‏1 ئەلىشا پەيغەمبەر پەيغەمبەرلەرنىڭ شاگىرتلىرىدىن بىرىنى چاقىرىپ، ئۇنىڭغا: «بېلىڭنى باغلاپ، بۇ ياغ شېشىسىنى قولۇڭغا ئېلىپ، گىلېئادتىكى راموتقا بارغىن. ‏2 ئۇ يەرگە يېتىپ بارغاندا نىمشىنىڭ نەۋرىسى، ياھوشافاتنىڭ ئوغلى يېھۇنى تېپىپ، ئۇنىڭ ئۆيىگە كىرىپ، ئۇنى بىللە ئولتۇرۇشقان بۇرادەرلىرى ئارىسىدىن ئېلىپ، ئىچكىرىكى ئۆيگە باشلاپ كىرگىن. ‏3 ئاندىن ياغ شېشىسىنى ئېلىپ، ياغنى بېشىغا قۇيۇپ: ‹پەرۋەردىگار مۇنداق دەيدۇ: «مەن سېنى ئىسرائىلغا پادىشاھ بولۇشقا مەسىھلىدىم»› دېگىن. ئاندىن ھايال بولماي، ئىشىكنى ئېچىپ تېزلا قېچىپ كەتكىن» دېدى.

‏4 شۇنىڭ بىلەن ياش پەيغەمبەر بولغان يىگىت يولغا چىقىپ، گىلېئادتىكى راموتقا باردى. ‏5 ئۇ يەرگە كەلگەندە، مانا، قوشۇننىڭ سەردارلىرى ئۇ يەردە ئولتۇردى. يىگىت: «ئەي سەردار، ساڭا بىر سۆزۈم بار» دېدى. يېھۇ: «قايسىمىزغا؟» دەپ سورىدى. ئۇ: «سېنىڭ ئۆزۈڭگە، ئەي سەردار» دېدى. ‏6 ئۇ ئورنىدىن تۇرۇپ، ئۆيگە كىردى. يىگىت ئۇنىڭ بېشىغا ياغنى قۇيۇپ: «ئىسرائىلنىڭ خۇداسى پەرۋەردىگار مۇنداق دەيدۇ: ‹مەن سېنى پەرۋەردىگارنىڭ خەلقىگە، يەنى ئىسرائىلغا پادىشاھ بولۇشقا مەسىھلىدىم. ‏7 سەن ئۆز غوجاڭ ئاخابنىڭ جەمەتىنى يوقىتىسەن، چۈنكى مېنىڭ خىزمەتكارلىرىم بولغان پەيغەمبەرلەرنىڭ تۆكۈلگەن قېنى ئۈچۈن، شۇنداقلا پەرۋەردىگارنىڭ ھەممە خىزمەتكارلىرىنىڭ تۆكۈلگەن قېنى ئۈچۈن ئىزەبەلدىن ئىنتىقام ئالىمەن. ‏8 ئاخابنىڭ ھەممە جەمەتى يوقىلىدۇ. ئاخابنىڭ ئىسرائىلدىكى جەمەتىدىن ھەممە ئەركەكنى، مەيلى كىچىك بولسۇن، مەيلى چوڭ بولسۇن، ھەممىسىنى ھالاك قىلىمەن. ^■   ‏9 مەن نەباتنىڭ ئوغلى يەروبېئامنىڭ جەمەتىگە ۋە ئاخىيانىڭ ئوغلى باشانىڭ جەمەتىگە قىلغاندەك، ئاخابنىڭ جەمەتىگىمۇ قىلىمەن. ‏10 ئىتلار ئىزەبەلنى يىزرەئەلنىڭ ئېتىز يېرىدە يەپ كېتىدۇ. ھېچكىم ئۇنى دەپنە قىلمايدۇ›». شۇنى دەپ بولۇپلا ئىشىكنى ئېچىپ، قېچىپ كەتتى. ‏11 يېھۇ ئۆز خوجىسىنىڭ ئادەملىرىگە قايتىپ كەلگەندە، ئۇلار ئۇنىڭدىن: «ھەممە ئىش تىنچلىقمۇ؟ بۇ ساراڭ نېمىشقا سېنىڭ يېنىڭغا كەلدى؟» دەپ سورىدى. ئۇ ئۇلارغا: «سىلەر شۇ ئادەم ۋە ئۇنىڭ گەپلىرىنى بىلىسىلەرغۇ» دېدى. ‏12 لېكىن ئۇلار: «يالغان ئېيتما! بىزگە دەپ بەرگىنە!» دېسە، يېھۇ ئۇلارغا ئېيتتى: «ئۇ كىشى ماڭا ئۇنداق-مۇنداق دەپ: ‹پەرۋەردىگار: «سېنى ئىسرائىلغا پادىشاھ بولۇشقا مەسىھلىدىم» دەيدۇ› دېدى». ‏13 شۇنىڭ بىلەن ئۇلارنىڭ ھەممىسى دەرھال تونلىرىنى سېلىپ پەلەمپەيدە يېيىپ ئۇنىڭغا پايانداز قىلدى ۋە بۇرغا چېلىپ: «يېھۇ پادىشاھ بولدى» دەپ توۋلاشتى.

