‏1 نائومىنىڭ ئېرىگە تۇغقان كېلىدىغان بوئاز ئىسىملىك بىر ئادەم بار ئىدى. ئۇ ئەلىمېلەكنىڭ جەمەتىدىن بولۇپ، ئابرۇيلۇق دۆلەتمەن كىشى ئىدى. ‏2 موئابلىق رۇت نائومىغا: «مەن ئېتىزلىقلارغا بېرىپ، بىرىنىڭ نەزىرىدە ئىلتىپات تاپسام، ئۇنىڭ كەينىدىن ئارپا باشاقلىرىنى تېرەي» دېدى. نائومى ئۇنىڭغا: «بارغىن، ئەي قىزىم» دېدى.

‏3 شۇنىڭ بىلەن ئۇ بېرىپ، بىر ئېتىزلىققا كېلىپ، ئۇ يەردە ئورمىچىلارنىڭ كەينىدىن ئارپا باشاقلىرىنى تەردى. ئۇنىڭ بەختىگە بۇ ئېتىزلىق دەل ئەلىمېلەككە تۇغقان بولغان بوئازنىڭكى ئىدى. ‏4 بۇ ۋاقىتتا بەيتلەھەمدىن كەلگەن بوئاز ئورمىچىلارغا: «پەرۋەردىگار سىلەرگە يار بولغاي!» دېدى. ئۇلار ئۇنىڭغا جاۋابەن: «پەرۋەردىگار ساڭا بەرىكەت ئاتا قىلغاي!» دېيىشتى. ‏5 ئاندىن بوئاز ئورمىچىلارنىڭ بېشىدا تۇرغان چاكىرىدىن: «ئاۋۇ كىمنىڭ قىزى بولىدۇ؟» دەپ سورىدى. ‏6 ئورمىچىلارنىڭ بېشىدا تۇرغان يىگىت جاۋاب بېرىپ: «ئۇ نائومى بىلەن بىللە موئاب زېمىنىدىن كەلگەن موئابلىق قىز. ‏7 ئۇ: ‹رۇخسەت قىلساڭ ئورمىچىلارنىڭ كەينىدىن باغلاملارنىڭ ئارىسىدا باشاق تەرسەم› دەپ تەلەپ قىلدى. ئۇ ئەتىگەندىن بۇ ۋاقىتقىچە ئىشلەۋاتىدۇ، پەقەتلا كەپىدە ئازراق ئارام ئالدى» دېدى.

‏8 بوئاز رۇتقا: «ئەي قىزىم، ئاڭلاۋاتامسەن؟ سەن باشاق تېرىش ئۈچۈن باشقا بىر كىشىنىڭ ئېتىزلىقىغا بارمىغىن، بۇ يەردىنمۇ كەتمىگىن. مېنىڭ دېدەكلىرىم بىلەن مۇشۇ يەردە يۈرۈپ باشاق تەرگىن. ‏9 ئورمىچىلار ئىشلىگەن يەردىن كۆزۈڭنى ئايرىماي، ئۇلارنىڭ كەينىدىن ئەگىشىپ بارغىن. مەن يىگىتلەرگە سېنى بوزەك قىلماسلىقنى تاپىلىدىم. ئۇسساپ قالساڭ، كوزىلاردىن، يىگىتلىرىم تارتقان سۇدىن ئىچكىن» دېدى. ‏10 رۇت ئۆزىنى يەرگە تاشلىدى. ئۇ بېشىنى يەرگە تەگكۈچە ئېگىپ ئۇنىڭغا تەزىم قىلىپ: «مەن بىر مۇساپىر تۇرسام، نېمىشقا ماڭا شۇنچە ئىلتىپات كۆرسىتىپ، ھالىمدىن خەۋەر ئالىسەن؟» دېدى. ‏11 بوئاز ئۇنىڭغا جاۋاب بېرىپ: «ئېرىڭ ئۆلۈپ كەتكەندىن كېيىن، ئۆز قېيناناڭ ئۈچۈن قىلغانلىرىڭنىڭ ھەممىسىنى، يەنى ئاتاڭ بىلەن ئاناڭنى ۋە ئۆز ۋەتىنىڭنى تاشلاپ، ئىلگىرى تونۇمىغان خەلققە كەلگىنىڭنى ئاڭلىدىم. ‏12 پەرۋەردىگار قىلغىنىڭغا يارىشا ساڭا ياندۇرسۇن. سەن قاناتلىرى ئاستىدا پاناھ ئىزدىگەن ئىسرائىلنىڭ خۇداسى پەرۋەردىگار سېنى سېخىيلىق بىلەن مۇكاپاتلىسۇن» دېدى. ‏13 شۇنىڭ بىلەن رۇت: «ئەي خوجام، كۆزلىرىڭدە ئىلتىپات تاپقايمەن. مەن سېنىڭ دېدىكىڭ بولمىساممۇ، ماڭا ئۆز دېدىكىڭدەك مېھرىبانلىق بىلەن سۆزلەپ تەسەللى بەردىڭ» دېدى.

