‏1 بالا سامۇئەل ئەلىنىڭ ئالدىدا پەرۋەردىگارنىڭ خىزمىتىنى قىلاتتى. ئۇ كۈنلەردە پەرۋەردىگارنىڭ سۆزى نادىر ئىدى ۋە ۋەھىيلەرمۇ كەمدىن-كەم كېلەتتى. ‏2 بىر كۈنى، كۆزلىرى كۆرەلمىگۈدەك ئاجىزلاشقان ئەلى ئورنىدا يېتىۋاتاتتى.

‏3 خۇدانىڭ چىرىغى تېخى ئۆچمىگەنىدى. سامۇئەل بولسا پەرۋەردىگارنىڭ ئىبادەتخانىسىدا يېتىپ ئۇخلاۋاتاتتى. خۇدانىڭ ئەھدە ساندۇقىمۇ شۇ يەردە ئىدى. ‏4 شۇ چاغدا پەرۋەردىگار سامۇئەلنى چاقىردى. «مانا مەن» دېدى سامۇئەل. ‏5 ئۇ ئەلىنىڭ يېنىغا يۈگۈرۈپ بېرىپ: «مانا مەن، مېنى چاقىردىڭغۇ» دېدى. لېكىن ئەلى: «مەن سېنى چاقىرمىدىم. قايتىپ بېرىپ ياتقىن» دېدى. شۇنىڭ بىلەن ئۇ قايتىپ بېرىپ ياتتى.

‏6 پەرۋەردىگار سامۇئەلنى يەنە چاقىردى. سامۇئەل يەنە ئورنىدىن تۇرۇپ ئەلىنىڭ يېنىغا بېرىپ: «مانا مەن، مېنى چاقىردىڭغۇ» دېدى. لېكىن ئەلى: «مەن چاقىرمىدىم، ئەي ئوغلۇم، يەنە بېرىپ ياتقىن» دېدى. ‏7 سامۇئەل تېخى پەرۋەردىگارنى تونۇمىغانىدى. پەرۋەردىگارنىڭ سۆزىمۇ ئۇنىڭغا تېخى ئايان قىلىنمىغانىدى.

‏8 لېكىن پەرۋەردىگار يەنە ئۈچىنچى قېتىم سامۇئەلنى چاقىردى. ئۇ ئورنىدىن تۇرۇپ، ئەلىنىڭ يېنىغا بېرىپ: «مانا مەن، مېنى چاقىردىڭ ئەمەسمۇ؟» دېدى. ئۇ ۋاقىتتا ئەلى بۇ بالىنى پەرۋەردىگارنىڭ چاقىرىۋاتقىنىنى چۈشەندى. ‏9 ئەلى سامۇئەلگە: «بېرىپ ياتقىن. ئەگەر ئۇ سېنى يەنە چاقىرسا: ‹ئەي پەرۋەردىگار، سۆزلىگىن. قۇلۇڭ ئانگلايدۇ› دېگىن» دېدى. سامۇئەل بېرىپ ئورنىدا ياتتى.

‏10 پەرۋەردىگار كېلىپ يېقىن تۇرۇپ، ئىلگىرىكىدەك: «ئەي سامۇئەل، ئەي سامۇئەل» دەپ چاقىردى. سامۇئەل: «سۆزلىگىن، قۇلۇڭ ئانگلايدۇ» دەپ جاۋاب بەردى. ‏11 پەرۋەردىگار سامۇئەلگە مۇنداق دېدى: «مانا، مەن ئىسرائىلدا شۇنداق بىر ئىش قىلماقچىمەنكى، ھەر ئاڭلىغاننىڭ ئىككى قۇلىقى زىڭىلداپ كەتكۈسى. ‏12 ئۇ كۈنى ئەلىگە قارشى، ئۇنىڭ ئائىلسى توغرىسىدا ئېيتقان سۆزلىرىمنىڭ ھەممىسىنى باشتىن ئاخىرغىچە ئەمەلگە ئاشۇرىمەن. ‏13 مەن ئۇنىڭغا ئۇنىڭ جەمەتى ئۈستىدىن مەڭگۈلۈك ھۆكۈم چىقىرىدىغانلىقىمنى جاكارلىغان ئىدىم، چۈنكى ئۇنىڭ ئوغۇللىرى گۇناھ قىلىپ ئۆزلىرىگە لەنەت كەلتۈردى ۋە ئۇ بۇنى بىلىپ تۇرۇپ ئۇلارنى توسمىدى. ^■   ‏14 شۇنىڭ ئۈچۈن ئەلىنىڭ ئۆيى توغرىسىدا قەسەم قىلدىمكى، ئەلى جەمەتىنىڭ گۇناھى ئەبەدكىچە قۇربانلىق ياكى ھەدىيە بىلەنمۇ كەچۈرۈم قىلىنمايدۇ».

‏15 سامۇئەل سەھەرگىچە يېتىپ، ئاندىن تۇرۇپ پەرۋەردىگارنىڭ بەيتىنىڭ ئىشىكلىرىنى ئاچتى. ئەمما سامۇئەل بۇ ۋەھىينى ئەلىگە ئېيتىشتىن قورقتى. ‏16 لېكىن ئەلى سامۇئەلنى چاقىرىپ: «ئەي سامۇئەل ئوغلۇم» دېدى. «مانا، مەن» دەپ جاۋاب بەردى سامۇئەل. ‏17 ئەلى: «پەرۋەردىگار ساڭا نېمە سۆز ئېيتتى؟ سەندىن ئۆتۈنەيكى، ئۇنى مەندىن يوشۇرمىغىن. ئەگەر ئۇنىڭ ساڭا ئېيتقانلىرىدىن بىر سۆزىنى مەندىن يوشۇرساڭ، خۇدا سېنى قوشلاپ جازالىغاي!» دېدى. ‏18 شۇنىڭ بىلەن سامۇئەل ئۇنىڭدىن ھېچنېمىنى يوشۇرماي ھەممىنى ئېيتىپ بەردى. ئەلى بولسا: «ئۇ پەرۋەردىگاردۇر. ئۇ قانداق قىلىشنى ياخشى دەپ قارىسا، شۇنداق قىلسۇن» دېدى.

‏19 سامۇئەل ئۆسۈپ چوڭ بولدى ۋە پەرۋەردىگار ئۇنىڭغا يار بولۇپ، ئۇنىڭ بېشارەتلىك سۆزلىرىنىڭ ھېچبىرىنىڭ يەردە قېلىشىغا يول قويمىدى. ‏20 شۇنىڭ بىلەن داندىن تارتىپ بەئەرشېباغىچە پۈتۈن ئىسرائىل، سامۇئەلنىڭ پەرۋەردىگارنىڭ تىكلىگەن بىر پەيغەمبىرى بولغىنىنى بىلدى. ‏21 شۇ ۋاقىتتىن باشلاپ پەرۋەردىگار شىلوھتا ئۆزىنى ئايان قىلىپ تۇردى، چۈنكى پەرۋەردىگار شىلوھتا ئۆز سۆزى بىلەن ئۆزىنى سامۇئەلگە ئايان قىلاتتى. سامۇئەل بولسا ئۇنىڭ سۆزىنى پۈتۈن ئىسرائىلغا يەتكۈزدى.