارىسىدىن تاللىدى. ‏6 لېكىن پۈتۈن ئىسرائىلدىكى شەھەرلىرىڭلارنىڭ بىرىدە ئولتۇرۇشلۇق بىر لاۋىي كىشى ئۇ جايدىن چىقىپ، پەرۋەردىگار تاللىغان جايغا چىن كۆڭلىدىن ئۆز ئىختىيارى بىلەن كەلسە، ‏7 پەرۋەردىگارنىڭ ئالدىدا تۇرغان ھەممە لاۋىي قېرىنداشلىرىدەك خۇداسى پەرۋەردىگارنىڭ نامىدا خىزمەت قىلسۇن. ‏8 ئاتىسىدىن قالغان مىراسىنىڭ سېتىلىشىدىن كەلگەن پايدىدىن سىرت، ئۇنىڭ يېمەك-ئىچمەك ئۈلۈشى قېرىنداشلىرىنىڭكىگە ئوخشاش بولسۇن.

‏9 سىلەر پەرۋەردىگار خۇدايىڭلار سىلەرگە بېرىدىغان زېمىنغا كىرگىنىڭلاردا، ئۇ بۇتپەرەس خەلقلەرنىڭ يىرگىنچلىك ئىشلىرىنى ئۆگەنمەڭلار. ‏10 ئاراڭلاردا ئوغلى ياكى قىزىنى ئوتتىن ئۆتكۈزگۈچى، پالچى، رەمبال، جىنكەش، جادۇگەر، ‏11 ئەپسۇن ئوقۇغۇچى، جىن-ئەرۋاھلاردىن گەپ سورىغۇچى، سېھىرگەر ياكى ئۆلۈكلەردىن مەسلىھەت سورىغۇچى زىنھار تېپىلمىسۇن. ‏12 چۈنكى مۇنداق ئىشلارنى قىلغۇچى پەرۋەردىگارغا يىرگىنچلىكتۇر. پەرۋەردىگار خۇدايىڭلار بۇ خەلقلەرنى بۇ يىرگىنچلىك ئىشلىرى سەۋەبىدىن ئالدىڭلاردىن قوغلاپ چىقىرىدۇ. ‏13 سىلەر بولساڭلار پەرۋەردىگار خۇدايىڭلارنىڭ ئالدىدا كامىل بولۇشۇڭلار كېرەك. ‏14 چۈنكى سىلەر قوغلاپ چىقىرىدىغان خەلقلەر پالچى ۋە رەمباللارغا قۇلاق سالىدۇ، لېكىن پەرۋەردىگار خۇدايىڭلار سىلەرنىڭ مۇنداق ئىشلارنى قىلىشىڭلارغا يول قويمىغان.

‏15 پەرۋەردىگار خۇدايىڭلار ئاراڭلاردىن، ئۆز قېرىنداشلىرىڭلارنىڭ ئارىسىدىن سىلەر ئۈچۈن ماڭا ئوخشاش بىر پەيغەمبەر تىكلەيدۇ. ئۇنىڭغا قۇلاق سېلىڭلار. ‏16 خۇددى سىلەر خورېبتە جەم بولغان كۈندە پەرۋەردىگار خۇدايىڭلاردىن تىلەپ: ‹پەرۋەردىگار خۇدايىمىزنىڭ ئاۋازىنى يەنە ئاڭلىمايلى، بۇ ئۇلۇغ ئوتنىمۇ يەنە كۆرمەيلى، بولمىسا ئۆلۈپ كېتىمىز› دېگىنىڭلارغا ئوخشاش. ‏17 شۇ چاغدا پەرۋەردىگار ماڭا مۇنداق دېدى: ‹ئۇلارنىڭ دېگەن سۆزى راستتۇر. ‏18 مەن ئۇلار ئۈچۈن ئۆز قېرىنداشلىرىنىڭ ئارىسىدىن ساڭا ئوخشاش بىر پەيغەمبەرنى تىكلەپ، ئۇنىڭ ئاغزىغا سۆزلىرىمنى سالىمەن. ئۇ بولسا مەن ئۇنىڭغا بۇيرۇغىنىمنىڭ ھەممىسىنى ئۇلارغا ئېيتىپ بېرىدۇ. ‏19 ئەگەر كىمكى ئۇنىڭ مېنىڭ نامىمدا قىلىدىغان سۆزلىرىمگە قۇلاق سالمىسا، مەن ئۆزۈم ئۇنىڭدىن ھېساب ئالىمەن.

‏20 لېكىن تەكەببۇرلۇق قىلىپ، مەن ئۇنىڭغا بۇيرۇمىغان سۆزلەرنى مېنىڭ نامىمدا قىلىدىغان ياكى باشقا ئىلاھلارنىڭ نامىدا سۆزلەيدىغان پەيغەمبەر ئۆلتۈرۈلسۇن›. ‏21 ئەگەر سىلەر كۆڭلۈڭلاردا: ‹بىر سۆزنىڭ پەرۋەردىگاردىن كەلمىگىنىنى قانداق پەرق ئېتەلەيمىز؟› دېسەڭلار، ‏22 بىلىڭلاركى، ئەگەر پەرۋەردىگارنىڭ نامىدا سۆزلىگەن پەيغەمبەرنىڭ ئېيتقىنىدەك بولمىسا ياكى سۆزى ئەمەلگە ئاشۇرۇلمىسا، بۇ سۆز پەرۋەردىگاردىن كەلمىگەن، بەلكى پەيغەمبەر تەكەببۇرلۇق قىلىپ ئېيتقان سۆزىدۇر. سىلەر ئۇنىڭدىن ھېچ قورقماڭلار.