‏1 داۋۇدقا: «مانا، فىلىستىنلەر قېئىلاغا ھۇجۇم قىلىپ، خامانلارنى بۇلاڭ-تالاڭ قىلىۋاتىدۇ» دەپ خەۋەر يەتكۈزۈلدى. ‏2 داۋۇد پەرۋەردىگاردىن: «مەن بېرىپ، ئۇ فىلىستىنلەر بىلەن ئۇرۇش قىلايمۇ؟» دەپ سورىدى. پەرۋەردىگار داۋۇدقا: «بېرىپ، فىلىستىنلەر بىلەن ئۇرۇش قىلىپ، قېئىلانى ئازاد قىلغىن» دېدى. ‏3 لېكىن داۋۇدنىڭ ئادەملىرى ئۇنىڭغا: «قارا، بىز يەھۇدا زېمىنىدا تۇرۇپمۇ قورقىمىز، ئەگەر قېئىلاغا فىلىستىنلەرنىڭ قوشۇنىنىڭ ئالدىغا بارساق، ئەھۋالىمىز قانداق بولار؟» دېدى. ‏4 داۋۇد پەرۋەردىگاردىن يەنە سورىدى، پەرۋەردىگار ئۇنىڭغا: «سەن قوزغىلىپ، قېئىلاغا بارغىن. مەن فىلىستىنلەرنى سېنىڭ قولۇڭغا تاپشۇرۇپ بېرىمەن» دېدى. ‏5 شۇنىڭ بىلەن، داۋۇد ئۆز ئادەملىرى بىلەن قېئىلاغا بېرىپ، فىلىستىنلەر بىلەن جەڭ قىلىپ، ئۇلارنىڭ ماللىرىنى ئولجىغا ئالدى، ھەم ئۇلارنى قاتتىق مەغلۇپ قىلدى. شۇنداق قىلىپ، داۋۇد قېئىلا ئاھالىسىنى قۇتقۇزدى.

‏6 ئاخىمەلەكنىڭ ئوغلى ئابياتار قېئىلادىكى داۋۇدنىڭ يېنىغا قاچقاندا ئېفودنى ئالغاچ كەلگەنىدى.

‏7 سائۇلغا داۋۇدنىڭ قېئىلاغا كەلگەن خەۋىرى يەتكۈزۈلدى. سائۇل: «ئەمدى خۇدا ئۇنى مېنىڭ قولۇمغا تاپشۇرۇپ بەردى. چۈنكى ئۇ دەرۋازىلىرى ۋە تاقاقلىرى بولغان شەھەرگە كىرىپ سولىنىپ قالدى» دېدى. ‏8 سائۇل ھەممە خەلقنى داۋۇد ۋە ئۇنىڭ ئادەملىرىنى قورشاش ئۈچۈن قېئىلاغا بېرىپ، جەڭگە چىقىشقا چاقىردى.

‏9 داۋۇد سائۇلنىڭ ئۆزىگە قەست قىلىدىغانلىقىنى بىلگىنىدە، كاھىن ئابياتارغا: «ئېفودنى ئېلىپ كەلگىن» دېدى. ‏10 ئاندىن داۋۇد: «ئەي ئىسرائىلنىڭ خۇداسى پەرۋەردىگار، سېنىڭ خىزمەتكارىڭ سائۇلنىڭ قېئىلاغا كېلىپ، مەن سەۋەبلىك بۇ شەھەرنى ۋەيران قىلىشنى قەستلەۋاتقانلىقىنى ئېنىق ئاڭلىدى. ‏11 قېئىلانىڭ خەلقى مېنى ئۇنىڭ قولىغا تۇتۇپ بېرەمدۇ؟ مەن خىزمەتكارىڭ ئاڭلىغاندەك سائۇل بۇ يەرگە كېلەرمۇ؟ ئەي ئىسرائىلنىڭ خۇداسى پەرۋەردىگار، ماڭا ئېيتىپ بېرىشىڭنى ئۆتۈنىمەن» دېدى. پەرۋەردىگار: «ئۇ بۇ يەرگە كېلىدۇ» دېدى. ‏12 داۋۇد يەنە: «قېئىلانىڭ خەلقى مېنى ۋە ئادەملىرىمنى سائۇلنىڭ قولىغا تۇتۇپ بېرەمدۇ؟» دەپ سورىدى. پەرۋەردىگار: «ئۇلار سىلەرنى تۇتۇپ بېرىدۇ» دېدى. ‏13 شۇنىڭ بىلەن داۋۇد ۋە ئۇنىڭ ئادەملىرى، تەخمىنەن ئالتە يۈز كىشى قېئىلادىن چىقىپ، بارالىغۇدەكلا يەر بولسا باردى. سائۇلغا داۋۇدنىڭ قېئىلادىن قاچقان خەۋىرى كەلگەندە، ئۇ ئۇنى قوغلاشتىن ۋاز كەچتى.

