‏1 سۇلايمان پادىشاھ فىرئەۋننىڭ قىزىدىن باشقا يەنە كۆپ يات خەلقلاردىن بولغان ئاياللارغا، يەنى موئابىيلاردىن، ئاممونىيلاردىن، ئېدومىيلاردىن، سىدونلۇقلاردىن ۋە ھېتىتلاردىن بولغان ئاياللارغا ئاشىق بولدى. ‏2 پەرۋەردىگار بۇ خەلقلەر توغرىسىدا بەنى ئىسرائىلغا: «سىلەر ئۇلار بىلەن قۇدا-باجا بولماڭلار. چۈنكى ئۇلار شەكسىز سىلەرنى ئازدۇرۇپ، كۆڭۈللىرىڭلارنى ئۆز ئىلاھلىرىغا مايىل قىلىپ ئەگەشتۈرىدۇ» دېگەنىدى. لېكىن سۇلايمان شۇ خەلقلەردىن بولغان ئاياللارغا مۇھەببەت باغلىدى.^■   ‏3 ئۇنىڭ يەتتە يۈز ئايالى، يەنى خانىشى ۋە ئۈچ يۈز كېنىزىكى بار ئىدى. ئەمما بۇ ئاياللىرى ئۇنىڭ كۆڭلىنى ئازدۇردى. ‏4 سۇلايمان قېرىغاندا ئاياللىرى ئۇنىڭ كۆڭلىنى ئازدۇرۇپ باشقا ئىلاھلارغا مايىل قىلدى. شۇنداقكى، ئۇنىڭ كۆڭلى ئاتىسى داۋۇدنىڭ كۆڭلىدەك ئۆز خۇداسى پەرۋەردىگارغا سادىق ئەمەس ئىدى. ‏5 شۇڭا سۇلايمان سىدونلۇقلارنىڭ مەبۇدىسى ئاشتاروتقا ۋە ئاممونىيلارنىڭ يىرگىنچلىك مەبۇدى مىلكومغا ئەگەشتى. ‏6 شۇنداق قىلىپ، سۇلايمان پەرۋەردىگارنىڭ نەزىرىدە يامان بولغان ئىشلارنى قىلىپ، ئاتىسى داۋۇدتەك پەرۋەردىگارغا پۈتۈن كۆڭۈل بىلەن ئەگەشمىدى. ‏7 ئاندىن سۇلايمان موئابىيلارنىڭ يىرگىنچلىك بۇتى كېموش ئۈچۈن يېرۇسالېمنىڭ ئۇدۇلىدىكى تاغنىڭ ئۈستىدە، ئېگىز جايغا سەجدىگاھنى سېلىپ، ئاممونىيلارنىڭ يىرگىنچلىك بۇتى مولەك ئۈچۈنمۇ بىرىنى ياساپ سالدى. ‏8 شۇنىڭدەك ئۇ ئۆزىنىڭ ئىلاھلىرىغا خۇشبۇي ئىسرىق كۆيدۈرۈپ، قۇربانلىق قىلىدىغان ھەممە يات ئەللىك ئاياللىرى ئۈچۈن شۇنداق قىلدى.

‏9 ئىسرائىلنىڭ خۇداسى پەرۋەردىگار سۇلايمانغا ئۆزىنى ئىككى قېتىم ئايان قىلغان بولسىمۇ، سۇلايماننىڭ كۆڭلى ئۇنىڭدىن يىراقلىشىپ كەتتى. شۇنىڭ ئۈچۈن پەرۋەردىگارنىڭ ئۇنىڭغا غەزىپى قوزغالدى. ‏10 پەرۋەردىگار بۇ ئىشلار توغرىسىدا ئۇنىڭغا: «باشقا ئىلاھلارغا ئەگەشمىگىن» دەپ ئەمر قىلغانىدى. لېكىن ئۇ خۇدا ئۇنىڭغا بۇيرۇغىنىغا ئەمەل قىلمىدى. ‏11 شۇنىڭ ئۈچۈن پەرۋەردىگار سۇلايمانغا مۇنداق دېدى: «سەن شۇنداق قىلىپ، مەن ساڭا بەرگەن ئەھدەم ۋە قانۇن-بەلگىلىمىلىرىمنى تۇتمىغىنىڭ ئۈچۈن پادىشاھلىقنى چوقۇم سەندىن تارتىۋېلىپ، خىزمەتكارىڭغا بېرىمەن. ‏12 لېكىن ئاتاڭ داۋۇدنىڭ خاتىرىسىنى قىلىپ، سېنىڭ كۈنلىرىڭدە تېخى بۇ ئىشنى قىلمايمەن، ئەمما ئوغلۇڭنىڭ قولىدىن ئۇنى تارتىۋالىمەن. ‏13 لېكىن پۈتۈن پادىشاھلىقنى ئۇنىڭدىن تارتمايمەن، بەلكى داۋۇدنىڭ خاتىرىسىنى قىلىپ، زۈم تاللىغان يېرۇسالېم ئۈچۈن سېنىڭ ئوغلۇڭغا بىر قەبىلىنى قالدۇرىمەن».

