‏1 يەروبېئام خۇشبۇي ئىسرىقنى كۆيدۈرگىلى قۇربانلىق سۇپىسىنىڭ ئالدىدا تۇرغاندا، مانا، پەرۋەردىگارنىڭ بۇيرۇقى بىلەن خۇدانىڭ بىر ئادىمى يەھۇدادىن بەيتەلگە كېلىپ، ‏2 قۇربانلىق سۇپىسىغا يۈزلىنىپ، خۇدانىڭ بۇيرۇقى بىلەن ئۈنلۈك ئاۋازدا: «ئەي قۇربانلىق سۇپىسى، ئەي قۇربانلىق سۇپىسى، پەرۋەردىگار مۇنداق دەيدۇ: ‹مانا، داۋۇد جەمەتىدە يوشىيا ئىسىملىك بىر ئوغۇل تۇغۇلىدۇ. ئۇ سېنىڭ ئۈستۈڭدە خۇشبۇي ئىسرىق كۆيدۈرگەن، تۆپىلىكلەردىكى سەجدىگاھلاردا ھىزمەت قىلغان كاھىنلارنى ئۆلتۈرىدۇ. ئۇ چاغدا سېنىڭ ئۈستۈڭدە ئادەم سۆڭەكلىرى كۆيدۈرۈلىدۇ›» دەپ جاكارلىدى. ‏3 ئۇ ئەسنادا بىر مۆجىزىلىك ئالامەتنى بېشارەت قىلىپ: «پەرۋەردىگارنىڭ سۆز قىلغىنىنىڭ ئالامىتى مۇنداق: مانا، قۇربانلىق سۇپىسى يېرىلىپ ئۈستىدىكى كۈل تۆكۈلۈپ كېتىدۇ» دېدى.

‏4 يەروبېئام پادىشاھ خۇدانىڭ ئادىمى بەيتەلدىكى قۇربانلىق سۇپىسىغا قارشى جاكارلىغان سۆزنى ئاڭلىغاندا، قۇربانلىق سۇپىسىدا تۇرۇپ قولىنى سوزۇپ: «ئۇنى تۇتۇڭلار» دەپ بۇيرۇدى. لېكىن ئۇ ئۇنىڭ تەرىپىگە سوزغان قولى قېتىپ قېلىپ، ئۇنى يەنە يىغىۋالالمىدى. ‏5 ھەم خۇدانىڭ ئادىمى پەرۋەردىگارنىڭ بۇيرۇقى بىلەن ئېيتقان مۆجىزىلىك ئالامەت يۈز بېرىپ، قۇربانلىق سۇپىسى يېرىلىپ، كۈل تۆكۈلۈپ كەتتى. ‏6 پادىشاھ خۇدانىڭ ئادىمىگە: «پەرۋەردىگار خۇدايىڭغا مېنىڭ ھەققىمدە ئىلتىجا قىلغايسەنكى، قولۇمنى ئۆزۈمگە يىغىۋالىغايمەن» دەپ يالۋۇردى. خۇدانىڭ ئادىمى پەرۋەردىگارغا ئىلتىجا قىلسا، پادىشاھ قولىنى ئۆزىگە يەنە يىغىشى مۇمكىن بولدى ۋە قولى ئاۋۋالقىدەك بولدى. ‏7 پادىشاھ خۇدانىڭ ئادىمىگە: «مەن بىلەن ئۆيۈمگە بېرىپ، ئازراق قۇۋۋەتلەنگىن. مەن ساڭا بىر ئىنئام بېرەي» دېدى. ‏8 لېكىن خۇدانىڭ ئادىمى پادىشاھقا مۇنداق جاۋاب بەردى: «ئۆيۈڭنىڭ يېرىمىنى ماڭا بەرسەڭمۇ، مەن سەن بىلەن بارمايمەن ۋە بۇ يەردە نان يەپ سۇ ئىچمەيمەن. ‏9 چۈنكى پەرۋەردىگار ئۆز سۆزىنى يەتكۈزۈپ ماڭا: ‹سەن ئۇ يەردە ھەرگىز نان يېمەيسەن، سۇ ئىچمەيسەن ۋە كەلگەن يولۇڭ بىلەن قايتمايسەن› دەپ بۇيرۇغان». ‏10 شۇنىڭ بىلەن ئۇ بەيتەلگە كەلگەن يول بىلەن ئەمەس، باشقا يول بىلەن قايتتى.

