‏1 سائۇل پادىشاھ بولغاندا ئوتتۇز ياشتا ئىدى. ئۇ ئىسرائىلغا قىرىق ئىككى يىل ھۆكۈمرانلىق قىلدى. ^■  

‏2 سائۇل ئۆزىگە ئىسرائىلدىن ئۈچ مىڭ ئادەمنى تاللىۋالدى. ئىككى مىڭى سائۇلنىڭ قېشىدا مىكماستا ۋە بەيتەلنىڭ تاغلىرىدا، بىر مىڭى يوناتاننىڭ قېشىدا بەنيامىن زېمىنىدىكى گىبېئادا تۇردى. قالغان خەلقنىڭ ھەممىسىنى ئۇ ئۆز ئۆيلىرىگە قايتۇرۇۋەتتى.

‏3 يوناتان فىلىستىنلەرنىڭ گېبادىكى بارگاھىغا ھۇجۇم قىلىپ ئۇلارنى مەغلۇپ قىلدى. فىلىستىنلەر بۇنى ئاڭلاپ قالدى. ئۇ چاغدا سائۇل: «ئىبرانىيلار بۇنى ئاڭلىسۇن» دەپ پۈتۈن زېمىنىدا بۇرغا چالدۇردى. ^■   ‏4 پۈتۈن ئىسرائىل سائۇلنىڭ فىلىستىنلەرنىڭ بارگاھىنى مەغلۇپ قىلغانلىقىنى، بۇنىڭ بىلەن فىلىستىنلەرنىڭ ئىسرائىلدىن نەپرەتلەنگەنلىكىنى ئاڭلىدى. خەلق گىلگالغا چاقىرتىلىپ، سائۇلنىڭ كەينىدىن گىلگالغا بېرىپ يىغىلدى.

‏5 فىلىستىنلەر ئىسرائىل بىلەن جەڭ قىلغىلى يىغىلىپ، ئوتتۇز مىڭ جەڭ ھارۋىسى، ئالتە مىڭ ئاتلىق ۋە دېڭىز ساھىلىدىكى قۇمدەك كۆپ پىيادە ئەسكەر توپلاپ، بەيت-ئاۋەننىڭ شەرق تەرىپىدىكى مىكماستا چېدىر-بارگاھ تىكتى. ‏6 ئىسرائىلنىڭ ئادەملىرى ئۆزلىرىنىڭ يامان ئەھۋالدا قالغانلىقىنى كۆرۈپ، غارلارغا، چاتقاللىقلارغا، قىيا تاشلارنىڭ ئارىسىغا، ئېگىز جايلارغا ۋە ئازگاللارغا يوشۇرۇنۇۋالدى. ‏7 بەزى ئىبرانىيلار ئىئوردان دەرياسىدىن ئۆتۈپ، گاد ۋە گىلېئادنىڭ زېمىنىغا ئۆتۈپ كەتتى. لېكىن سائۇل گىلگالدا قالدى، ئۇنىڭ ئادەملىرىنىڭ ھەممىسى لاغىلداپ تىترەپ ئۇنىڭغا ئەگەشتى. ‏8 سائۇل سامۇئەل بەلگىلىگەن ۋاقىت بويىچە يەتتە كۈن ساقلاپ تۇردى. لېكىن سامۇئەل گىلگالغا كەلمىگەنلىكى ئۈچۈن خەلق ئۇنىڭ يېنىدىن تارىلىپ كېتىشكە باشلىدى. ‏9 سائۇل: «كۆيدۈرمە قۇربانلىق ۋە ئامانلىق قۇربانلىقلىرىنى بۇ يەرگە ئېلىپ كېلىڭلار» دېدى. ئاندىن ئۇ ئۆزى كۆيدۈرمە قۇربانلىق قىلدى. ‏10 لېكىن كۆيدۈرمە قۇربانلىقى ئاياغلىشىشى بىلەن تەڭ سامۇئەل كەلدى. سائۇل ئۇنىڭغا سالام قىلغىلى ئالدىغا چىقتى. ‏11 سامۇئەل: «نېمە قىلدىڭ؟» دەپ سورىدى. سائۇل: «خەلقنىڭ يېنىمدىن تارىلىپ كەتكىنىنى، بەلگىلەنگەن ۋاقىتتا سېنىڭ كەلمىگىنىڭنى ۋە فىلىستىنلەرنىڭ مىكماستا يىغىلغىنىنى كۆرگىنىمدە: ‏12 ‹ئەمدى فىلىستىنلەر گىلگالغا كېلىپ ئۈستۈمگە چۈشىدۇ، مەن بولسام، تېخى پەرۋەردىگارغا ئىلتىجا قىلمىدىم› دەپ ئويلاپ ئۆزۈمنى زورلاپ كۆيدۈرمە قۇربانلىق قىلدىم» دەپ جاۋاب بەردى.

