‏1 پەيغەمبەرلەرنىڭ شاگىرتلىرى ئەلىشاغا: «مانا، بىز سېنىڭ بىلەن بىللە ئولتۇرۇۋاتقان جاي بىزگە تار كەلدى. ‏2 ئىئوردان دەرياسىنىڭ بويىغا بېرىپ، ئۇ يەردىن ھەربىرىمىز بىردىن ياغاچ ئېلىپ كېلىپ، ئولتۇرىدىغان بىر ئۆي ياسايلى» دېدى. ئەلىشا: «بېرىڭلار» دەپ جاۋاب بەردى. ‏3 لېكىن ئۇلارنىڭ بىرى: «ئىلتىپات قىلىپ، قۇللىرىڭ بىلەن بىرگە بارغىن» دېدى. ئۇ: «ماقۇل، باراي» دەپ، ‏4 ئۇلار بىلەن باردى. ئۇلار ئىئوردان دەرياسىغا يەتكەندە دەرەخ كېسىشكە باشلىدى. ‏5 لېكىن ئۇلارنىڭ بىرى دەرەخ كېسىۋاتقاندا پالتىنىڭ تۆمۈرى سۇغا چۈشۈپ كەتتى. ئۇ بىر قىچقىرىپ: «ئاھ غوجام، بۇ پالتا ئۆتنە ئېلىنغانىدى» دېدى. ‏6 خۇدانىڭ ئادىمى: «قەيەرگە چۈشتى؟» دەپ سورىدى. ئۇ چۈشكەن يەرنى كۆرسىتىپ بەردى. ئەلىشا بىر ياغاچنى كېسىپ ئۇ يەرگە سۇغا تاشلىغاندا، تۆمۈر لەيلەپ چىقتى. ‏7 ئۇ: «ئۇنى قولۇڭغا ئالغىن» دېگەندە ئۇ كىشى قولىنى ئۇزىتىپ ئۇنى تۇتۇۋالدى.

‏8 ئارامنىڭ پادىشاھى ئىسرائىل بىلەن جەڭ قىلاتتى. ئۆز ئادەملىرى بىلەن پالان يەردە بارگاھ قۇراي دەپ، مەسلىھەت قىلىشقاندا، ‏9 خۇدانىڭ ئادىمى ئىسرائىلنىڭ پادىشاھىغا بىر ئادەمنى ئەۋەتىپ، ئۇنىڭغا: «پالان يەرگە بېرىشتىن ئېھتىيات قىلغىن، چۈنكى ئارامىيلار ئۇ يەرگە چۈشمەكچى» دېدى. ‏10 ئۇ ۋاقىتتا ئىسرائىلنىڭ پادىشاھى خۇدانىڭ ئادىمى كۆرسەتكەن يەرگە ئۇ يەردىكىلەرنى ئاگاھلاندۇرۇشقا كىشى ئەۋەتتى ۋە ئۆزىمۇ ئېھتىياتچان بولدى. بۇ ئىش بىر-ئىككى قېتىم ئەمەس، كۆپرەك قېتىم يۈز بەردى. ‏11 ئارامنىڭ پادىشاھى بۇنىڭدىن كۆڭلىدە قاتتىق بىئارام بولۇپ، ئۆز ئادەملىرىنى چاقىرىپ، ئۇلارغا: «ئارىمىزدىن كىم ئىسرائىل پادىشاھىنىڭ تەرىپىدە ئىكەن؟ ماڭا ئېيتىپ بەرمەمسىلەر؟» دېدى. ‏12 لېكىن خىزمەتكارلىرىنىڭ بىرى: «ئەي غوجام پادىشاھ، ئۇنداق ئەمەس. بەلكى ئىسرائىلدىكى ئەلىشا دېگەن پەيغەمبەر سەن ھۇجراڭدا قىلغان سۆزۈڭنى ئىسرائىل پادىشاھىغا ئېيتىپ بېرىدۇ» دېدى. ‏13 شۇنىڭ بىلەن پادىشاھ: «بېرىپ، ئۇنىڭ قەيەردە تۇرۇۋاتقانلىقىنى ئېنىقلاپ بېقىڭلار. مەن ئۇنى تۇتۇشقا كىشى ئەۋەتىمەن» دېدى. پادىشاھقا: «ئۇ دوتاندا ئىكەن» دېگەن خەۋەر كەلدى. ‏14 شۇنىڭ بىلەن ئۇ شۇ يەرگە ئات بىلەن جەڭ ھارۋىلىرى ماڭدۇرۇپ، بىر چوڭ قوشۇننى ئەۋەتتى. ئۇلار كېچىسى ئۇ يەرگە كېلىپ، شەھەرنى قورشىۋالدى.

