‏1 پەرۋەردىگار ئىسرائىلنى سىناپ بېقىش ئۈچۈن، يەنى كەنئان زېمىنىدىكى خەلقلەر بىلەن بولغان جەڭلىرىنى باشتىن كەچۈرمىگەنلەرنى سىناش ئۈچۈن، ‏2 ھەمدە بەنى ئىسرائىلنىڭ ئەۋلادلىرىدىن جەڭ قىلىپ باقمىغانلارغا جەڭ قىلىشنى ئۆگىتىش ئۈچۈن قالدۇرغان خەلقلەر تۆۋەندىكىلەر ئىدى: ‏3 فىلىستىنلەرنىڭ بەش بەگلىكى، كەنئانلارنىڭ ھەممىسى، سىدونلۇقلار ۋە بائال-خەرمون تېغىدىن تارتىپ خاماتنىڭ ئاغزىغىچە لىۋان تېغىدا ياشايدىغان خىۋۋىيلار. ‏4 بۇلار بەنى ئىسرائىلنى سىناپ، پەرۋەردىگار مۇسا ئارقىلىق ئۇلارغا بەرگەن ئەمرلەرنى تۇتامدۇ-تۇتمامدۇ دەپ، ئۇلارنى سىناپ بېقىش ئۈچۈن قويۇپ قويۇلغانىدى.

‏5 شۇنىڭ بىلەن بەنى ئىسرائىل كەنئانلار، ھېتىتلار، ئامورىيلار، پەرىززىيلەر، خىۋۋىيلار ۋە يەبۇسىيلار ئارىسىدا تۇرۇپ قېلىپ، ‏6 ئۇلارنىڭ قىزلىرىنى خوتۇنلۇققا ئېلىپ، ئۆز قىزلىرىنى ئۇلارنىڭ ئوغۇللىرىغا بېرىپ، ئۇلارنىڭ ئىلاھلىرىغا ئىبادەت قىلىشقا باشلىدى.

‏7 بۇ تەرىقىدە بەنى ئىسرائىل پەرۋەردىگارنىڭ نەزىرىدە يامان بولغان ئىشلارنى قىلىپ، ئۆز خۇداسى پەرۋەردىگارنى ئۇنتۇپ، بائال بۇتلىرى ۋە ئايال ئىلاھ ئاشېرا بۇتلىرىغا چوقۇنۇشقا باشلىدى. ^■   ‏8 شۇڭا پەرۋەردىگارنىڭ غەزىپى ئىسرائىلغا قوزغىلىپ، ئۇلارنى ئارام-ناھارايىمنىڭ پادىشاھى بولغان كۇشان-رىشاتايىمنىڭ قولىغا چۈشۈرۈپ بەردى. بەنى ئىسرائىل سەككىز يىلغىچە كۇشان-رىشاتايىمنىڭ خىزمىتىنى قىلدى. ‏9 ئەمما بەنى ئىسرائىل پەرۋەردىگارغا پەرياد قىلغاندا، پەرۋەردىگار بەنى ئىسرائىل ئۈچۈن بىر قۇتقۇزغۇچىنى ئوتتۇرىغا چىقاردى. ئۇلارنى قۇتقۇزغان بۇ كىشى كالەبنىڭ ئۇكىسى قېنازنىڭ ئوغلى ئوتنىئەل ئىدى. ‏10 پەرۋەردىگارنىڭ روھى ئۇنىڭ ئۈستىگە چۈشۈپ، ئۇ ئىسرائىلنىڭ ھاكىمى بولۇپ جەڭگە چىققاندا، پەرۋەردىگار ئارام پادىشاھى كۇشان-رىشاتايىمنى ئۇنىڭ قولىغا چۈشۈرۈپ بەردى. بۇنىڭ بىلەن ئۇ كۇشان-رىشاتايىمنىڭ ئۈستىدىن غالىب كەلدى. ‏11 شۇنىڭدىن كېيىن قىرىق يىلغىچە زېمىندا تىنچ-ئامانلىق بولۇپ، ئاخىردا قېنازنىڭ ئوغلى ئوتنىئەل ئالەمدىن ئۆتتى.

‏12 لېكىن بەنى ئىسرائىل يەنە پەرۋەردىگارنىڭ نەزىرىدە يامان بولغان ئىشلارنى قىلغاچقا، پەرۋەردىگار موئابنىڭ پادىشاھى ئېگلوننى ئىسرائىلنىڭ ئۈستىدىن غالىب قىلدى. چۈنكى بەنى ئىسرائىل پەرۋەردىگارنىڭ نەزىرىدە يامانلىق قىلغانىدى. ‏13 پادىشاھ ئېگلون ئاممونىيلار ۋە ئامالەكىيلەر بىلەن بىرلىشىپ، ئىسرائىلنى مەغلۇپ قىلىپ، خورمىلىق شەھەرنى ئىگىلىۋالدى. ^■   ‏14 بۇنىڭ بىلەن بەنى ئىسرائىل ئون سەككىز يىلغىچە موئابنىڭ پادىشاھى ئېگلونغا خىزمەت قىلدى.