‏14 ئاندىن كېيىن نىمشىنىڭ نەۋرىسى، ياھوشافاتنىڭ ئوغلى يېھۇ يورامغا سۇيىقەست قىلدى. يورام پۈتۈن ئىسرائىلنىڭ ھەممە قوشۇنلىرى بىلەن گىلېئادتىكى راموتتا، ئۇ جاينى ئارامنىڭ پادىشاھى خازائەلنىڭ ھۇجۇمىدىن ساقلاش ئۈچۈن تۇرۇۋاتقانىدى، ‏15 لېكىن يورام پادىشاھ ئارامنىڭ پادىشاھى خازائەل بىلەن جەڭ قىلغاندا ئارامىيلاردىن يېگەن زەخىملىرىدىن ساقىيىش ئۈچۈن يىزرەئەلگە قايتىپ بارغانىدى. يېھۇ بولسا قېشىدىكى ئادەملەرگە: «سىلەر جىن قەلبتىن بۇنى خالىساڭلار، ھېچ كىشى يىزرەئەلگە بېرىپ خەۋەر بەرمىسۇن دەپ، ھېچكىمنى شەھەردىن قېچىشقا يول قويماڭلار» دېگەنىدى. ^■  

‏16 يېھۇ جەڭ ھارۋىسىغا مىنىپ، يىزرەئەلگە باردى. يورام ئۇ يەردە ئورۇن تۇتۇپ ياتتى. يەھۇدانىڭ پادىشاھى ئاخازيا بولسا ئۇنى يوقلىغىلى كەلگەنىدى. ‏17 يىزرەئەلنىڭ مۇنارىدىكى كۆزەتچى يېھۇنىڭ ئادەملەر توپىنى كۆرگەندە: «بىر توپ ئادەمنى كۆرىمەن» دېدى. يورام: «بىر ئاتلىق كىشى ئۇلارنىڭ ئالدىغا ئەۋەتىڭلار، ئۇ ئۇلاردىن: ‹ھەممە ئىش تىنچلىقمۇ؟› دەپ سورىسۇن» دېدى. ‏18 شۇنىڭ بىلەن بىر كىشى ئاتقا مىنىپ، ئۇنىڭ ئالدىغا بېرىپ: «پادىشاھ: ‹ھەممە ئىش تىنچلىقمۇ؟› دەپ سورايدۇ» دېدى. يېھۇ: «تىنچلىقمۇ ئەمەسمۇ بۇنىڭ بىلەن نېمە كارىڭ بار؟ بۇرۇلۇپ، مېنىڭ كەينىمدىن ئەگەشكىن» دېدى. كۆزەتچى پادىشاھقا خەۋەر بېرىپ: «خەۋەرچى ئۇلارنىڭ قېشىغا يېتىپ باردى، لېكىن قايتىپ كەلمەيدۇ» دېدى. ‏19 شۇنىڭ بىلەن ئۇ يەنە بىر ئاتلىق كىشىنى ئەۋەتتى. ئۇ ئۇلارنىڭ قېشىغا يېتىپ بېرىپ: «پادىشاھ: ‹ھەممە ئىش تىنچلىقمۇ؟› دەپ سورايدۇ» دېدى. يېھۇ: «تىنچلىقمۇ ئەمەسمۇ بۇنىڭ بىلەن نېمە كارىڭ بار؟ بۇرۇلۇپ، مېنىڭ كەينىمدىن ئەگەشكىن» دېدى. ‏20 كۆزەتچى پادىشاھقا يەنە خەۋەر بېرىپ: «بۇمۇ ئۇلارغا يېتىپ باردى، لېكىن قايتىپ كەلمەيدۇ. ئۇلارنىڭ ھارۋا ھەيدىشى نىمشىنىڭ ئوغلى يېھۇنىڭ ھەيدىشىدەك ئىكەن، چۈنكى ساراڭدەك ھەيدەيدۇ» دېدى.

