‏1 سانبالات، توبىيا، ئەرەبلەر، ئاممونىيلار ۋە ئاشدودلۇقلارنىڭ يېرۇسالېمنىڭ سېپىلى قايتا قۇرۇلۇش ئىشى ئالغا باسىۋاتقانلىقىنى ۋە ئۇنىڭ يېرىقلىرىنىڭ ئېتىلىۋاتقانلىقىنى ئاڭلاپ، قاتتىق غەزەپلەندى. ‏2 ئۇلار يېرۇسالېمغا ھۇجۇم قىلىپ، شەھەرنىڭ ئىچىگە پاراكەندىچىلىك سېلىشنى قەستلىدى. ‏3 لېكىن بىز خۇدايىمىزغا دۇئا قىلىپ، ئۆزىمىزنى ئۇلارنىڭ ھۇجۇمىدىن قوغداش ئۈچۈن كېچە-كۈندۈز ئۇلارغا قارشى قاراۋۇل قويدۇق.

‏4 يەھۇدىيلار: «ئىشچىلارنىڭ كۈچى كېتىپ قالدى. خارابىلىك ئەخلەتلەر بەك كۆپ بولغاچقا بىز سېپىلنى پۈتۈرەلمەيمىز» دېدى. ‏5 دۈشمەنلىرىمىز بولسا: «ئۇلار ھېچنېمىنى ئاڭلاپ كۆرمەستە بىز ئۇلارنىڭ ئارىسىغا كىرىۋېلىپ، ئۇلارنى ئۆلتۈرۈپ، قۇرۇلۇش ئىشىنى توختىتىۋېتىمىز» دېيىشقانىدى.

‏6 ئۇلارنىڭ ئارىسىدا ئولتۇرۇشلۇق يەھۇدىيلار ئون قېتىمچە بىزنىڭ يېنىمىزغا كېلىپ: «ئۇلار ھەر تەرەپتىن بىزگە ھۇجۇم قىلماقچى» دەپ خەۋەر يەتكۈزدى. ‏7 شۇڭا مەن خەلقنى ئۆز جەمەتلىرى بويىچە سېپىلنىڭ كەينىدىكى پەس ۋە ئوچۇق يەرلەردە قىلىچ، نەيزە ۋە ئوقيالىرى بىلەن قوراللانغان ھالدا سەپكە تىزدىم. ‏8 مەن ئەھۋالنى كۆزدىن كەچۈرگەندىن كېيىن، ئورنۇمدىن تۇرۇپ، ئەسىلزادىلەر، ئەمەلدارلار ۋە قالغان خەلققە: «سىلەر ئۇلاردىن قورقماڭلار، بەلكى قورقۇنچلۇق ئۇلۇغ ئىگىمىزنى ياد ئېتىڭلار. ئۆز قېرىنداشلىرىڭلار، ئوغۇل-قىزلىرىڭلار، ئاياللىرىڭلار ۋە ئۆيلىرىڭلار ئۈچۈن جەڭ قىلىڭلار» دېدىم.

‏9 دۈشمەنلىرىمىز ئۆزلىرىنىڭ سۇيىقەستلىرىنى بىلىپ قالغانلىقىمىزنى ئاڭلاپ، خۇدا ئۇلارنىڭ غەرىزىنى بىتچىت قىلغانلىقىنى چۈشىنىپ يەتتى. شۇنىڭ بىلەن ھەممىمىز سېپىلغا قايتىپ كېلىپ، ھەربىرىمىز يەنە ئۆز ئىشىمىزنى داۋاملاشتۇردۇق. ‏10 ئۇ كۈندىن تارتىپ خىزمەتكارلىرىمنىڭ يېرىمى ئىشلەپ تۇردى، يەنە يېرىمى نەيزە، قالقان ۋە ئوقيا بىلەن قوراللانغان ۋە زەنجىر ساۋۇتلارنى كىيگەن ھالدا تۇرۇشتى. باشلىقلار بولسا سېپىلنى ياساۋاتقان پۈتۈن يەھۇدا جەمەتىنىڭ كەينىدە تۇرىدىغان بولدى. ‏11 يۈك كۆتۈرگۈچىلەر بىر قولى بىلەن ئىش قىلىپ، يەنە بىر قولى بىلەن قورال تۇتاتتى. ‏12 قۇرۇلۇشچىلار قىلىچىنى بېلىگە ئاسقان ھالدا سېپىلنى ياسايتتى. بۇرغا چالغۇچى بولسا مېنىڭ يېنىمدا تۇراتتى. ^■  

‏13 مەن ئېسىلزادىلەر، ئەمەلدارلار ۋە قالغان خەلققە: «قىلىدىغان ئىش چوڭ، دائىرىسى كەڭ. مانا، بىز سېپىلدا بۆلەك-بۆلەك تۇرۇشۇپ، بىر-بىرىمىزدىن يىراق تۇرىمىز. ‏14 شۇڭا سىلەر بۇرغىنىڭ ئاۋازىنى ئاڭلىساڭلار، ئاۋاز چىققان يەرگە بىزنىڭ يېنىمىزغا يىغىلىپ كېلىڭلار. خۇدايىمىز بىز ئۈچۈن جەڭ قىلىدۇ» دېدىم.

‏15 بۇ تەرىقىدە تاڭ ئاتقاندىن تارتىپ يۇلتۇزلار كۆرۈنگۈچە بىز ئىشلەپ تۇردۇق ۋە يېرىمىمىز نەيزە بىلەن قوراللىنىپ تۇرۇشتۇق. ‏16 شۇ ۋاقىتتا مەن خەلققە: «ھەر كىشى ئۆز خىزمەتكارىنى بىللە ئېلىپ، يېرۇسالېم ئىچىدە قونسۇن. شۇنداق قىلىپ ئۇلار كېچىسى بىز ئۈچۈن قاراۋۇللۇق قىلسۇن، كۈندۈزى ئىش قىلسۇن» دېدىم. ‏17 بۇنىڭ ئۈچۈن مەن، قېرىنداشلىرىم، خىزمەتكارلىرىم ياكى يېنىمدىكى مۇھاپىزەتچىلەر بولسۇن، ھېچقايسىمىز كىيىملىرىمىزنى سالمىدۇق، ھەتتا سۇغا بارغاندىمۇ، چوراللىرىنى كۆتۈرۈپ باراتتۇق.