‏1 زەخىم يېگەنلىكى ياكى ئەرلىك ئەزاسىنىڭ كېسىلىشى تۈپەيلىدىن ئاختا قىلىنغان كىشى پەرۋەردىگارنىڭ جامائىتىگە كىرمىسۇن.

‏2 كىمكى ھارامدىن تۇغۇلغان بولسا پەرۋەردىگارنىڭ جامائىتىگە كىرمىسۇن، ھەتتا ئونىنچى نەسىلگىچە مۇنداقلاردىن ھېچكىم پەرۋەردىگارنىڭ جامائىتىگە كىرمىسۇن.

‏3 ئاممونىيلاردىن ۋە موئابىيلاردىن ھېچكىم پەرۋەردىگارنىڭ جامائىتىگە كىرمىسۇن، ھەتتا ئونىنچى نەسىلگىچە ئۇلار ھەرگىز پەرۋەردىگارنىڭ جامائىتىگە كىرمىسۇن. ‏4 سەۋەب شۇكى، سىلەر مىسىردىن چىققىنىڭلاردا ئۇلار يېمەكلىك ۋە سۇ ئېلىپ ئالدىڭلارغا چىقمىدى ۋە ئۇلار ئارام-ناھارايىمدىكى پېتوردا تۇرۇشلۇق بېئورنىڭ ئوغلى بىلېئامنى ئۈستۈڭلارغا لەنەت ئوقۇش ئۈچۈن ياللىدى. ‏5 لېكىن پەرۋەردىگار خۇدايىڭلار بىلېئامنىڭ سۆزىنى تىڭشىمىدى، ئەكسىچە پەرۋەردىگار خۇدايىڭلار سىلەرنى سۆيگەچكە، ئۇ سىلەر ئۈچۈن ئۇنىڭ لەنىتىنى بەرىكەتكە ئايلاندۇردى. ‏6 سىلەر ھەممە كۈنلىرىڭلاردا مەڭگۈ ئۇلارنىڭ ئامانلىقى ۋە گۈللىنىشىنى ئىزدىمەڭلار.

‏7 لېكىن ئېدومىيلار قېرىنداشلىرىڭلار بولغاچقا، ئۇلارنى ئۆچ كۆرمەڭلار. مىسىرلىقلارنىمۇ ئۆچ كۆرمەڭلار، چۈنكى سىلەر ئۇلارنىڭ زېمىنىدا مۇساپىر بولۇپ تۇردۇڭلار. ‏8 ئۇلارنىڭ ئۈچىنچى نەسلىدە تۇغۇلغان بالىلار پەرۋەردىگارنىڭ جامائىتىگە كىرسە بولىدۇ.

‏9 سىلەر دۈشمەنلىرىڭلارغا قارشى جەڭگە چىقساڭلار، ھەرقانداق ناپاكلىقتىن ئۆزۈڭلارنى ساقلاڭلار. ‏10 ئەگەر ئاراڭلاردا بىر كىشى كېچىدە بولغان ۋەقەدىن ناپاك بولغان بولسا، بارگاھقا كىرمەي، بارگاھنىڭ سىرتىدىكى بىر جايغا بارسۇن. ‏11 كۈن پاتاي دېگەن ۋاقىتتا ئۇ سۇغا چۆمۈلسۇن ۋە كۈن پاتقاندىن كېيىن بارگاھقا قايتىپ كەلسۇن.

‏12 بارگاھنىڭ سىرتىدا ھاجەتكە چىقىشىڭلار ئۈچۈن بىر جاي بولسۇن. ‏13 ئەسۋابلىرىڭنىڭ ئارىسىدا بىر گۈرجەك بولسۇن. مەزكۇر سىرتتىكى جايدا ئولتۇرساڭ، بۇنىڭ بىلەن بىر ئورەك كولاپ، تەرىتىڭنى كۆمۈپ يېپىۋەتكىن. ‏14 چۈنكى پەرۋەردىگار خۇدايىڭلار سىلەرنى قۇتقۇزۇپ، دۈشمەنلىرىڭلارنى سىلەرنىڭ قولۇڭلارغا تاپشۇرۇپ بېرىش ئۈچۈن بارگاھىڭلاردا يۈرىدۇ. شۇنىڭ ئۈچۈن سىلەرنىڭ بارگاھىڭلار پاك بولۇشى كېرەك. چۈنكى ئۇ سىلەردە بىرەر پاسكىنىلىق كۆرسە، سىلەردىن يۈز ئۆرۈپ كېتىدۇ.

