‏1 ئەمما سامۇئەل قېرىغاندا، ئىسرائىل ئۈستىگە ئۆز ئوغۇللىرىنى ھاكىم قىلىپ قويدى. ‏2 ئۇنىڭ تۇنجى ئوغلىنىڭ ئىسمى يوئەل، ئىككىنچىسىنىڭ ئىسمى ئابىيا ئىدى. ئۇلار بەئەرشېبادا ھاكىملىق قىلاتتى. ‏3 لېكىن ئوغۇللىرى ئۇنىڭ يولىدا ماڭماي، بەلكى ناھەق پايدىنى ئىزدەپ، پارا يەپ، ھەق-ناھەقنى ئاستىن-ئۈستۈن قىلاتتى. ‏4 شۇنىڭ بىلەن ئىسرائىلنىڭ ھەممە ئاقساقاللىرى جەم بولۇپ، راماغا سامۇئەلنىڭ قېشىغا كەلدى. ‏5 ئۇلار ئۇنىڭغا: «مانا، سەن قېرىپ قالدىڭ. ئوغۇللىرىڭ بولسا سېنىڭ يوللىرىڭدا ماڭمايدۇ. باشقا بارلىق ئەللەردە بولغاندەك، ئەمدى بىزگە ھۆكۈمرانلىق قىلىدىغان بىر پادىشاھ تەيىنلىگىن» دېدى.

‏6 لېكىن ئۇلارنىڭ: «بىزگە ھۆكۈمرانلىق قىلىدىغان بىر پادىشاھ تەيىنلەپ بەرگىن» دېگىنى سامۇئەلنىڭ كۆڭلىگە ياقمىدى. سامۇئەل پەرۋەردىگارغا دۇئا قىلغاندا، ‏7 پەرۋەردىگار سامۇئەلگە مۇنداق دېدى: «خەلقنىڭ ساڭا ئېيتقىنىنىڭ ھەممىسىگە قۇلاق سالغىن، چۈنكى ئۇلار سېنى رەت قىلمىدى، بەلكى مېنىڭ ئۇلارغا پادىشاھ بولۇشۇمنى خالىماي، مېنى رەت قىلدى. ‏8 مەن ئۇلارنى مىسىردىن ئېلىپ چىققان كۈندىن تارتىپ بۈگۈنكى كۈنگىچە ئۇلار شۇنداق ئىشلارنى قىلىپ كەلمەكتە. ئۇلار مېنى تاشلاپ باشقا ئىلاھلارغا ئىبادەت قىلدى. ئەمدى ساڭىمۇ شۇنداق قىلدى. ‏9 شۇنىڭ ئۈچۈن ئۇلارنىڭ سۆزىگە ئۇنىغىن. لېكىن ئۇلارنى قاتتىق ئاگاھلاندۇرۇپ قويغىن، ئۇلارنىڭ ئۈستىدىن ھۆكۈمرانلىق قىلىدىغان پادىشاھنىڭ باشقۇرۇشى قانداق بولىدىغانلىقىنى بىلدۈرگىن».

‏10 سامۇئەل ئۆزىدىن بىر پادىشاھ تەيىنلەپ بېرىشنى سورىغان خەلققە پەرۋەردىگارنىڭ دېگىنىنىڭ ھەممىسىنى ئېيتىپ بەردى: ‏11 «ئۈستۈڭلاردىن ھۆكۈمرانلىق قىلىدىغان پادىشاھنىڭ تۈزۈمى مۇنداق بولىدۇ: ئۇ ئوغۇللىرىڭلارنى ئۆز ئىشىغا تۇتۇۋېلىپ، جەڭ ھارۋىلىرى ۋە ئاتلىرى ئۈچۈن ئىشلىتىدۇ ۋە جەڭ ھارۋىلىرىنىڭ ئالدىدا يۈگۈرۈشكە سالىدۇ. ‏12 بەزىلىرىنى مىڭبېشى ۋە ئەللىكبېشى قىلىپ قويىدۇ، بەزىلىرىنى يېرىنى ھەيدەپ ھوسۇلىنى ئورۇشقا ۋە قورال-ياراق، شۇنداقلا جەڭ ھارۋىلىرىنىڭ جابدۇقلىرىنى ياساشقا سالىدۇ. ‏13 قىزلىرىڭلارنى ئەتىرچى، ئاشپەز ۋە ناۋاي قىلىپ قويىدۇ. ‏14 ياخشى زېمىنلىرىڭلارنى، ئۈزۈمزارلىق ۋە زەيتۇنلۇقلىرىڭلارنى تارتىۋېلىپ، ئۆز خىزمەتكارلىرىغا بېرىدۇ. ‏15 ئېتىزلىق ۋە ئۈزۈمزارلىقلىرىڭلارنىڭ ھوسۇلىدىن ئوندىن بىرىنى ئېلىپ، ئۆز ئەمەلدارلىرى ۋە خىزمەتكارلىرىغا بېرىدۇ. ‏16 خىزمەتكارلىرىڭلار، دېدەكلىرىڭلار، ئەڭ ياخشى يىگىتلىرىڭلارنى ۋە ئېشەكلىرىڭلارنىمۇ ئېلىپ ئۆز ئىشىغا سالىدۇ. ‏17 قويلىرىڭلارنىڭ ئوندىن بىرىنى ئالىدۇ. ئۆزۈڭلارمۇ ئۇنىڭغا قۇل بولىسىلەر. ‏18 ئۇ كۈندە سىلەر ئۆزۈڭلار تاللىغان پادىشاھنىڭ دەستىدىن ئاھ-پەرياد قىلىسىلەر، لېكىن ئۇ ۋاقىتتا پەرۋەردىگار سىلەرگە قۇلاق سالمايدۇ». ‏19 لېكىن خەلق سامۇئەلنىڭ سۆزىگە قۇلاق سالماي: «ياق، قانداقلا بولمىسۇن ئۈستىمىزدىن ھۆكۈمرانلىق قىلىدىغان بىر پادىشاھ بولسۇن. ‏20 بىز باشقا ئەللەرگە ئوخشاش ئۈستىمىزدىن ھۆكۈمرانلىق قىلىدىغان، جەڭلىرىمىزدە بىزنى باشلاپ جەڭ قىلىدىغان پادىشاھنى خالايمىز» دېدى. ‏21 سامۇئەل خەلقنىڭ ھەممە سۆزلىرىنى ئاڭلاپ، پەرۋەردىگارغا يەتكۈزدى. ‏22 پەرۋەردىگار سامۇئەلگە: «سەن ئۇلارنىڭ سۆزىگە قۇلاق سېلىپ، ئۇلارغا بىر پادىشاھنى تەيىنلەپ بەرگىن» دېدى. شۇنىڭ بىلەن سامۇئەل ئىسرائىلنىڭ ئادەملىرىگە: «ھەربىرىڭلار ئۆز شەھىرىڭلارغا قايتىڭلار» دېدى.