‏11 لېكىن بەيتەلدە بىر ياشانغان پەيغەمبەر تۇراتتى. ئۇنىڭ ئوغۇللىرى كېلىپ، خۇدانىڭ ئادىمىنىڭ بەيتەلدە ئۇ كۈنى قىلغىنىنىڭ ھەممىسىنى ئۇنىڭغا سۆزلەپ بەردى. ئۇلار ئۇنىڭ پادىشاھقا قىلغان سۆزىنىمۇ ئاتىسىغا ئېيتىپ بەردى. ‏12 ئاتىسى ئۇلاردىن: «ئۇ قايسى يول بىلەن كەتتى؟» دەپ سورىدى. ئۇنىڭ ئوغۇللىرى بولسا خۇدانىڭ يەھۇدا زېمىنىدىن كەلگەن ئادىمىنىڭ قايسى يول بىلەن كەتكىنىنى كۆرگەنىدى. ‏13 پەيغەمبەر ئۆز ئوغۇللىرىغا: «ماڭا ئېشەكنى توقۇپ بېرىڭلار» دەپ بۇيرۇدى. ئۇلار ئۇنىڭغا ئېشەكنى توقۇپ بەرگەندە ئۇ ئۇنىڭغا مىنىپ، ‏14 خۇدانىڭ ئادىمىنىڭ كەينىدىن چىقىپ، ئۇنى بىر دۇب دەرىخىنىڭ تۈۋىدە ئولتۇرغان يېرىدىن تېپىپ، ئۇنىڭدىن: «يەھۇدا زېمىنىدىن كەلگەن خۇدانىڭ ئادىمى سەنمۇ؟» دەپ سورىدى. ئۇ كىشى: «مەن ئۇدۇرمەن» دەپ جاۋاب بەردى. ‏15 ئۇ ئۇنىڭغا: «مەن بىلەن ئۆيۈمگە بېرىپ، غىزالانغىن» دېدى. ‏16 ئۇ بولسا: «مەن سەن بىلەن قايتالمايمەن ۋە سېنىڭكىگە كىرەلمەيمەن، ھەم بۇ يەردە سەن بىلەن نان يەپ سۇ ئىچەلمەيمەن. ‏17 چۈنكى پەرۋەردىگارنىڭ سۆزى ماڭا كېلىپ، ئۇ ماڭا: ‹ئۇ يەردە ھەرگىز نان يەپ سۇ ئىچمايسەن ۋە كەلگەن يولۇڭ بىلەن قايتمايسەن› دېگەن» دېدى. ‏18 لېكىن قېرى پەيغەمبەر ئۇنىڭغا: «مەنمۇ سەندەك بىر پەيغەمبەردۇرمەن ۋە بىر پەرىشتە پەرۋەردىگارنىڭ سۆزىنى ماڭا يەتكۈزۈپ: ‹ئۇنى نان يېگۈزۈپ سۇ ئىچۈرگىلى ئۆزۈڭ بىلەن ئۆيۈڭگە قايتۇرۇپ ئېلىپ كەلگىن› دېگەن» دېدى. لېكىن ئۇ شۇنى دەپ، ئۇنىڭغا يالغان ئېيتتى. ‏19 شۇنىڭ بىلەن ئۇ ئۇنىڭ بىلەن قايتىپ، ئۇنىڭ ئۆيىدە نان يەپ سۇ ئىچتى.

‏20 لېكىن ئۇ داستىخاندا ئولتۇرغىنىدا پەرۋەردىگارنىڭ سۆزى ئۇنى يولدىن قايتۇرغان پەيغەمبەرگە كەلدى. ‏21 ئۇ يەھۇدا زېمىنىدىن كەلگەن خۇدانىڭ ئادىمىگە توۋلاپ: «پەرۋەردىگار مۇنداق دەيدۇ: ‹سەن پەرۋەردىگارنىڭ سۆزىگە قارشى چىقىپ، پەرۋەردىگار خۇدايىڭ ساڭا بۇيرۇغىنىغا بويسۇنماي، ‏22 بەلكى قايتىپ، پەرۋەردىگار سېنى نان يەپ سۇ ئىچكىلى مەنئى قىلغان يەردە نان يەپ سۇ ئىچكىنىڭ ئۈچۈن، سېنىڭ جەسىتىڭ ئاتا-بوۋىلىرىڭنىڭ قەبرىسىگە دەپنە قىلىنمايدۇ›» دېدى.