‏15 ئۆز خوجايىنىدىن قېچىپ كەتكەن قۇلنى خوجايىنىغا تۇتۇپ بەرمەڭلار. ‏16 ئۇ ئاراڭلاردا سىلەر بىلەن بىللە تۇرۇپ، دەرۋازىلىرىڭلارنىڭ ئىچىدە ئۆزى تاللىغان يەردە، خالىغان جايدا تۇرسۇن. سىلەر ئۇنىڭغا زۇلۇم قىلماڭلار.

‏17 ئىسرائىلنىڭ قىزلىرى ئارىسىدا ھېچبىر بۇتخانا پاھىشىسى بولمىسۇن ۋە ئىسرائىلنىڭ ئوغۇللىرىنىڭ ئارىسىدىمۇ ھېچبىر بۇتقا بېغىشلانغان ئەر پاھىشە بولمىسۇن. ‏18 سەن بىر ۋەدىنى ئادا قىلىشى ئۈچۈن پەرۋەردىگار خۇدايىڭنىڭ بەيتىگە پاھىشىنىڭ پۇلى ياكى ئىتنىڭ پۇلىنى ھەرگىز ئېلىپ كەلمىگىن، چۈنكى ھەر ئىككىلىسى پەرۋەردىگار خۇدايىڭنىڭ ئالدىدا يىرگىنچلىكتۇر. ^■  

‏19 سەن ئۆز قېرىندىشىڭدىن، مەيلى پۇلنىڭ ئۆسۈمى، مەيلى ئاشلىقنىڭ ياكى باشقا نەرسىنىڭ ئۆسۈمى بولسۇن، ھەرگىز ئۆسۈم ئالمىغىن. ‏20 ئەمما يات يۇرتلۇقتىن ئۆسۈم ئالساڭ بولىدۇ، لېكىن قېرىندىشىڭدىن زىنھار ئۆسۈم ئالمايسەن. بولمىسا پەرۋەردىگار خۇدايىڭ سىلەر ئىگىلىۋالغىلى بارىدىغان زېمىندا قوللىرىڭنىڭ قىلىدىغان ئىشلىرىغا بەرىكەت بەرمەيدۇ.

‏21 سەن پەرۋەردىگار خۇدايىڭغا بىر نەرسىنى ۋەدە قىلغان بولساڭ، ھايال قىلماي بۇنى ئادا قىلغىن. بولمىسا پەرۋەردىگار خۇدايىڭ ئۇنى سەندىن تەلەپ قىلغىنىدا گۇناھكار بولىسەن. ‏22 لېكىن سەن بىر نەرسىنى ۋەدە قىلمىساڭ، ساڭا گۇناھ بولمايدۇ. ‏23 سەن ئاغزىڭدىن چىققان سۆزۈڭدە تۇرۇپ، ئۇنىڭغا ئەمەل قىلغىن. پەرۋەردىگار خۇدايىڭ ئۈچۈن ئۆز ئىختىيارىڭ بىلەن ئاتىغىنىڭنى، يەنى ئاغزىڭنىڭ سۆزى بويىچە ۋەدە قىلغىنىڭنى ئورۇنلىشىڭ كېرەك.

‏24 سەن ئۆز قوشناڭنىڭ ئۈزۈمزارلىقىغا كىرسەڭ، خالىغىنىڭچە ئۈزۈملەردىن تويغۇچە يېسەڭ بولىدۇ، ئەمما سېۋىتىڭغا ئېلىۋالمىغىن.

‏25 قوشناڭنىڭ ئېتىزلىقىغا كىرسەڭ، قولۇڭ بىلەن زىرائەتنىڭ بېشىنى ئۈزۈۋالساڭ بولىدۇ، ئەمما قوشناڭنىڭ زىرائىتىگە ئورغاق سالمىغىن.