‏1 ئۇ كېچىسى پادىشاھنىڭ ئۇيقۇسى كەلمىگەچكە، ئۇ تارىخ-تەزكىرە كىتابىنى ئېلىپ كېلىشنى بۇيرۇدى. تەزكىرىلەر ئۇنىڭ ئالدىدا ئوقۇپ بېرىلدى. ‏2 موردىكاينىڭ پادىشاھنىڭ ئوردا ئەمەلدارلىرىدىن بولغان بىگتان ۋە تەرەش دېگەن ئىككى دەرۋازىۋەن ئاخاشۋېروش پادىشاھقا قول سېلىشنى قەستلىگەنلىكىنى پاش قىلغانلىقى توغرىسىدا يېزىلغان تەزكىرىگە كەلگەندە، ‏3 پادىشاھ: «بۇ ئىش ئۈچۈن موردىكايغا نېمە ئىنئام-ئىكرام بېرىلدى؟» دەپ سورىدى. پادىشاھنىڭ خىزمىتىدە بولغان غۇلاملار: «ئۇنىڭغا ھېچنېمە تەگمىدى» دەپ جاۋاب بەردى. ‏4 پادىشاھ: «ھازىر ھويلىدا بىرى بارمۇ؟» دەپ سورىدى. دەل شۇ چاغدا ھامان ئۆزى تىكلەپ قويغان دارغا موردىكاينى ئېسىشقا پادىشاھتىن ئىجازېت ئېلىش ئۈچۈن، ئوردىنىڭ سىرتىدىكى ھويلىسىغا كىرگەنىدى. ‏5 بۇنىڭ ئۈچۈن پادىشاھنىڭ غۇلاملىرى ئۇنىڭغا: «ھويلىدا ھامان تۇرىدۇ» دېدى. پادىشاھ: «ئۇنى كىرگۈزۈڭلار» دېدى.

‏6 ھامان كىرسە، پادىشاھ ئۇنىڭدىن: «پادىشاھ ئىززەت-ئىكرام قىلىشنى خالىغان كىشىگە نېمە قىلىش لازىم؟» دەپ سورىدى. ھامان ئۆز كۆڭلىدە: «پادىشاھ ئىززەت-ئىكرام قىلىشنى خالىغان كىشى مەندىن باشقا كىم بولاتتى؟» دەپ ئويلىدى. ‏7 شۇنىڭ ئۈچۈن ھامان پادىشاھقا جاۋاب بېرىپ: «پادىشاھ بىر كىشىگە ئىززەت-ئىكرام قىلىشنى خالىسا، ‏8 پادىشاھ ئۆزى كىيگەن شاھانە لىباس ۋە پادىشاھ ئۆزى مىنگە، بېشىغان شاھانە تاج تاقالغان بىر ئاتنى ئېلىپ كېلىنىپ، ‏9 لىباس ۋە ئات پادىشاھنىڭ ئالىي ئەمەلدارلىرىنىڭ بىرىگە تاپشۇرۇلسۇن. ئۇ لىباسنى پادىشاھ ئىززەت-ئىكرام قىلىشنى خالىغان كىشىگە كىيدۈرۈپ، ئۇنى ئاتقا مىندۈرۈپ، شەھەرنىڭ مەيدانىنى ئايلاندۇرۇپ: ‹پادىشاھ ئىززەت-ئىكرام قىلىشنى خالىغان كىشىگە شۇنداق قىلىنىدۇ› دەپ ئۇنىڭ ئالدىدا ئۈنلۈك ئاۋازدا جاكارلاپ يۈرسۇن» دېدى. ‏10 شۇنى دېسە، پادىشاھ ھامانغا: «سەن ئالدىراپ ئۆز دېگىنىڭ بويىچە لىباس ۋە ئاتنى ئېلىپ بېرىپ، پادىشاھنىڭ دەرۋازىسىدا ئولتۇرغان موردىكايغا شۇنداق قىلىپ، دېگەنلىرىڭدىن ھېچنېمىنى كەم قىلمىغىن» دەپ بۇيرۇدى.

‏11 شۇنىڭ بىلەن ھامان لىباس ۋە ئاتنى ئېلىپ كېلىپ، لىباسنى موردىكايغا كىيدۈرۈپ، ئۇنى ئاتقا مىندۈرۈپ، شەھەرنىڭ مەيدانىنى ئايلاندۇرۇپ: «پادىشاھ ئىكرام قىلىشنى خالىغان كىشىگە مۇنداق قىلىنىدۇ» دەپ ئۇنىڭ ئالدىدا ئۈنلۈك ئاۋازدا جاكارلاپ يۈردى. ‏12 ئاندىن موردىكاي پادىشاھنىڭ دەرۋازىسىغا قايتىپ كەلدى. لېكىن ھامان ھەسرەتكە تولۇپ، بېشىنى يۆگەپ تېزدىن ئۆيىگە قايتىپ كەتتى. ‏13 ئاندىن ھامان خوتۇنى زەرەش ۋە بارلىق دوستلىرىغا ئۆزى دۇچ كەلگەن ۋەقەنى دەپ بەرسە، ئۇنىڭ دانىشمەنلىرى ۋە خوتۇنى زەرەش ئۇنىڭغا: «سەن ئۇنىڭ ئالدىدا پەسلەشكە باشلىغان موردىكاي دېگەن كىشى يەھۇدىي نەسلىدىن بولسا، سەن ئۇنىڭ ئۈستىدىن غالىب كېلەلمەيسەن، بەلكى شەكسىز ئۇنىڭ ئالدىدا يىقىلىپ چۈشىسەن» دېدى. ‏14 ئۇلار تېخى گەپلىشىپ تۇرغىنىدا، پادىشاھنىڭ ئوردا ئەمەلدارلىرى كېلىپ، ھاماننى ئەستەر تەييارلىغان زىياپەتكە بېرىشقا ئالدىراتتى.