‏15 خۇدانىڭ ئادىمىنىڭ خىزمەتكارى ئەتىگەندە سەھەر قوپۇپ چىقسا، مانا، ئاتلار ۋە جەڭ ھارۋىلىرىدىن تەركىپ تاپقان بىر قوشۇن شەھەرنى قورشىۋالغانىدى. خىزمەتكار ئۇنىڭغا: «ۋاي غوجام، قانداق قىلايلى؟» دېدى. ‏16 لېكىن ئۇ: «قورقمىغىن، مانا، بىز بىلەن بىللە بولغانلار ئۇلار بىلەن بىللە بولغانلاردىن كۆپتۇر» دېدى. ‏17 ئەلىشا دۇئا قىلىپ: «ئەي پەرۋەردىگار، ئۇنىڭ كۆزلىرىنى كۆرەلىگۈدەك قىلىپ ئاچقىن» دېدى. ئۇ ۋاقىتتا پەرۋەردىگار يىگىتنىڭ كۆزلىرىنى ئاچتى، شۇنداقكى، ئەلىشانىڭ چۆرىسىدە پۈتۈن تاغنىڭ يالقۇنلۇق ئات ۋە جەڭ ھارۋىلىرى بىلەن تولدۇرۇلغانلىقىنى كۆردى. ‏18 ئارامىيلار چۈشۈپ، ئۇنىڭ تەرىپىگە كەلگەندە ئەلىشا پەرۋەردىگارغا دۇئا قىلىپ: «بۇ ئادەملەرنى كورلۇق بىلەن ئۇرغىن» دېدى. ئۇ ۋاقىتتا ئەلىشا دۇئا قىلغاندەك پەرۋەردىگار ئۇلارنى كورلۇق بىلەن ئۇردى.

‏19 ئەلىشا ئۇلارغا: «بۇ توغرا يول ئەمەس، بۇ سىلەر ئىزدىگەن شەھەر ئەمەس. مېنىڭ كەينىمدىن مېڭىڭلار. سىلەرنى ئىزدىگەن ئادەمنىڭ قېشىغا باشلاپ باراي» دەپ، ئۇلارنى سامارىيەگە باشلاپ باردى. ‏20 لېكىن سامارىيەگە كەلگەندە ئەلىشا: «ئەي پەرۋەردىگار، ئۇلارنىڭ كۆزلىرىنى كۆرگۈدەك قىلىپ ئاچقىن» دەپ دۇئا قىلدى. پەرۋەردىگار ئۇلارنىڭ كۆزلىرىنى ئاچقاندا ئۇلار ئۆزلىرىنىڭ سامارىيەنىڭ ئوتتۇرىسىدا بولغىنىنى كۆردى. ‏21 ئىسرائىلنىڭ پادىشاھى ئۇلارنى كۆرگەندە، ئەلىشادىن: «ئاي ئاتام، ئۇلارنى ئۆلتۈرەۋېتەيمۇ، ئۇلارنى ئۆلتۈرۈۋېتەيمۇ؟» دەپ سورىدى. ‏22 ئەلىشا: «ئۇلارنى ئۆلتۈرمەيسەن. ھەتتا ئۆزۈڭ قىلىچ ۋە ئوقيايىڭ بىلەن ئەسىر قىلغانلىرىڭنى ئۆلتۈرمەيسەنغۇ!؟ ئۇلارنىڭ ئالدىغا نان ۋە سۇ قويغىن. ئۇلار يەپ-ئىچىپ، ئۆز خوجىسىغا قايتىپ بارسۇن» دەپ جاۋاب بەردى. ‏23 شۇنداق قىلىپ، ئۇ ئۇلارغا چوڭ زىياپەت بەردى. ئۇلار يەپ-ئىچكەندىن كېيىن، ئۇ ئۇلارنى يولغا سالدى ۋە ئۇلار ئۆز خوجىسىغا قايتىپ باردى. شۇنىڭدىن كېيىن ئارامدىن قاراقچى توپلىرى ئىسرائىلنىڭ زېمىنىغا قايتا كىرمىدى.