‏21 يورام: «ھارۋىنى قېتىڭلار» دەپ بۇيرۇغاندا ئۇلار ئۇنىڭ جەڭ ھارۋىسىنى قاتتى. ئاندىن ئىسرائىلنىڭ پادىشاھى يورام ۋە يەھۇدانىڭ پادىشاھى ئاخازيا ھەربىرى ئۆز ھارۋىسىغا ئولتۇرۇپ، يېھۇنىڭ ئالدىغا بېرىپ، يىزرەئەللىك نابوتنىڭ ئېتىزلىقىدا ئۇنىڭ بىلەن ئۇچراشتى. ‏22 يورام يېھۇنى كۆرگەندە: «ئەي يېھۇ، ھەممە ئىش تىنچلىقمۇ؟» دەپ سورىدى. ئۇ: «ئاناڭ ئىزەبەل شۇنچە كۆپ بۇزۇقچىلىق ۋە جادۇگەرلىك قىلىپ تۇرغۇچە قانداقمۇ تىنچلىق بولىدۇ؟» دېدى. ‏23 يورام ھارۋىنى ياندۇرۇپ، ئاخازياغا: «ئەي ئاخازيا، ئاسىيلىق!» دەپ ۋارقىراپ قاچتى. ‏24 لېكىن يېھۇ ئوقياسىنى قولىغا ئېلىپ، ئۇنى بەتلەپ يورامنىڭ كەينى تەرىپىدىن ئۇنىڭ ئىككى مۈرىسىنىڭ ئارىلىقىغا قارىتىپ ئاتتى. يا ئوقى ئۇنىڭ يۈرىكىدىن تېشىپ چىقتى ۋە ئۇ ئۆز ھارۋىسىدا يىقىلىپ چۈشتى. ‏25 يېھۇ ئۆز يېنىدىكى سەردار بىدقارغا: «ئۇنى ئېلىپ، يىزرەئەللىك نابوتنىڭ ئېتىزلىقىغا تاشلىغىن. يادىڭغا كەلتۈرگىنكى، مەن بىلەن سەن ئۇنىڭ ئاتىسى ئاخابنىڭ كەينىدىن بىللە ماڭغاندا پەرۋەردىگار ئۇ توغرىسىدا مۇنداق ھۆكۈم ۋەھىيسى يەتكۈزگەنىدى: ‏26 پەرۋەردىگار مۇنداق دېدى: ‹مەن تۈنۈگۈن نابوتنىڭ قېنى ۋە ئۇنىڭ ئوغۇللىرىنىڭ قېنىنى كۆرمىدىممۇ؟› ۋە پەرۋەردىگار يەنە: ‹مانا، ئۆز قىلغىنىڭنى بۇ ئېتىزلىقتا ساڭا ياندۇرىمەن› دېدى. ئەمدى پەرۋەردىگارنىڭ شۇ سۆزى بويىچە ئۇنى ئېلىپ بۇ يەرگە تاشلىغىن» دېدى.