‏23 ئۇ نان يەپ سۇ ئىچىپ بولغاندا، بۇ كىشى ئۇنىڭغا، يەنى ئۆزى يولدىن قايتۇرغان پەيغەمبەرگە ئېشەكنى توقۇپ بەردى. ‏24 ئۇ كېتىۋاتقاندا، يولدا بىر شىر ئۇنىڭغا ئۇچراپ ئۇنى ئۆلتۈرۈۋەتتى. ئۇنىڭ جەسىتى يولدا تاشلىنىپ قالدى. ئۇنىڭ ئېشىكى بولسا ئۇنىڭ يېنىدا تۇرۇپ قالدى، شىرمۇ جەسەتنىڭ يېنىدا تۇرۇپ قالدى. ‏25 ۋە مانا يولدىن ئۆتۈپ كېتىۋاتقانلار يولدا تاشلانغان جەسەت ۋە جەسەتنىڭ يېنىدا تۇرغان شىرنى كۆرۈپ قالدى. ئۇلار قېرى پەيغەمبەر تۇرغان شەھەرگە كېلىپ، ئۇ يەردە شۇ خەۋەرنى يەتكۈزدى. ‏26 ئۇنى يولدىن قايتۇرغان پەيغەمبەر شۇنى ئاڭلاپ: «پەرۋەردىگارنىڭ سۆزىگە ئىتائەت قىلمىغان خۇدانىڭ ئادىمى دېگەن كىشى شۇدۇر. شۇنىڭ ئۈچۈن پەرۋەردىگار ئۇنى شىرغا تاپشۇردى. پەرۋەردىگارنىڭ ئۇنىڭغا قىلغان سۆزى بويىچە، شىر ئۇنى يىرتىپ ئۆلتۈردى» دېدى. ‏27 ئۇ ئوغۇللىرىغا: «ماڭا ئېشەكنى توقۇپ بېرىڭلار» دېدى. ئۇلار ئۇنى توقۇدى. ‏28 ئۇ بېرىپ، يولدا تاشلانغان جەسەت ۋە جەسەتنىڭ يېنىدا تۇرغان ئېشەك ۋە شىرنى تاپتى. شىر بولسا جەسەتنى يېمىگەنىدى، ئېشەكنىمۇ تالىمىغانىدى. ‏29 پەيغەمبەر خۇدانىڭ ئادىمىنىڭ جەسىتىنى ئېشەككە ئارتىۋېلىپ ياندى. قېرى پەيغەمبەر ئۇنىڭ ئۈچۈن ماتەم تۇتۇپ، ئۇنى دەپنە قىلغىلى شەھەرگە بېرىپ، ‏30 جەسەتنى ئۆز گۆرىگە قويدى. ئۇلار ئۇنىڭ ئۈچۈن ماتەم تۇتۇپ: «ئاھ بۇرادىرىم» دەپ يىغا-زار قىلىشتى. ‏31 ئۇنى دەپنە قىلغاندىن كېيىن ئۇ ئۆز ئوغۇللىرىغا: «مەن ئۆلگەندىن كېيىن، خۇدانىڭ ئادىمى دەپنە قىلىنغان گۆرگە مېنىمۇ دەپنە قىلىپ، سۆڭەكلىرىمنى ئۇنىڭ سۆڭەكلىرىنىڭ يېنىغا قويۇڭلار. ‏32 چۈنكى ئۇ پەرۋەردىگارنىڭ بۇيرۇقى بىلەن بەيتەلدىكى قۇربانلىق سۇپىسىغا قارشى سامارىيەدىكى شەھەرلەرنىڭ تۆپىلىكلىرىدىكى ئىبادەتخانىلارغا قارشى جاكارلىغان سۆزى شەكسىز ئەمەلگە ئاشۇرۇلىدۇ» دېدى.

‏33 يەروبېئام بۇ ۋەقەدىن كېيىن ئۆز يامان يولىدىن يانماي، بەلكى تۆپىلىكلەردىكى سەجدىگاھلار ئۈچۈن ئاۋام خەلقتىن كاھىنلار تەيىنلىدى. ھەر كىم خالىسا، ئۇنىڭ تەرىپىدىن كاھىنلىق ۋەزىپىسىگە تەيىنلىنىپ، تۆپىلىكلەردىكى سەجدىگاھلاردا كاھىن بولدى. ‏34 شۇ ئىش يەروبېئامنىڭ جەمەتىگە گۇناھ ھېسابلىنىپ، ئۇلارنىڭ يەر يۈزىدىن يوقىتىلىپ ھالاك بولۇشىغا سەۋەب بولدى.