‏1 ئىئوردان دەرياسىنىڭ غەربىي تەرىپىدە، تاغلىقلاردا، غەربىي ئويمانلىقتا ۋە ئۇلۇغ دېڭىز بويىدىكى لىۋانغىچە سوزۇلغان زېمىنلاردا ياشاۋاتقان ھەممە پادىشاھلار، يەنى ھېتىتلار، ئامورىيلار، كەنئانلار، پەرىززىيلەر، خىۋۋىيلار ۋە يەبۇسىيلار بۇ ۋەقەدىن خەۋەر تاپقاندا، ‏2 ھەممىسى يىغىلىپ يەشۇئا بىلەن ئىسرائىلغا قارشى جەڭ قىلىش ئۈچۈن بىرلەشتى. ‏3 ئەمما گىبېئوندا ياشايدىغانلار يەشۇئانىڭ يېرىخو بىلەن ئايغا نېمە قىلغىنىنى ئاڭلىغاندىن كېيىن، ‏4 ھىيلە-مىكىر ئىشلىتىپ، ئەلچىلەر قىياپىتىگە كىرىۋېلىپ، يىرتىق كونا خۇرجۇنلار ۋە يىرتىق ياماق كونا شاراب تۇلۇملىرىنى ئېشەكلەرگە ئارتىپ، ‏5 پۇتلىرىغا ياماق چۈشكەن كونا چورۇقلارنى ۋە ئۇچىسىغا جۇل-جۇل چاپانلىرىنى كىيىپ، قۇرۇپ ئۇۋىلىپ كەتكەن نانلارنى يول ئوزۇقى قىلىپ،

‏6 گىلگالدىكى بارگاھقا يەشۇئانىڭ ئالدىغا باردى. ئۇلار يەشۇئا ۋە ئىسرائىلنىڭ ئادەملىرىگە: «بىز يىراق جايدىن كەلدۇق، ئەمدى بىز بىلەن ئەھدە تۈزسەڭلار» دېدى. ‏7 لېكىن ئىسرائىلنىڭ ئادەملىرى گىبېئوندىن كەلگەن خىۋۋىيلارغا جاۋاب بېرىپ: «سىلەر بىزنىڭ ئارىمىزدىكى يەرلىكلەردىن بولۇشۇڭلار مۇمكىن. ئۇنداق بولسا، سىلەر بىلەن قانداقمۇ ئەھدە تۈزەلەيمىز؟» دېدى. ^■   ‏8 ئۇلار يەشۇئاغا: «بىز سېنىڭ خىزمەتكارلىرىڭدۇرمىز» دېدى. يەشۇئا ئۇلاردىن: «سىلەر كىم؟ نەدىن كەلدىڭلار؟» دەپ سورىدى. ‏9 ئۇلار ئۇنىڭغا جاۋاب بېرىپ: «سېنىڭ خىزمەتكارلىرىڭ پەرۋەردىگار خۇدايىڭنىڭ نامىنى ئاڭلىغىنى ئۈچۈن ناھايىتى يىراق جايدىن كەلدى. چۈنكى بىز ئۇنىڭ شۆھرىتىنى ۋە ئۇنىڭ مىسىردا قىلغان ھەممە ئىشىلىرىنى، ‏10 شۇنداقلا ئىئوردان دەرياسىنىڭ شەرقىي تەرىپىدىكى ئامورىيلارنىڭ ئىككى پادىشاھىغا، يەنى خەشبوننىڭ پادىشاھى سىخون ۋە ئاشتاروتتا تۇرۇشلۇق باشاننىڭ پادىشاھى ئوگغا قىلغانلىرىنىڭ ھەممىسىنى ئاڭلىدۇق. ‏11 شۇڭا ئاقساقاللىرىمىز ۋە زېمىنىمىزدىكى بارلىق خەلق بىزگە: ‹سەپەر ئۈچۈن يېنىڭلارغا ئوزۇق-تۈلۈك ئېلىپ، بېرىپ ئۇلار بىلەن كۆرۈشۈپ، ئۇلارغا: «بىز سىلەرنىڭ خىزمەتكارلىرىڭلار بولىمىز، شۇڭا ئەمدى بىز بىلەن ئەھدە تۈزسەڭلار» دەڭلار› دېيىشتى. ‏12 بىز سىلەر بىلەن كۆرۈشۈش ئۈچۈن يولغا چىققان كۈنى ئۆز يوللۇقىمىز ئۈچۈن ئىسسىق نان ئالغان ئىدۇق، مانا ئەمدى بۇ نانلار قۇرۇپ ئۇۋىلىپ كېتىپتۇ. ‏13 شارابنىڭ بۇ تۇلۇملىرى شاراب تولدۇرغىنىمىزدا يېڭى ئىدى، مانا ئەمدى يىرتىلىپ كېتىپتۇ. بىز كىيگەن بۇ چاپان-چورۇقلىرىمىزمۇ سەپەرنىڭ ئۇزۇنلۇقىدىن كونىراپ كەتتى» دېدى. ‏14 ئىسرائىللار پەرۋەردىگاردىن مەسلىھەت ئالمايلا ئۇلارنىڭ ئوزۇق-تۈلۈكىدىن ئازراق ئالدى. ‏15 شۇنىڭ بىلەن يەشۇئا ئۇلار بىلەن سۈلھى تۈزدى، ۋە ئۇلارنى تىرىك قالدۇرۇشقا ئەھدە تۈزدى. جامائەت رەھبەرلىرىمۇ ئۇلارغا شۇ توغرۇلۇق قەسەم قىلىپ بەردى.

‏16 ئۇلار ئەھدە تۈزۈپ ئۈچ كۈندىن كېيىن، بۇ خەلقنىڭ ئۆزلىرىنىڭ ئارىسىدا ياشايدىغان قوشنا خەلق ئىكەنلىكى ئۇلارغا مەلۇم بولدى. ‏17 شۇنىڭ بىلەن بەنى ئىسرائىل يولغا چىقتى، ۋە ئۈچىنچى كۈنى ئۇلارنىڭ شەھەرلىرىگە يېتىپ كەلدى. گىبېئون، كېفىرا، بەئەروت ۋە قىريات-يېئارىم ئۇلارنىڭ شەھەرلىرى ئىدى. ‏18 لېكىن جامائەت رەھبەرلىرى ئىلگىرى ئۇلارغا ئىسرائىلنىڭ خۇداسى پەرۋەردىگارنىڭ نامى بىلەن قەسەم قىلغاچقا، بەنى ئىسرائىل ئۇلارنى ئۆلتۈرمىدى. بۇنىڭ بىلەن پۈتۈن جامائەت رەھبەرلەردىن ئاغرىنىپ غوتۇلداشتى. ‏19 لېكىن ھەممە رەھبەرلەر پۈتۈن جامائەتكە : «بىز ئۇلارغا ئىسرائىلنىڭ خۇداسى پەرۋەردىگارنىڭ نامى بىلەن قەسەم قىلىپ بەردۇق، شۇڭا ئەمدى ئۇلارغا قول تەگكۈزەلمەيمىز. ‏20 بىز ئۇلارغا مۇنداق قىلىمىز: ئۇلارغا بەرگەن قەسىمىمىز تۈپەيلى ئۈستىمىزگە پەرۋەردىگارنىڭ غەزىپى چۈشمەسلىكى ئۈچۈن، ئۇلارنى ھايات قالدۇرىمىز» دېدى. ‏21 ئاندىن كېيىن رەھبەرلەر ئۇلارغا: «ئۇلارنى ھايات قالدۇرۇڭلار. ئەمما گىبېئون ئاھالىسى پۈتۈن جامائەت ئۈچۈن ئوتۇن يارغۇچى ۋە سۇ توشۇغۇچىلار بولىدۇ. خۇددى رەھبەرلەر ئۇلارغا ئېيتقاندەك» دېدى.

‏22 ئاندىن يەشۇئا گىبېئونلۇقلارنى چاقىرىپ، ئۇلارغا: «سىلەر ئۆزۈڭلار ئارىمىزدا ياشاپ تۇرۇپ، نېمىشقا ‹بىز يىراقتىن كەلدۇق› دەپ بىزنى ئالدىدىڭلار؟ ‏23 شۇنىڭ ئۈچۈن ئەمدى سىلەر لەنەتكە قالىسىلەر ۋە مەڭگۈ خۇدايىمنىڭ بەيتى ئۈچۈن ئوتۇن يارىدىغان ۋە سۇ توشۇيدىغان قۇل بولىسىلەر» دېدى. ‏24 ئۇلار يەشۇئاغا جاۋاب بېرىپ: «پەرۋەردىگار خۇدايىڭنىڭ ئۆز خىزمەتكارى مۇساغا: ‹ھەممە زېمىننى ساڭا بېرىپ، بۇ زېمىندا ياشاۋاتقانلارنىڭ ھەممىسىنى ئالدىڭدىن يوقىتىمەن› دېگەن خەۋىرى بىز قۇللىرىڭغا مەلۇم بولغىنى ئۈچۈن ئۆز جېنىمىزدىن ئەندىشە قىلىپ، بۇ ئىشنى قىلىپ سالدۇق. ‏25 ئەمدى بىز قولۇڭغا چۈشكەندىن كېيىن، بىزگە نېمىنى ياخشى ۋە لايىق كۆرسەڭ، شۇنى قىلغىن» دېدى. ‏26 يەشۇئا شۇنداق قىلىپ، بەنى ئىسرائىل ئۇلارنى ئۆلتۈرۈشىغا يول قويماي، ئۇلارنى قۇتقۇزۇۋالدى. ‏27 ئۇ كۈنى يەشۇئا ئۇلارنى بېكىتىلگەن جايدا جامائەت ۋە پەرۋەردىگارنىڭ قۇربانلىق سۇپىسى ئۈچۈن ئوتۇن يارغۇچى ۋە سۇ توشۇغۇچى قىلىپ تەيىنلىدى. ئۇلار بۈگۈنكى كۈنگىچە شۇ ئىشلارنى قىلىپ كەلمەكتە.