‏15 لېكىن بەنى ئىسرائىل پەرۋەردىگارغا پەرياد قىلغاندا، پەرۋەردىگار ئۇلار ئۈچۈن بەنيامىن قەبىلىسىدىن گېرانىڭ ئوغلى ئېھۇد سولخاينى قۇتقۇزغۇچى قىلىپ تىكلىدى. بەنى ئىسرائىل ئۇنى موئابنىڭ پادىشاھى ئېگلونغا ئولپان تاپشۇرۇشقا ئەۋەتتى. ‏16 ئېھۇد بولسا ئۆزىگە بىر گەز ئۇزۇنلۇقتا ئىككى بىسلىق بىر قىلىچنى ياساپ، ئۇنى كىيىمنىڭ ئىچىگە ئوڭ يوتىسىنىڭ ئۈستىگە قىستۇرۇپ، ‏17 ئولپاننى موئابنىڭ پادىشاھى ئېگلوننىڭ ئالدىغا ئېلىپ باردى. ئېگلون تولىمۇ سېمىز بىر كىشى ئىدى. ‏18 ئېھۇد ئولپاننى ئۇنىڭغا تەقدىم قىلغاندىن كېيىن، ئولپاننى كۆتۈرۈپ كەلگەن كىشىلەرنى يولغا سېلىۋەتتى. ‏19 لېكىن ئۇ ئۆزى گىلگالنىڭ يېنىدىكى ئويما تاش ھەيكەللەر بار جايدىن قايتىپ، پادىشاھنىڭ ئالدىغا كېلىپ: «ئەي پادىشاھ، مېنىڭ ساڭا ئېيتىدىغان مەخپىي گېپىم بار» دېدى. پادىشاھ: «جىم تۇر» دېدى. شۇنىڭ بىلەن چۆرىسىدىكىلەرنىڭ ھەممىسى تاشقىرىغا چىقىپ كەتتى.

‏20 ئاندىن ئېھۇد ئۇنىڭ ئالدىغا كەلدى. پادىشاھ سۆرۈن بالىخانىسىدا يالغۇز ئولتۇراتتى. ئېھۇد ئۇنىڭغا: «مېنىڭ خۇدا تەرىپىدىن ساڭا ئېيتىدىغان بىر سۆزۈم بار» دېۋىدى، پادىشاھ ئورنىدىن تۇردى. ‏21 بۇ چاغدا ئېھۇد سول قولىنى ئۇزىتىپ، ئوڭ يوتىسىدىن قىلىچنى سۇغۇرۇۋېلىپ، ئۇنىڭ قورسىقىغا تىقتى. ‏22 قىلىچنىڭ دەستىسىمۇ، تىغى بىلەن قوشۇلۇپ ئۇنىڭ قورسىقىغا كىرىپ كەتتى. ئېھۇد قىلىچنى قورسىقىدىن تارتىۋەتمىگىنى ئۈچۈن، سېمىز ئۈچەي-باغرى چۇۋۇلۇپ، دەستىسىگە يۆگىشىپ قالدى ۋە ئۈچەي-پوقى ئارقىدىن چىقتى. ^■   ‏23 ئاندىن ئېھۇد دالان ئارقىلىق چىقتى. ئۇ بالىخانىنىڭ ئىشىكلىرىنى كەينىدىن يېپىپ، قۇلۇپلىغانىدى. ^■  

‏24 ئۇ چىقىپ كەتكەندىن كېيىن، پادىشاھنىڭ خىزمەتچىلىرى كېلىپ، بالىخانىنىڭ ئىشىكلىرىنىڭ قۇلۇپلاقلىق ئىكەنلىكىنى كۆرۈپ، پادىشاھ سۆرۈن ئۆيدە تەرەتكە ئولتۇرسا كېرەك دەپ ئويلىدى. ‏25 لېكىن ئۇلار ئۇزۇن ساقلاپ تۇرۇپ، بالىخانىنىڭ ئىشىكلىرى ئېچىلمىغىنىنى كۆرۈپ، ئاچقۇچنى ئېلىپ ئىشىكنى ئاچسا، خوجىسىنىڭ يەرگە يىقىلىپ، ئۆلۈك ياتقىنىنى كۆرۈشتى.

‏26 ئەمما ئۇلار ساقلاپ تۇرغاندا ئېھۇد قېچىپ چىقىپ، ئويما تاش ھەيكەللىرى بار جايدىن ئۆتۈپ، سېئىراغا يېتىۋېلىپ قۇتۇلدى. ‏27 ئۇ شۇ يەرگە كېلىپ، ئەفرائىم تاغلىقلىرىدا بۇرغا چالدى. بەنى ئىسرائىل ئۇنىڭ بىلەن تاغلىق زېمىندىن چۈشتى ۋە ئۇ ئۆزى ئۇلارنىڭ ئالدىدا ماڭدى. ^■   ‏28 ئۇ ئۇلارغا: «ماڭا ئەگىشىپ مېڭىڭلار، چۈنكى پەرۋەردىگار دۈشمىنىڭلار موئابىيلارنى قوللىرىڭلارغا بەردى» دېگىنىدە، ئۇلار ئۇنىڭ كەينىدىن ئەگىشىپ چۈشۈپ، ئىئوردان دەرياسىنىڭ كېچىكىنى توسۇۋېلىپ، ھېچكىمنىڭ ئۆتۈشىگە يول قويمىدى. ‏29 ئۇ ۋاقىتتا ئۇلار موئابىيلاردىن ئون مىڭچە كۈچلۈك باتۇر ئادەمنى ئۆلتۈرۈپ، ھېچبىرىنىڭ قېچىشىغا يول قويمىدى. ‏30 شۇ كۈنى موئاب ئىسرائىلنىڭ قولى ئاستىدا بېسىلدى. شۇنىڭ بىلەن زېمىن سەكسەن يىل تىنچ-ئامان تۇردى.

‏31 ئېھۇدتىن كېيىن ئاناتنىڭ ئوغلى شامگار ئوتتۇرىغا چىقىپ، فىلىستىنلەردىن ئالتە يۈز كىشىنى ئۆكۈز سانجىغۇچى بىلەن ئۆلتۈرۈپ، ئىسرائىلنى قۇتقۇزدى.