داۋۇدنىڭ ئاخىرقى سۆزلىرى
23
1 تۆۋەندىكىلەر داۋۇدنىڭ ئاخىرقى سۆزلىرىدۇر: «ياقۇبنىڭ خۇداسى تەرىپىدىن مەسىھلىنىپ يۇقىرى كۆتۈرۈلگەن، ئىسرائىلنىڭ سۆيۈملۈك مەدھىيە ناخشىچىسى ئاتالغان، يىشاينىڭ ئوغلى بولغان داۋۇد مۇنداق دەيدۇ:
2 پەرۋەردىگارنىڭ روھى مەن ئارقىلىق سۆز قىلدى،
ئۇنىڭ كالامى تىلىمدىدۇر.
3 ئىسرائىلنىڭ خۇداسى سۆز قىلدى،
ئىسرائىلنىڭ قورام تېشى ماڭا شۇنداق دېدى:
‹ئادەملەرنىڭ ئۈستىدىن ئادالەت بىلەن ھۆكۈمرانلىق قىلغۇچى،
خۇدادىن قورقۇپ ھۆكۈم سۈرگۈچى،
4 تاڭ سەھەردىكى كۆتۈرۈلگەن قۇياشنىڭ نۇرىدەك،
بۇلۇتسىز سەھەردە ئوت-چۆپلەرنى يورۇتىدىغان،
يامغۇردىن كېيىن ئۇلارنى ئۈندۈرىدىغان ئاپتاپتەك بولىدۇ›.
5 مېنىڭ جەمەتىم خۇدانىڭ ئالدىدا شۇنداق ئەمەسمۇ؟
ئۇ مەن بىلەن ئىچىدە ھەممە نەرسە بېكىتىلگەن،
مەزمۇت تۇرىدىغان بىر مەڭگۈلۈك ئەھدە تۈزمىگەنمۇ؟
ئۇ ماڭا تولۇق نىجات يەتكۈزۈپ،
ھەممە ئارزۇ-ئارمانلىرىمنى ئەمەلگە ئاشۇرمامدۇ؟
6 لېكىن يارىماس ئادەملەر بولسا،
ھېچكىم قولىدا تۇتۇشنى خالىماي،
تاشلىۋەتكەن تىكەندەك بولىدۇ.
7 ئۇلارغا قول تەگكۈزۈشى كېرەك بولغان كىشى
تۆمۈر قورال ياكى نەيزە سېپىنى ئىشلىتىدۇ.
ئۇلار تۇرغان يېرىدە ئوتتا كۆيدۈرۈۋېتىلىدۇ».
داۋۇدنىڭ پالۋانلىرى
8 داۋۇدنىڭ پالۋانلىرىنىڭ ئىسىملىرى تۆۋەندىكىچە: تاخكىمونلۇق يوشەب-باسشەبەت سەردارلارنىڭ بېشى ئىدى. ئۇ نەيزىسىنى ئوينىتىپ، بىر زەربىدە سەككىز يۈز كىشىنى ئۆلتۈرگەنىدى. 9 كېيىنكىسى ئاخوئاخنىڭ ئەۋلادلىرىدىن بولغان دودونىڭ ئوغلى ئەلىئازار ئىدى. جەڭگە جەم بولغان فىلىستىنلەر ھاقارەت قىلغىنىدا، داۋۇد بىلەن بىللە بولغان ئۈچ پالۋاننىڭ بىرى ئۇ ئىدى. ئىسرائىلنىڭ ئادەملىرى چېكىنگەندە، 10 ئۇ توختاپ تۇرۇپ، قولى تېلىپ قىلىچقا چاپلىشىپ قالغۇچە فىلىستىنلەرنى قىردى. پەرۋەردىگار ئۇ كۈنى چوڭ بىر نۇسرەت بەردى. خەلق ئۇنىڭ كەينىگە قايتىپ كەلگەندە بۇلاڭ-تالاڭ قىلىشتىن باشقا ئىش قالمىغانىدى. 11 ئۇنىڭدىن كېيىنكىسى ھارارلىق ئاگەنىڭ ئوغلى شامما ئىدى. بىر قېتىم فىلىستىنلەر لېخىدا يىغىلغانىدى. ئۇ يەردە بىر پۇرچاق ئېتىزلىقى بار ئىدى. خەلق فىلىستىنلەرنىڭ ئالدىدىن قاچقاندا، 12 ئۇ پۇرچاقلىقنىڭ ئوتتۇرىسىدا تۇرۇپ، ئۇنى قوغداپ، فىلىستىنلەرنى مەغلۇپ قىلدى. پەرۋەردىگار چوڭ بىر نۇسرەت بەردى.