‏24 مەلۇم ۋاقىتتىن كېيىن ئارامنىڭ پادىشاھى بەنھاداد ھەممە قوشۇنىنى يىغىپ چىقىپ، سامارىيەنى قورشىۋالدى. ‏25 ئۇلار سامارىيەنى قورشىۋالغاندا ئۇ يەردە شۇنچە قاتتىق ئاچارچىلىق بولدىكى، بىر ئېشەك كاللىسىغا سەكسەن كۈمۈش تەڭگە ۋە كەپتەر مايىقىنىڭ بىر چارەك قاچىسى بەش كۈمۈش تەڭگىگە كېلەتتى. ‏26 ئىسرائىلنىڭ پادىشاھى سېپىلنىڭ ئۈستىگە چىقىپ يۈرگەندە بىر ئايال ئۇنىڭغا يالۋۇرۇپ: «ئەي غوجام پادىشاھ، ياردەم بەرگىن» دېدى. ‏27 پادىشاھ: «ئەگەر پەرۋەردىگار ساڭا ياردەم بەرمىسە، مەن ساڭا نەلەردىن ياردەم تاپاي؟ خاماندىنمۇ ياكى شاراب كۆلچىكىدىنمۇ؟» دېدى. ‏28 پادىشاھ يەنە ئۇنىڭدىن: «نېمە دەردىڭ بار؟» دەپ سورىدى. ئۇ مۇنداق دېدى: «مانا بۇ ئايال ماڭا: ‹ئوغلۇڭنى بەرگىن. بۈگۈن ئۇنى يەيلى. ئەتە مېنىڭ ئوغلۇمنى يەيلى› دېگەنىدى. ‏29 ئۇ ۋاقىتتا مېنىڭ ئوغلۇمنى پىشۇرۇپ يېدۇق. ئەتىسى مەن ئۇنىڭغا: ‹ئەمدى سەن ئوغلۇڭنى بەرگىن، ئۇنى يەيلى› دېدىم، لېكىن ئۇ ئۆز ئوغلىنى يوشۇرۇپ قويدى».

‏30 پادىشاھ ئايالنىڭ سۆزىنى ئاڭلاپ، ئۆز كىيىملىرىنى يىرتىۋەتتى. ئۇ سېپىلدا يۈرگىنىدە خەلق ئۇنىڭ كىيىمىنىڭ ئىچىدە بەدىنىگە بۆز رەخت يۆگىگەنلىكىنى كۆردى. ^■   ‏31 ئۇ ئېيتتى: «ئەگەر شافاتنىڭ ئوغلى ئەلىشانىڭ بېشى بۈگۈن ئۆز جايىدا قالسا، خۇدا مېنى قوشلاپ جازالىغاي!».

‏32 ئەلىشا ئۆز ئۆيىدە ئاقساقاللار بىلەن بىللە ئولتۇرۇشقىنىدا پادىشاھ ئۇنىڭ قېشىغا بىر كىشى ئەۋەتتى. لېكىن ئۇ خەۋەرچى ئۇنىڭغا يېتىپ بارماستا ئەلىشا ئاقساقاللارغا: «مانا، بۇ خۇنخورنىڭ ئوغلى مېنىڭ بېشىمنى كەستۈرگىلى ئادەم ئەۋەتتى. لېكىن خەۋەرچى كەلگەندە ئېھتىيات قىلىپ ئىشىكنى تاقاپ، ئۇنى ئىشىكتىن ئىتتىرىۋېتىڭلار. مانا، ئۇنىڭ كەينىدىن كەلگەن خوجىسىنىڭ قەدىمىنىڭ ئاۋازى ئاڭلىنىۋاتمامدۇ؟» دېدى. ‏33 ئۇ ئۇلار بىلەن سۆزلىشىۋاتقاندا، مانا، خەۋەرچى ئۇنىڭ قېشىغا يېتىپ كەلدى. ئۇ: «مانا، بۇ بالايىئاپەت پەرۋەردىگار تەرىپىدىن كەلدى. پەرۋەردىگارغا يەنە قانداق ئۈمىد باغلىيالايمەن؟» دېدى. ^■