بىلدادنىڭ بىرىنچى سۆزى
8
1 ئاندىن شۇئاھلىق بىلداد سۆز باشلاپ مۇنداق دېدى: 2 «قاچانغىچە بۇنداق سۆزلەيسەن؟
قاچانغىچە سۆزلىرىڭ ئاغزىڭدىن قاتتىق شامالدەك چىقىدۇ؟
3 خۇدا ھۆكۈمىنى بۇزامدۇ؟
ھەممىگە قادىر خۇدا ئادالەتنى بۇرمىلامدۇ؟
4 ئەگەر سېنىڭ بالىلىرىڭ ئۇنىڭغا قارشى گۇناھ قىلغان بولسا،
ئۇ ئۇلارنىمۇ ئاسىيلىقىنىڭ ئاقىۋىتىگە دۇچار قىلىدۇ.
5 لېكىن سەن خۇدانى ئەستايىدىل ئىزدەپ،
ھەممىگە قادىر خۇداغا يالۋۇرساڭ،
6 پاك ۋا دۇرۇس بولساڭ،
ئەلۋەتتە ئۇ سەن ئۈچۈن ئويغىنىدۇ،
ھەققانىيلىقىڭنىڭ ئۆيىنى ئەسلىگە كەلتۈرىدۇ.
7 دەسلىپىڭ كىچىك بولغان بولسىمۇ،
ئاخىرىڭ ئىنتايىن ئۇلۇغ بولىدۇ.
8 شۇڭا سەن ئۆتكەن نەسىللەردىن سوراپ باققىن،
ئاتا-بوۋىلىرىڭنىڭ ئىزدىنىپ تاپقانلىرىغا ئېتىبار بەرگىن.
9 چۈنكى بىز تېخى تۈنۈگۈن تۇغۇلغان، شۇڭا ھېچنېمە بىلمەيمىز،
دۇنيادىكى كۈنلىرىمىز پەقەتلا بىر كۆلەڭگە خالاس.
10 ئۇلار ساڭا تەلىم بېرىپ يول كۆرسەتمەمدۇ،
ئۆز كۆڭلىدىكى سۆزلىرىنى ساڭا ئېيتمامدۇ؟
11 سازلىق بولمىسا، يېكەن ئۈنەمدۇ؟
سۇ بولمىسا، قومۇش ئۆسەمدۇ؟
12 مانا، ئۇ تېخى يېشىل تۇرۇپ، ئورۇشقا تەييار بولماستا،
ھەممە ئوت-چۆپتىن بۇرۇن قۇرۇپ كېتىدۇ.
13 خۇدانى ئۇنتۇغانلارنىڭ يوللىرى شۇنداق بولىدۇ،
بۇزۇق ئادەمنىڭ ئۈمىدى يوققا چىقىدۇ.
14 ئۇنىڭ ئىشەنچى ئۈزۈلۈپ كېتىدۇ،
تايانغىنى بىر ئۆمۈچۈك تورى خالاس.
15 ئۆز ئۆيىگە يۆلىنەي دېسە، ئۇ مەزمۇت تۇرمايدۇ.
ئۇنى مەھكەم تۇتۇۋالاي دېسە، ئۇ بەرداشلىق بەرمەيدۇ.
16 ئۇنداق كىشى ئاپتاپتا كۆكلەپ ئۆسكەن،
شاخلىرى باغنىڭ ھەر تەرىپىگە يېيىلغان،
17 يىلتىزلىرى تاش دۆۋىسىنىڭ چۆرىسىدە كىرىشمە بولۇپ،
تاشلارنىڭ ئارىسىدىن ئورۇن ئىزدىگەن كۆچەتتەكتۇر.
18 لېكىن ئۇ ئورنىدىن يۇلۇنسا، ئۇ ئورنى ئۇنىڭدىن تېنىپ:
‹مەن سېنى كۆرۈپ باقمىغان› دەيدۇ.
19 مانا، ئۇنىڭ ئۆمرىنىڭ شاد-خۇراملىقى شۇنچىلىك بولىدۇ.
ئۇنىڭ ئورنىغا تۇپراقتىن باشقىلار ئۈنۈپ چىقىدۇ.
20 مانا، خۇدا كامىل ئادەمنى ھەرگىز تاشلىمايدۇ،
لېكىن يامانلىق قىلغۇچىلارنى قولىدىن تۇتۇپ يۆلىمەيدۇ.
21 ئۇ يەنە سېنىڭ ئاغزىڭنى كۈلكە بىلەن،
لەۋلىرىڭنى شادلىق سادالىرى بىلەن تولدۇرىدۇ.
22 ئەمما ساڭا ئۆچمەنلەرنى ئىزا-نومۇس چىرمىۋالىدۇ،
يامانلارنىڭ چېدىرى يوق بولۇپ كېتىدۇ».