13 ئوتتۇز سەرداردىن ئۈچ سەردار ئورما ۋاقتىدا، ئادۇللام غارىدا تۇرغان داۋۇدنىڭ يېنىغا كەلدى. ئۇ چاغدا فىلىستىنلەرنىڭ بىر قوشۇنى رېفائىم ۋادىسىدا بارگاھ قۇرغانىدى. 14 داۋۇد قورغاندا ئىدى، لېكىن بەيتلەھەمدە فىلىستىنلەرنىڭ بىر قاراۋۇل قىسمى جايلاشقان ئىدى. 15 داۋۇد چاڭقاپ: «كاشكى بەيتلەھەمنىڭ دەرۋازىسىنىڭ يېنىدىكى قۇدۇقتىن بىرى ماڭا ئىچكىلى سۇ ئېلىپ كەلسە ئىدى» دېدى. 16 شۇنىڭ بىلەن بۇ ئۈچ پالۋان فىلىستىنلەرنىڭ بارگاھىدىن بۆسۈپ ئۆتۈپ، بەيتلەھەمنىڭ دەرۋازىسىنىڭ يېنىدىكى قۇدۇقتىن سۇ تارتىپ داۋۇدقا ئېلىپ كەلدى. لېكىن داۋۇد سۇنى ئىچىشنى خالىماي: «پەرۋەردىگارغا ھەدىيە» دەپ تۆكۈۋەتتى. 17 ئۇ: «ئەي پەرۋەردىگار، مۇنداق ھەرگىز قىلمايمەن. بۇ سۇ ئۆز جانلىرىنى خەتەرگە سېلىپ بارغان كىشىلەرنىڭ قېنىدەك قەدىرلەش كېرەك ئەمەسمۇ؟» دەپ، سۇنى ئىچكىلى ئۇنىمىدى. بۇ ئۈچ پالۋان مانا شۇ ئىشلارنى قىلغانىدى.
18 زېرۇيانىڭ ئوغلى يوئابنىڭ ئاكىسى ئابىشاي بۇ ئۈچىنىڭ بېشى ئىدى. ئۇ نەيزىسىنى ئوينىتىپ، ئۈچ يۈز كىشىنى ئۆلتۈردى. بۇ ئۈچىنىڭ ئارىسىدا ئۇ نامدار ئىدى. 19 ئۇ بۇ ئۈچىنىڭ ئىچىدە ئەڭ داڭلىقى بولۇپ، ئۇلارنىڭ بېشى بولسىمۇ، ئاۋۋالقى ئۈچ پالۋانغا تەڭ كەلمەس ئىدى.
20 قابسەئەللىك يەھويادانىڭ ئوغلى بەنايا باتۇر جەڭچى ئىدى. ئۇ چوڭ ئىشلارنى قىلدى. ئۇ موئابلارنىڭ ئىككى شىردەك پالۋانلىرىنى ئۆلتۈردى. يەنە قار ياغقان بىر كۈنى ئورىغا چۈشۈپ، بىر شىرنى ئۆلتۈردى. 21 ئۇ يەنە تۇرقى ھەيۋەتلىك بىر مىسىرلىقنى ئۆلتۈردى. مىسىرلىقنىڭ قولىدا بىر نەيزە بار ئىدى. لېكىن ئۇ بىر ھاسا تۇتۇپ ئۇنىڭ يېنىغا چۈشتى. ئۇ مىسىرلىقنىڭ قولىدىن نەيزىنى تارتىۋېلىپ، ئۆز نەيزىسى بىلەن ئۇنى ئۆلتۈردى. 22 يەھويادانىڭ ئوغلى بەنايا بۇ قىلغان ئىشلار بىلەن، ئۈچ پالۋان ئارىسىدا نام چىقاردى. 23 ئۇ ئوتتۇز سەردارنىڭ ئىچىدە ئەڭ داڭلىقى ئىدى، لېكىن ئاۋۋالقى ئۈچ پالۋانغا تەڭ كەلمەس ئىدى. داۋۇد ئۇنى ياساۋۇللىرىنىڭ باشلىقى قىلدى.
24 ئوتتۇزلارنىڭ ئارىسىدا يوئابنىڭ ئۇكىسى ئاسائەل ۋە بەيتلەھەملىك دودونىڭ ئوغلى ئەلخانان بار ئىدى. 25 بۇنىڭدىن باشقا: خارودلۇق شامما، خارودلۇق ئەلىقا، 26 پالتىلىق خېلەز، تەقوئالىق ئىققەشنىڭ ئوغلى ئىرا، 27 ئاناتوتلۇق ئابىئېزەر، خۇشاتلىق مەبۇنناي، 28 ئاخوخلۇق زالمون، نەتوفاتلىق ماھاراي، 29 نەتوفاتلىق بائانانىڭ ئوغلى خېلەب، بەنيامىن قەبىلىسىنىڭ زېمىنىدىكى گىبېئادىن بولغان رىباينىڭ ئوغلى ئىتتاي، 30 پىراتونلۇق بەنايا، گائاش ۋادىلىرىدىن بولغان ھىدداي، 31 ئارباتلىق ئابىئالبون، بارخۇملۇق ئازماۋەت، 32 شائالبونلۇق ئەلياخبا، ياشەننىڭ ئەۋلادلىرىدىن بولغان يوناتان، 33 ھارارلىق شامما، ھارارلىق شارارنىڭ ئوغلى ئاخىيام، 34 مائاكالىق ئاخاسباينىڭ ئوغلى ئەلىفېلەت، گىلونلۇق ئاخىتوفەلنىڭ ئوغلى ئەلىئام، 35 كارمەللىك خەزرو، ئاربىلىق پائاراي، 36 زوبادىن بولغان ناتاننىڭ ئوغلى يىگال، گادلىق بانى، 37 ئاممونىيلاردىن بولغان زەلەك، زېرۇيانىڭ ئوغلى يوئابنىڭ ياراغ كۆتۈرگۈچىسى بولغان بەئەروتلۇق ناخاراي، 38 يىترىلىق ئىرا، يىترىلىق گارەب 39 ۋە ھېتىتلاردىن بولغان ئۇرىيا. ئۇلارنىڭ ھەممىسى ئوتتۇز يەتتە كىشى ئىدى.