‏14 داۋۇد چۆللەردىكى ۋە زىف چۆلىنىڭ تاغلىرىدىكى پاناھگاھلاردا تۇردى. سائۇل ئۇنى ھەر كۈنى دېگۈدەك ئىزدەپ يۈردى، لېكىن خۇدا ئۇنى ئۇنىڭ قولىغا تاپشۇرۇپ بەرمىدى. ‏15 داۋۇد زىف چۆلىدىكى بىر ئورمانلىقتا تۇرغاندا، سائۇلنىڭ ئۇنى ئۆلتۈرگىلى چىققىنىنى بىلىپ قالدى. ‏16 سائۇلنىڭ ئوغلى يوناتان ئورمانلىققا داۋۇدنىڭ يېنىغا بېرىپ، ئۇنىڭ خۇداغا بولغان ئىشەنچىنى كۈچەيتىپ، ‏17 ئۇنىڭغا: «قورقمىغىن. ئاتام سائۇلنىڭ قولى سېنى تاپالمايدۇ، سەن ئىسرائىلنىڭ پادىشاھى بولىسەن. مەن بولسام سەندىن كېيىن ئىككىنچى ئورۇندىكى ئادىمىڭ بولىمەن. بۇنى ئاتام سائۇلمۇ بىلىدۇ» دېدى. ‏18 ئۇلار ئىككىسى پەرۋەردىگارنىڭ ئالدىدا ئەھدە قىلىشتى. ئاندىن، داۋۇد ئورمانلىقتا قالدى، يوناتان بولسا ئۆز ئۆيىگە قايتىپ كەتتى.

‏19 شۇنىڭدىن كېيىن، زىفلىكلەر گىبېئادىكى سائۇلنىڭ يېنىغا كېلىپ: «بىلەمسەن، داۋۇد ساينىڭ جەنۇب تەرىپىدىكى خاكىلا ئېگىزلىكىدە، بىز تەرەپتىكى ئورمانلىقتىكى پاناھگاھلاردا يوشۇرۇنۇۋالدى. ‏20 ئەمدى ئەي پادىشاھ، قاچان خالىساڭ، چۈشۈپ كەلگىن. بىز ئۇنى پادىشاھنىڭ قولىغا تاپشۇرۇپ بېرىمىز» دېدى. ‏21 سائۇل: «ماڭا كۆڭۈل بۆلگىنىڭلار ئۈچۈن، پەرۋەردىگار سىلەرگە بەرىكەت ئاتا قىلغاي. ‏22 بېرىڭلار، ئۇنىڭ قايسى يەردە تۇرىدىغانلىقىنى، كىمنىڭ ئۇنى كۆرگەنلىكىنى، تولۇق ئېنىقلاڭلار. ماڭا دېيىلىشىچە، ئۇ ئىنتايىن ھوشيارمىش. ‏23 ئۇنىڭ يوشۇرۇنىدىغان ھەممە جايلىرىنى ئېنىقلاپ، ماڭا كېلىپ ئېنىق مەلۇمات بېرىڭلار. مەن سىلەر بىلەن بىللە ئۇ يەرگە بارىمەن. ئەگەركى ئۇ شۇ زېمىندا بولسىلا، پۈتكۈل يەھۇدانىڭ مىڭلىرىنىڭ ئارىسىدىن ئۇنى تېپىپ چىقىمەن» دېدى. ‏24 ئاندىن ئۇلار چىقىپ، سائۇلدىن ئىلگىرى زىفكە باردى. داۋۇد بولسا ئۆز ئادەملىرى بىلەن ساينىڭ جەنۇب تەرىپىدە مائون چۆلىدە، ئارابا تۈزلەڭلىكىدە ئىدى.

‏25 سائۇل ۋە ئۇنىڭ ئادەملىرى داۋۇدنى ئىزدىگىلى باردى. داۋۇد بۇنىڭدىن خەۋەر تېپىپ، قورام تاشتىن چۈشۈپ، مائون چۆلىگە بېرىپ شۇ يەردە تۇردى. سائۇل بۇنى ئاڭلاپ، داۋۇدنىڭ كەينىدىن قوغلاپ، مائوننىڭ چۆلىگە باردى. ‏26 سائۇل تاغنىڭ بۇ تەرىپىدە، داۋۇد بولسا ئادەملىرى بىلەن تاغنىڭ ئۇ تەرىپىدە ئىدى. داۋۇد سائۇلدىن قۇتۇلۇشقا ئالدىراۋاتاتتى. سائۇل ۋە ئۇنىڭ ئادەملىرى بولسا داۋۇد ۋە ئۇنىڭ ئادەملىرىنى قورشىۋېلىپ، ئۇلارنى تۇتماقچى بولۇشتى. ‏27 لېكىن سائۇلنىڭ بىر خەۋەرچىسى يېتىپ كېلىپ: «تېز كەل! فىلىستىنلەر زېمىنىمىزغا بۆسۈپ كىردى» دېدى. ‏28 شۇنىڭ بىلەن سائۇل داۋۇدنى قوغلاشتىن توھتاپ، قايتىپ فىلىستىنلەر بىلەن جەڭ قىلىشقا چىقتى. شۇنىڭ ئۈچۈن ئۇ يەر سېلا-ھامماھلىكوت دەپ ئاتالدى. ^■