‏1 ئاندىن كېيىن ئىسرائىلنىڭ ھەممە قەبىلىلىرى خېبرونغا داۋۇدنىڭ قېشىغا يىغىلىپ، ئۇنىڭغا مۇنداق دېدى: «مانا، بىز سېنىڭ سۆڭىكىڭ ۋە ئېتىڭدۇرمىز. ‏2 ئۆتكەن ۋاقىتتا سائۇل بىزگە ھۆكۈمرانلىق قىلغاندا چىقىش-كىرىشتە ئىسرائىلنىڭ باشلامچىسى سەن ئىدىڭ ۋە پەرۋەردىگار ساڭا: ‹مېنىڭ خەلقىم ئىسرائىلنىڭ پادىچىسى ۋە ئىسرائىلنىڭ ئەمىرى بولىسەن› دېگەنىدى».

‏3 ئىسرائىلنىڭ ھەممە ئاقساقاللىرى خېبرونغا پادىشاھنىڭ ھۇزۇرىغا كەلگەندە، داۋۇد پادىشاھ خېبروندا پەرۋەردىگارنىڭ ئالدىدا ئۇلار بىلەن ئەھدە تۈزدى. ئاندىن كېيىن ئۇلار داۋۇدنى ئىسرائىلغا پادىشاھ بولۇشقا مەسىھلىدى.

‏4 داۋۇد پادىشاھ بولغاندا ئوتتۇز ياشتا ئىدى. ئۇ قىرىق يىل ھۆكۈمرانلىق قىلدى. ‏5 خېبروندا يەھۇداغا يەتتە يىل ئالتە ئاي ھۆكۈمرانلىق قىلىپ، يېرۇسالېمدا پۈتۈن ئىسرائىل بىلەن يەھۇداغا ئوتتۇز ئۈچ يىل ھۆكۈمرانلىق قىلدى.

‏6 پادىشاھ ئۆز ئادەملىرى بىلەن يېرۇسالېمغا چىقىپ، ئۇ يەردە تۇرغان يەبۇسىيلار بىلەن جەڭ قىلدى. ئۇلار داۋۇدنىڭ ئۇ يەرگە ھەرگىز كىرەلمەيدىغانلىقىنى ئويلاپ، ئۇنىڭغا: «سەن بۇ يەرگە كىرەلمەيسەن. ھەتتا قور ۋە ئاقساقلارمۇ سېنى توسالايدۇ» دېدى. ‏7 لېكىن داۋۇد سىئون قورغىنىنى ئالدى. بۇ قورغان «داۋۇدنىڭ شەھىرى» دەپ ئاتىلىدۇ. ‏8 داۋۇد ئۇ كۈنى: «كىمكى يەبۇسىيلارغا ھۇجۇم قىلماقچى بولسا، سۈڭگۈچ بىلەن چىقىپ، داۋۇد يامان كۆرگەن بۇ كور ۋە ئاقساقلارنى ئۆلتۈرسۇن» دېدى. شۇنىڭ ئۈچۈن: «كور ۋە ئاقساق ئۆيگە كىرمىسۇن» دېگەن گەپ پەيدا بولغان.

‏9 ئاندىن داۋۇد قورغاندا تۇرۇپ، ئۇنى داۋۇدنىڭ شەھىرى دەپ ئاتاپ، چۆرىسىدە مىللو قەلەئسىدىن تارتىپ ئىچ تەرىپىگىچە ئىمارەت سالدى. ^■   ‏10 داۋۇد بارغانسېرى كۈچەيدى ۋە ساماۋى قوشۇنلارنىڭ سەردارى پەرۋەردىگار خۇدا ئۇنىڭ بىلەن ئىدى.