‏13 سامۇئەل سائۇلغا: «سەن ئەخمەقلىق قىلىپ، پەرۋەردىگار خۇدايىڭنىڭ ساڭا بۇيرۇغان ئەمرىنى ئورۇنلىمىدىڭ. ئورۇنلىغان بولساڭ ئىسرائىلنىڭ ئۈستىدىكى سەلتەنىتىڭ ئەبەدكىچە مەزمۇت تۇرار ئىدى. ‏14 ئەمدى سېنىڭ سەلتەنىتىڭ مەزمۇت تۇرمايدۇ. پەرۋەردىگار ئۆز كۆڭلىدىكىدەك بىر ئادەمنى تاپتى ۋە پەرۋەردىگار ئۇنى ئۆز خەلقىنىڭ باشلامچىسى قىلدى، چۈنكى سەن پەرۋەردىگارنىڭ ساڭا بۇيرۇغىنىنى قىلمىدىڭ» دېدى.

‏15 ئاندىن سامۇئەل گىلگالدىن قوزغىلىپ، بەنيامىن زېمىنىدىكى گىبېئاغا باردى. سائۇل ئۆزى بىلەن بىللە بولغان ئادەملەرنى سانىغاندا، ئۇلارنىڭ سانى ئالتە يۈزچە چىقتى. ‏16 سائۇل بىلەن ئوغلى يوناتان ۋە ئۇلار بىلەن بىللە بولغان ئادەملىرى بەنيامىن زېمىنىدىكى گىبېئادا تۇراتتى. فىلىستىنلەر بولسا مىكماستا بارگاھ قۇرغانىدى. ‏17 ئۈچ بۆلەككە بۆلۈنگەن ھۇجۇمچىلار فىلىستىنلەرنىڭ بارگاھىدىن چىقتى. بىر بۆلەك شۇئال زېمىنىدىكى ئوفراغا بارىدىغان يولغا، ‏18 بىر بۆلەك بەيت-خورونغا بارىدىغان يولغا، يەنە بىر بۆلەك چۆلنىڭ چېتىدىكى زېبويىم ۋادىسى تەرەپكە بارىدىغان يولغا ماڭدى.

‏19 ئۇ چاغلاردا، پۈتۈن ئىسرائىل زېمىنىدا ھېچبىر تۆمۈرچى يوق ئىدى. چۈنكى فىلىستىنلەر «ئىبرانىيلار ئۆزلىرىگە قىلىچ ياكى نەيزە ياسىۋالمىسۇن» دەيتتى. ‏20 شۇ سەۋەبتىن ھەممە ئىسرائىللار ئورغاق، كەتمەن، پالتا ۋە قوش چىشلىرىنى بىلەش ئۈچۈن فىلىستىنلەرنىڭ قېشىغا باراتتى. ‏21 ئورغاق، قوش چىشلىرى، كەتمەن، ئارا ۋە پالتىلار گال بولغاندا ياكى زىخلارنى تۈزىتىش لازىم بولغاندا، ئۇلارغا بېرىشقا كېرەك بولاتتى. ^■   ‏22 شۇڭا ئۇرۇش ۋاقتىدا، سائۇل بىلەن يوناتاندىلا قىلىچ ۋە نەيزە بار ئىدى، باشقا خەلقنىڭ ھېچبىرىدە نە قىلىچ، نە نەيزە تېپىلمايتتى. ‏23 ئۇ ۋاقىتتا فىلىستىنلەرنىڭ بىر قاراۋۇل قىسمى مىكماستىكى داۋانغا چىققانىدى.