‏14 تاماق ۋاقتىدا بوئاز ئۇنىڭغا: «بۇ تەرەپكە كېلىپ ناندىن يېگىن، نېنىڭنى سىركىگە چىلىغىن» دېدى. رۇت ئورمىچىلارنىڭ يېنىدا ئولتۇرغىنىدا، بوئاز ئۇنىڭغا قوماچ ئۇزىتىپ بەردى. ئۇ ئۇنىڭدىن تويغۇچە يېدى ۋە يەنە ئېشىپ قالدى. ‏15 ئۇ باشاق تېرىش ئۈچۈن ئورنىدىن تۇرغاندا بوئاز ئۆز يىگىتلىرىگە: «ئۇنىڭغا خاپىلىق سالماي، باغلاملارنىڭ ئارىسىدىمۇ باشاق تېرىشىگە رۇخسەت قىلىڭلار. ‏16 سىلەر يەنە باغلاملاردىن باشاقلارنى ئايرىپ، ئۇنىڭ تېرىۋېلىشى ئۈچۈن چۈشۈرۈپ قويۇڭلار. ئۇنى ھېچ ئازارلىماڭلار» دېدى.

‏17 ئۇ ئاخشامغىچە ئېتىزلىقتا باشاق تەردى. ئۇ تەرگەن باشاقلارنى سوققاندا تەخمىنەن بىر ئېفا ئارپا چىقتى. ^■   ‏18 ئاندىن ئۇ يۈكنى ئېلىپ، شەھەرگە كىردى. قېينانىسى ئۇنىڭ تېرىۋالغان ئارپىسىنى كۆردى. رۇت ھەم يەپ تويغاندىن كېيىن ئېشىپ قالغان تامىقىنى چىقىرىپ قېينانىسىغا بەردى. ‏19 قېينانىسى ئۇنىڭغا: «سەن بۈگۈن قەيەردە باشاق تەردىڭ، قەيەردە ئىشلىدىڭ؟ ساڭا غەمخورلۇق قىلغان كىشى بەرىكەت تاپسۇن» دېدى. ئۇ ئۆز قېينانىسىغا كىمنىڭكىدە ئىش قىلغىنىنى ئېيتىپ: «مەن بۈگۈن بوئاز دېگەن ئادەمنىڭ ئېتىزلىقىدا ئىشلىدىم» دېدى. ‏20 نائومى كېلىنىگە: «تىرىكلەرگىمۇ ۋە مەرھۇملارغىمۇ مېھىر-شەپقىتىنى كۆرسىتىشتىن باش تارتمىغان كىشى پەرۋەردىگار تەرىپىدىن بەرىكەت تاپسۇن» دېدى. ئاندىن نائومى ئۇنىڭغا يەنە: «ئۇ ئادەم بىزگە يېقىن تۇغقاندۇر. ئۇ بىزنى قۇتۇلدۇرالايدىغان تۇغقانلاردىن بىرىدۇر» دېدى. ^■   ‏21 موئابلىق رۇت ئېيتتى: «ئۇ ماڭا يەنە: ‹مېنىڭ يىگىتلىرىم ھەممە ھوسۇلۇمنى يىغىپ بولغۇچە ئۇلار بىلەن بىرگە بولغىن› دېدى». ‏22 نائومى كېلىنى رۇتقا: «ئەي قىزىم، باشقىسىنىڭ ئېتىزلىقىدا بىراۋنىڭ ساڭا ئەسكىلىك قىلماسلىقى ئۈچۈن، ئۇنىڭ دېدەكلىرى بىلەن چىققىنىڭ ياخشىدۇر» دېدى. ‏23 شۇنداق قىلىپ رۇت ئارپا ۋە بۇغداي ھوسۇلى يىغىلىپ بولغۇچە بوئازنىڭ دېدەكلىرى بىلەن يۈرۈپ باشاق تەردى. لېكىن ئۇ قېينانىسى بىلەن بىللە تۇردى.