‏27 يەھۇدانىڭ پادىشاھى ئاخازيا بۇنى كۆرگەندە بەيت-ھاگگان تەرىپىگە قاچتى. لېكىن يېھۇ ئۇنىڭ كەينىدىن قوغلاپ: «ئۇنىمۇ ئېتىڭلار» دەپ بۇيرۇدى. ئۇلار يىبلېئامدىكى گۇر ئېگىزلىكىدە ئۇنى ئاتتى. لېكىن ئۇ مەگىددوغىچە قېچىپ، ئۇ يەردە ئۆلدى. ‏28 ئۇنىڭ خىزمەتكارلىرى ئۇنىڭ جەسىتىنى بىر ھارۋىغا سېلىپ يېرۇسالېمغا ئېلىپ بېرىپ، داۋۇدنىڭ شەھىرىدە ئاتا-بوۋىلىرىنىڭ يېنىغا ئۆز قەبرىسىگە دەپنە قىلدى. ‏29 ئاخابنىڭ ئوغلى يورامنىڭ سەلتەنىتىنىڭ ئون بىرىنچى يىلى ئاخازيا يەھۇداغا پادىشاھ بولغانىدى.

‏30 يېھۇ بولسا يىزرەئەلگە كەلدى. ئىزەبەل شۇنى ئاڭلاپ، كۆزلىرىگە سۈرمە تارتىپ، چاچلىرىنى رەتلەپ، دېرىزىدىن قاراپ تۇردى. ‏31 يېھۇ دەرۋازىدىن كىرگەندە ئۇ ئۇنىڭغا: «ئەي زىمرى، ئەي ئۆز غوجاڭنى ئۆلتۈرگۈچى، ھەممە ئىش تىنچلىقمۇ؟» دەپ سورىدى. ‏32 يېھۇ بېشىنى كۆتۈرۈپ دېرىزىنىڭ تەرىپىگە قاراپ: «مەن تەرەپتە تۇرىدىغان كىم؟ كىم بار؟» دەپ سورىسا، ئىككى-ئۈچ ئوردا ئەمەلدارى دېرىزىدىن ئۇنىڭغا قارىدى. ‏33 يېھۇ: «ئۇنى تۆۋەنگە تاشلاڭلار» دەپ بۇيرۇغاندا، ئۇلار ئۇنى تۆۋەنگە تاشلىدى. ئۇنىڭ قېنى ھەم تامغا، ھەم ئاتلارغا چېچىلدى. يېھۇ ئاتلىرى بىلەن ئۇنى دەسسەپ ئۈستىدىن ئۆتۈپ كەتتى. ‏34 ئاندىن ئۇ ئۆيگە كىرىپ، يەپ-ئىچكەندىن كېيىن: «ئۇ لەنىتى ئايالدىن خەۋەر ئېلىپ، ئۇنى دەپنە قىلىڭلار. قانداقلا بولمىسۇن، ئۇ شاھزادىخان ئىدى» دېدى. ‏35 لېكىن ئۇلار ئۇنى دەپنە قىلغىلى بارسا، مانا، ئۇنىڭدىن باش سۆڭىكى ۋە پۇت-قوللىرىدىن باشقا ھېچنېمە قالماپتۇ. ‏36 ئۇلار قايتىپ كېلىپ، بۇ خەۋەرنى يېھۇغا دەپ بەرگەندە ئۇ: «بۇ ئىش پەرۋەردىگارنىڭ ئۆز خىزمەتكارى تىشبەلىك ئەلىيا ئارقىلىق ئېيتقان سۆزى، يەنى: ‹يىزرەئەلنىڭ ئېتىزلىقىدا ئىتلار ئىزەبەلنىڭ گۆشىنى يەيدۇ. ‏37 دەرۋەقە ئىزەبەلنىڭ ئۆلۈكى يىزرەئەلنىڭ ئېتىزلىقىدا يەرگە قىغدەك بولۇپ قېلىپ، ھېچكىم: «بۇ ئىزەبەل ئىكەن» دېيەلمەيدۇ› دېگەن سۆزى بويىچە بولدى» دېدى.