‏14 پەرۋەردىگار سۇلايمانغا قارشى بىر دۈشمەننى، يەنى ئېدوملۇق ھادادنى قوزغىدى. ئۇ كىشى ئېدوم پادىشاھىنىڭ نەسلىدىن ئىدى. ‏15 داۋۇد ئېدوم بىلەن جەڭ قىلغان ۋاقتىدا قوشۇننىڭ سەردارى يوئاب ئۆلتۈرۈلگەنلەرنى كۆمۈپ قويغىلى چىقىپ، ئېدومنىڭ ھەممە ئەر كىشىلىرىنى يوقاتقانىدى. ‏16 يوئاب ۋە ئۇنىڭ بىلەن بىللە بولغان پۈتۈن ئىسرائىلنىڭ قوشۇنى ئېدومدىكى ھەممە ئەر كىشىلەرنى يوقاتقۇچە ئۇ يەردە ئالتە ئاي تۇرغانىدى. ‏17 ئۇ ۋاقىتتا ھاداد ئاتىسىنىڭ خىزمىتىدە بولغان بىرنەچچە ئېدومىي كىشى بىلەن بىللە قېچىپ، مىسىرغا باردى. ھاداد ئۇ چاغدا كىچىك بالا ئىدى. ‏18 ئۇلار مىدىياندىن چىقىپ پارانغا كېلىپ، پاراندىن بىرنەچچە ئادەمنى ئېلىپ، مىسىرغا، مىسىرنىڭ پادىشاھى فىرئەۋننىڭ قېشىغا كەلدى. فىرئاۋن ئۇنىڭغا بىر ئۆي بەردى ۋە ئۇنى ئوزۇق-تۈلۈك بىلەن تەمىنلەپ تۇردى. ئۇ بىر پارچە يەرنىمۇ ئۇنىڭغا سوۋغا قىلىپ بەردى. ‏19 ھاداد فىرئەۋننىڭ كۆزىدە ئىلتىپات تاپقاچقا، ئۇ خوتۇنىنىڭ سىڭلىسىنى، يەنى خانىش تاخپەنەسنىڭ سىڭلىسىنى ئۇنىڭغا خوتۇن قىلىپ بەردى. ‏20 تاخپەنەسنىڭ سىڭلىسى ئۇنىڭغا ئوغلى گېنۇباتنى تۇغۇپ بەردى. تاخپەنەس ئۆزى فىرئەۋننىڭ ئوردىسىدا ئۇنى چوڭ قىلدى. گېنۇبات فىرئەۋننىڭ ئوغۇللىرى بىلەن بىللە فىرئەۋننىڭ ئۆيىدە تۇراتتى.

‏21 ھاداد مىسىردا: «داۋۇد ئاتا-بوۋىلىرىنىڭ قېشىدا راھەت تېپىپ، قوشۇننىڭ سەردارى يوئابمۇ ئۆلدى» دەپ ئاڭلىغاندا، ئۇ فىرئەۋنگە: «مېنىڭ ئۆز يۇرتۇمغا قايتىشىمغا ئىجازەت بەرگەيسەن» دەپ سورىدى. ‏22 لېكىن فىرئەۋن ئۇنىڭغا «مېنىڭ قېشىمدا ساڭا نېمە كەم بولۇپ قالدىكى، ئۆز يۇرتۇڭغا قايتىشنى خالايسەن؟» ئۇ جاۋاب بېرىپ: «ھېچ نەرسە كەم قالمىدى. ھەرقانداق بولسۇن، مېنى قويۇپ بەرگەيسەن» دېدى.

