‏1 بىرنەچچە ۋاقىت ئۆتكەندىن كېيىن شۇنداق بولدىكى، يىزرەئەلدە، سامارىيەنىڭ پادىشاھى ئاخابنىڭ ئوردىسىنىڭ يېنىدا يىزرەئەللىك نابوتنىڭ بىر ئۈزۈمزارلىقى بار ئىدى. ‏2 ئاخاب نابوتقا سۆز قىلىپ: «ئۆز ئۈزۈمزارلىقىڭنى ماڭا بەرگىن. مېنىڭ ئوردامغا يېقىن بولغاچقا، مەن ئۇ يەرنى بىر كۆكتاتلىققا ئايلاندۇرماقچى. ئۇنىڭ ئورنىغا ساڭا ئوبدانراق بىر ئۈزۈمزارلىق بېرەي ياكى خالىساڭ باھاسىنى نەق بېرىمەن» دېدى. ‏3 ئەمما نابوت ئاخابقا: «پەرۋەردىگار مېنى ئاتا-بوۋىلىرىمنىڭ مىراسىنى سېتىپ بېرىشتىن ساقلىسۇن» دېدى. ‏4 ئاخاب يىزرەئەللىك نابوتنىڭ «ئاتا-بوۋىلىرىمنىڭ مىراسىنى ساڭا بەرمەيمەن» دېگەن سۆزىدىن خاپا بولۇپ ئاچچىقلىنىپ، ئوردىسىغا قايتتى. ئۇ ئورنىدا يۈزىنى تام تەرەپكە قارىتىپ ياتتى، نانمۇ يېمىدى.

‏5 خوتۇنى ئىزەبەل ئۇنىڭ قېشىغا كېلىپ: «نېمىشقا شۇنچە خاپا بولۇپ نان يېمەيسەن؟» دەپ سورىدى. ‏6 ئاخاب ئۇنىڭغا: «مەن يىزرەئەللىك نابوتقا سۆز قىلىپ ئۇنىڭغا: ‹ئۆز ئۈزۈمزارلىقىڭنى ماڭا بەرسەڭ، ساڭا پۇل بېرەي ياكى خالىساڭ ئورنىغا باشقا ئۈزۈمزارلىق بېرەي› دېدىم. لېكىن ئۇ: ‹ساڭا ئۆز ئۈزۈمزارلىقىمنى بەرمەيمەن› دېدى». ‏7 خوتۇنى ئىزەبەل ئۇنىڭغا: «سەن ئەمدى ئىسرائىلغا ھۆكۈمرانلىق قىلغۇچىمۇسەن؟ ئورنۇڭدىن تۇرۇپ، نان يەپ، كۆڭلۈڭنى خۇش قىلغىن. مەن يىزرەئەللىك نابوتنىڭ ئۈزۈمزارلىقىنى ساڭا ئېلىپ بېرىمەن» دېدى. ‏8 ئاندىن ئۇ ئاخابنىڭ نامىدا بىر خەت يېزىپ، ئۈستىگە ئۇنىڭ مۆھۈرىنى بېسىپ، خەتنى نابوتنىڭ شەھىرىدە ئۇنىڭ بىلەن تۇرغان ئاقساقاللار ۋە ئېسىلزادىلەرگە ئەۋەتتى. ‏9 خەتتە ئۇ مۇنداق يازغانىدى: «بىر روزىنى بۇيرۇپ، خەلقنىڭ ئارىسىدا نابوتنى تۆرگە ئولتۇرغۇزۇپ، ‏10 ئۇنىڭ ئۇدۇلىدا ئىككى يارىماس ئادەمنى ئولتۇرغۇزۇڭلار. ئۇلار ئۇنىڭغا قارشى گۇۋاھلىق بېرىپ: ‹سەن خۇدانى ۋە پادىشاھنى ھاقارەتلىدىڭ› دەپ گۇۋاھلىق بەرسۇن. ئاندىن كېيىن ئۇنى ئېلىپ چىقىپ، چالما-كېسەك قىلىپ ئۆلتۈرۈڭلار».

‏11 شەھەرنىڭ ئادەملىرى، يەنى ئۇنىڭ شەھىرىدە تۇرغان ئاقساقاللار ۋە ئېسىلزادىلەر ئىزەبەل ئۇلارغا ئەۋەتكەن خەتتە يازغاندەك قىلىپ، ‏12 بىر روزىنى بۇيرۇپ، خەلقنىڭ ئارىسىدا نابوتنى تۆرگە ئولتۇرغۇزدى. ‏13 ئاندىن ئىككى يارىماس ئادەم كىرىپ، ئۇنىڭ ئۇدۇلىدا ئولتۇردى. ئۇ ئىككى يارىماس ئادەم بولسا خەلقنىڭ ئالدىدا نابوت ئۈستىدىن گۇۋاھلىق بېرىپ: «نابوت خۇدانى ۋە پادىشاھنى ھاقارەتلىدى» دېدى. شۇنىڭ بىلەن ئۇلار نابوتنى شەھەرنىڭ سىرتىغا چىقىرىپ، تاشلار بىلەن چالما-كېسەك قىلىپ ئۆلتۈردى. ‏14 ئاندىن ئۇلار ئىزەبەلگە ئادەم ئەۋەتىپ: «نابوت چالما-كېسەك قىلىنىپ ئۆلدى» دەپ خەۋەر يەتكۈزدى. ‏15 ئىزەبەل نابوتنىڭ چالما-كېسەك قىلىنىپ ئۆلگىنىنى ئاڭلىغاندا ئاخابقا: «ئورنۇڭدىن تۇرۇپ، يىزرەئەللىك نابوت ساڭا پۇلغا بەرگىلى ئۇنىمىغان ئۈزۈمزارلىقنى ئىگىلىۋالغىن، چۈنكى نابوت ھايات ئەمەس، ئۆلدى» دېدى. ‏16 ئاخاب نابوتنىڭ ئۆلگىنىنى ئاڭلىغاندا ئورنىدىن تۇرۇپ، يىزرەئەللىك نابوتنىڭ ئۈزۈمزارلىقىنى ئىگىلىۋالغىلى ئۇ يەرگە باردى.