‏11 تىرنىڭ پادىشاھى خىرام داۋۇدنىڭ يېنىغا ئەلچىلەرنى ۋە ئۇلار بىلەن بىرگە كېدىر ياغاچلىرى، ياغاچچىلار ۋە تاشچىلارنىمۇ ئەۋەتتى. بۇلار داۋۇدقا بىر ئوردا ياساپ بەردى. ‏12 داۋۇد: «پەرۋەردىگار مېنى پادىشاھ قىلىپ تىكلەپ، ئۆز خەلقى ئىسرائىل ئۈچۈن مېنىڭ پادىشاھلىقىمنى ئۇلۇغلاندۇردى» دەپ ئۇقتى.

‏13 داۋۇد خېبروندىن كەلگەندىن كېيىن يېرۇسالېمدا يەنە كېنىزەكلەر ۋە خوتۇنلار ئالدى ۋە ئۇ يەردە داۋۇد يەنە ئوغۇل-قىز پەرزەنت كۆردى. ‏14 ئۇنىڭ يېرۇسالېمدا تۇغۇلغان پەرزەنتلىرىنىڭ ئىسىملىرى: شامۇئا، شوباب، ناتان، سۇلايمان، ‏15 يىبخار، ئەلىشۇئا، نېفەگ، يافىيا، ‏16 ئەلىشاما، ئەليادا ۋە ئەلىفېلەت ئىدى.

‏17 فىلىستىنلەر داۋۇدنىڭ ئىسرائىلغا پادىشاھ بولۇشقا مەسىھلەنگىنىنى ئاڭلىغاندا فىلىستىنلەرنىڭ ھەممىسى داۋۇدنى تۇتقىلى چىقتى. داۋۇد بۇنى ئاڭلىغاندا تاغدىكى پاناھگاھقا چۈشتى. ‏18 فىلىستىنلەر كېلىپ، رېفائىم ۋادىسىغا يېيىلدى. ‏19 داۋۇد پەرۋەردىگاردىن: «فىلىستىنلەرگە قارشى چىقايمۇ؟ ئۇلارنى قولۇمغا تاپشۇرامسەن؟» دەپ سورىدى. پەرۋەردىگار داۋۇدقا: «چىققىن! فىلىستىنلەرنى چوقۇم سېنىڭ قولۇڭغا تاپشۇرىمەن» دېدى. ‏20 شۇنىڭ بىلەن داۋۇد بائال-پەرازىمغا باردى. ئۇ يەردە داۋۇد ئۇلارنى مەغلۇپ قىلىپ: «مانا، پەرۋەردىگار ئالدىمدا كەلكۈندەك بۆسۈپ ئۆتۈپ دۈشمەنلىرىمنى باستى» دېدى. شۇنىڭ ئۈچۈن داۋۇد ئۇ يەرنى بائال-پەرازىم دەپ ئاتىدى. ^■   ‏21 فىلىستىنلەر ئۇ يەردە ئۆز بۇتلىرىنى تاشلاپ قاچقانىدى. داۋۇد ۋە ئۇنىڭ ئادەملىرى ئۇلارنى ئېلىپ كەتتى.

‏22 لېكىن فىلىستىنلەر يەنە چىقىپ، رېفائىم ۋادىسىغا يېيىلدى. ‏23 داۋۇد پەرۋەردىگاردىن سورىغاندا پەرۋەردىگار ئۇنىڭغا: «سەن ئۇ يەرگە چىقماي، بەلكى ئۇلارنىڭ كەينىدىن ئايلىنىپ ئۆتۈپ، ئۈجمە دەرەخلىرىنىڭ ئۇدۇلىدىكى يەردىن ھۇجۇم قىلغىن. ‏24 ئۈجمە دەرەخلىرىنىڭ تۆپىسىدىن ئاياغ تىۋىشلىرىنى ئاڭلىغىنىڭدا ئۇدۇل ماڭغىن، چۈنكى شۇ چاغدا پەرۋەردىگار فىلىستىنلەرنىڭ قوشۇنىنى ئۇرغىلى ئالدىڭدا ماڭىدۇ» دېدى. ‏25 داۋۇد پەرۋەردىگار ئۇنىڭغا بۇيرۇغاندەك قىلىپ، فىلىستىنلەرنى گېبادىن گېزەرگىچە قوغلاپ قىر-چاپ قىلدى.