‏23 خۇدا سۇلايمانغا قارشى يەنە بىر دۈشمەننى، يەنى ئۆز خوجىسى بولغان زوبانىڭ پادىشاھى ھادادەزەردىن قېچىپ كەتكەن ئەليادانىڭ ئوغلى رەزوننى قوزغىدى. ‏24 داۋۇد زوبالىقلارنى مەغلۇپ قىلغاندا رەزون بىر تۈركۈم ئادەمنى توپلاپ، ئۇلارنىڭ سەردارى بولدى. كېيىن ئۇلار دەمەشققە بېرىپ، ئۇ يەردە ماكان تۇتۇپ، دەمەشقتە ھۆكۈمرانلىق ئورناتتى. ‏25 رەزون سۇلايماننىڭ ھەممە كۈنلىرىدە ئىسرائىلنىڭ دۈشمىنى بولۇپ، ھادادتەك يامانلىق قىلاتتى. ئۇ ئارامغا پادىشاھ بولۇپ، ئىسرائىلنى ئۆچ كۆرەتتى.

‏26 سۇلايماننىڭ يەروبېئام ئىسىملىك بىر خىزمەتكارى بار ئىدى. ئۇ زەرەدادىن كەلگەن ئەفرائىم قەبىلىسىدىن بولغان نەباتنىڭ ئوغلى ئىدى، ئۇنىڭ ئانىسى بىر تۇل ئايال بولۇپ، ئىسمى زەرۇئا ئىدى. يەروبېئام پادىشاھقا قارشى ئىسيان كۆتۈردى. ‏27 ئۇنىڭ پادىشاھقا قارشى ئىسيان كۆتۈرۈشىنىڭ سەۋەبى مۇنداق ئىدى: سۇلايمان مىللو قەلئەسىنى ياساپ، ئاتىسى داۋۇدنىڭ شەھىرىنىڭ خاراب يەرلىرىنى ئوڭلىتىۋاتاتتى. ‏28 يەروبېئام قابىل كىشى ئىدى. سۇلايمان ئۇنىڭ چاققان يىگىت ئىكەنلىكىنى كۆرۈپ، ئۇنى يۈسۈپ جەمەتىگە بۇيرۇلغان قۇرۇلۇش ئىشلارنى باشقۇرۇشقا قويدى. ‏29 شۇ كۈنلەردە يەروبېئام يېرۇسالېمدىن چىقىۋاتقاندا شىلوھلۇق ئاخىيا پەيغەمبەر ئۇنىڭغا يولدا ئۇچرىدى. ئۇ بىر يېڭى توننى كىيىۋالگەنىدى. ئىككىسى دالادا يالغۇز بولغاندا، ‏30 ئاخىيا ئۆزى كىيگەن توننى ئېلىپ، يىرتىپ ئون ئىككى پارچە قىلىپ، ‏31 يەروبېئامغا مۇنداق دېدى: «ئۆزۈڭ ئۈچۈن ئون پارچىنى ئالغىن، چۈنكى ئىسرائىلنىڭ خۇداسى پەرۋەردىگار مۇنداق دەيدۇ: ‹مانا، پادىشاھلىقنى سۇلايماننىڭ قولىدىن تارتىۋېلىپ، ئون قەبىلىنى ساڭا بېرىمەن. ‏32 بىر قەبىلە خىزمەتكارىم داۋۇدنىڭ خاتىرىسى ئۈچۈن ۋە مەن ھەممە ئىسرائىلنىڭ قەبىلىلىرىدىن تاللىغان يېرۇسالېم شەھىرى ئۈچۈن ئۇنىڭغا قالىدۇ. ‏33 ئۇلار مېنى تاشلاپ سىدونلۇقلارنىڭ ئايال مەبۇدى ئاشتاروتقا، موئابىيلارنىڭ بۇتى كېموشقا ۋە ئاممونىيلارنىڭ بۇتى مىلكومغا چوقۇنۇپ، ئۇنىڭ ئاتىسى داۋۇدتەك مېنىڭ قانۇن-بەلگىلىمىلىرىم بىلەن ئەھكاملىرىمغا ئەمەل قىلمىغىنى، مېنىڭ يوللىرىمدا ماڭمىغىنى ۋە مېنىڭ نەزىرىمدىكى توغرا ئىشلارنى قىلمىغىنى ئۈچۈن شۇنداق بولىدۇ. ‏34 لېكىن پادىشاھلىقنى ئۇنىڭدىن تارتىۋالماي، ئۇنىڭ قولىدا پۈتۈن قالدۇرىمەن. مەن ئۆزۈم تاللىغان خىزمەتكارىم داۋۇدنىڭ خاتىرىسىنى قىلىپ، ئۇنى ئۆمرىنىڭ ھەممە كۈنلىرىدە ھۆكۈمرانلىق قىلغۇچى قىلىپ قالدۇرىمەن، چۈنكى داۋۇد مېنىڭ ئەمرلىرىم ۋە قانۇن-بەلگىلىمىلىرىمگە ئەمەل قىلغان. ‏35 ئەمما ئۇنىڭ ئوغلىنىڭ قولىدىن پادىشاھلىقنى تارتىۋېلىپ، ئۇنىڭدىن ئون قەبىلىنى ساڭا بېرىمەن. ‏36 لېكىن مېنىڭ نامىمنى ئۇ يەردە تىكلەش ئۈچۈن ئۆزۈم تاللىغان يېرۇسالېم شەھىرىدە مېنىڭ ئالدىمدا خىزمەتكارىم داۋۇدنىڭ چىرىغى ئۆچۈرۈلمىسۇن دەپ، ئۇنىڭ ئوغلىغا بىر قەبىلىنى بېرىمەن. ‏37 مەن سېنى، ھەممە خالىغىنىڭنىڭ ئۈستىدىن ھۆكۈمرانلىق قىلىسەن دەپ، ئىسرائىلغا پادىشاھ بولۇشقا تاللىدىم. ‏38 ئەگەر سەن ھەممە بۇيرۇغىنىمنى ئاڭلاپ، مېنىڭ يوللىرىمدا مېڭىپ، نەزىرىمدىكى توغرا ئىشلارنى قىلىپ، خىزمەتكارىم داۋۇد قىلغاندەك، مېنىڭ قانۇن-بەلگىلىمىلىرىم ۋە ئەمرلىرىمگە رىئايە قىلساڭ، مەن ساڭا يار بولۇپ، داۋۇدقا بىر خانىدانلىق قۇرغىنىمدەك، ساڭا مەزمۇت بىر خانىدانلىق قۇرۇپ، ساڭا ئىسرائىلنى تەقدىم قىلىمەن. ‏39 مەن داۋۇدنىڭ نەسلىنى شۇ ئىشلار تۈپەيلىدىن پەسلىتىمەن، لېكىن مەڭگۈگە ئەمەس›».

‏40 شۇنىڭ ئۈچۈن سۇلايمان يەروبېئامنى ئۆلتۈرگىلى پۇرسەت ئىزدەيتتى. لېكىن يەروبېئام قوپۇپ مىسىرغا قېچىپ، مىسىرنىڭ پادىشاھى شىشاقنىڭ قېشىغا باردى. سۇلايمان ئۆلگۈچە ئۇ مىسىردا قالدى.

‏41 سۇلايماننىڭ ھاياتىدىكى باشقا ۋەقەلەر، ئۇنىڭ ھەممە ئىش-پائالىيەتلىرى ۋە ئۇنىڭ ھېكمىتى بولسا «سۇلايمان تەزكىرىسى» دېگەن كىتابتا پۈتۈلگەندۇر. ‏42 سۇلايماننىڭ يېرۇسالېمدا ئىسرائىلغا ھۆكۈمرانلىق قىلغان ۋاقتى قىرىق يىل ئىدى. ‏43 سۇلايمان ئاتا-بوۋىلىرىنىڭ قېشىدا راھەت تېپىپ، ئاتىسى داۋۇدنىڭ شەھىرىدە دەپنە قىلىندى. ئوغلى رېھابېئام ئۇنىڭ ئورنىغا تەختكە چىقتى.