‏17 لېكىن پەرۋەردىگارنىڭ سۆزى تىشبەلىك ئەلىياغا كەلدى. ئۇ ئۇنىڭغا مۇنداق دېدى: ‏18 «قوپۇپ بېرىپ، سامارىيەدە ئولتۇرۇشلۇق ئىسرائىل پادىشاھى ئاخاب بىلەن ئۇچراشقىن. مانا، ئۇ نابوتنىڭ ئۈزۈمزارلىقىدا بولىدۇ. ئۇ ئۇنى ئىگىلىۋالغىلى ئۇ يەرگە بارغاندۇر. ‏19 ئۇنىڭغا دېگىنكى: ‹پەرۋەردىگار: «ھەم بىرىنى ئۆلتۈردۈڭمۇ، ھەم بىرىنىڭ مىراسىنى ئىگىلىۋالدىڭمۇ؟» دەپ ئېيتىدۇ›. ئاندىن ئۇنىڭغا: ‹پەرۋەردىگار مۇنداق دەيدۇ: «ئىتلار نابوتنىڭ قېنىنى يالىغان يەردە سېنىڭ قېنىڭنىمۇ ئىتلار يالايدۇ» دەپ ئېيتىدۇ› دېگىن».

‏20 ئاخاب ئەلىياغا: «ئەي دۈشمىنىم، مېنى تاپتىڭمۇ؟» دېدى. ئەلىيا مۇنداق دېدى: «شۇنداق، سېنى تاپتىم. چۈنكى سەن پەرۋەردىگارنىڭ نەزىرىدە يامانلىق قىلغىلى ئۆزۈڭنى ساتتىڭ. ‏21 شۇڭا پەرۋەردىگار مۇنداق دەيدۇ: ‹مانا، مەن سېنىڭ ئۈستۈڭگە بالايىئاپەت كەلتۈرۈپ، نەسلىڭنى يوقىتىپ، ئاخابنىڭ ئىسرائىلدىكى جەمەتىدىن مەيلى كىچىك بولسۇن، مەيلى چوڭ بولسۇن، ھەممە ئەركەكنى ھالاك قىلىمەن. ‏22 سەن مېنىڭ غەزىپىمنى كەلتۈرۈپ، ئىسرائىلنى گۇناھ قىلىشقا باشلىغىنىڭ ئۈچۈن نەباتنىڭ ئوغلى يەروبېئامنىڭ جەمەتى ۋە ئاخىيانىڭ ئوغلى باشانىڭ جەمەتىگە قىلغاندەك، سېنىڭ جەمەتىڭگىمۇ قىلىمەن›. ‏23 ئىزەبەل توغرىسىدىمۇ پەرۋەردىگار سۆز قىلىپ: ‹يىزرەئەلنىڭ سېپىلىنىڭ سىرتىدا ئىتلار ئىزەبەلنى يەيدۇ. ‏24 ئاخابنىڭ جەمەتىدىكىلەردىن كىمكى شەھەردا ئۆلسە، ئۇنى ئىتلار يەيدۇ. كىمكى دالادا ئۆلسە، ئۇنى ئاسماندىكى قۇشلار يەيدۇ› دەيدۇ».

‏25 پەرۋەردىگارنىڭ نەزىرىدە يامانلىق قىلغىلى ئۆزىنى ساتقان ئاخابتەك ھېچكىم يوق ئىدى. ئۇ خوتۇنى ئىزەبەل تەرىپىدىن ئازدۇرۇلغانىدى. ‏26 ئۇ پەرۋەردىگار بەنى ئىسرائىلنىڭ ئالدىدىن قوغلاپ چىقارغان ئامورىيلارنىڭ ھەممە قىلغىنىدەك قىلىپ، نىجىس بۇتلارغا چوقۇنۇپ، يىرگىنچلىك ئىشلارنى قىلاتتى.

‏27 لېكىن ئاخاب بۇ سۆزلەرنى ئاڭلىغاندا ئۆز كىيىملىرىنى يىرتىپ، بەدىنىگە بۆز رەخت يۆگىدى. ئۇ روزا تۇتۇپ بۆز رەختتە ياتتى ۋە سۇلغۇن ھالەتتە يۈردى. ‏28 ئۇ ۋاقىتتا پەرۋەردىگارنىڭ سۆزى تىشبەلىك ئەلىياغا كەلدى: ‏29 ئاخابنىڭ مېنىڭ ئالدىمدا ئۆزىنى تۆۋەن تۇتۇۋاتقانلىقىنى كۆردۈڭمۇ؟ ئۇ مېنىڭ ئالدىمدا ئۆزىنى تۆۋەن تۇتقىنى ئۈچۈن ئۇنىڭ كۈنلىرىدە بالانى كەلتۈرمەيمەن، بەلكى ئۇنىڭ ئوغلىنىڭ كۈنلىرىدە ئۇنىڭ جەمەتىنىڭ ئۈستىگە بالانى كەلتۈرىمەن».