ئەييۇبنىڭ زوفارغا بەرگەن جاۋابى
12
1 ئەييۇب جاۋاب بېرىپ مۇنداق دېدى: 2 «شەكسىز سىلەرلا ئادەم ئىكەنسىلەر،
ۋە ھېكمەتمۇ سىلەر بىلەن بىللە ئۆلگۈدەك!
3 ھالبۇكى سىلەردە بولغاندەك مېنىڭدىمۇ ئەقىل بار.
سىلەردىن كەم يېرىم يوق.
سىلەر دەۋاتقان نەرسىلەرنى كىم بىلمەيدۇ؟
4 مەن خۇداغا دۇئا قىلغاندا دۇئايىم ئىجابەت بولغان ئادەم ئىدىم.
ئەمدى ئۆز دوستلىرى تەرىپىدىن مازاق قىلىندىغان بىر كىشىگە ئايلاندىم.
ھەققانىي ۋە دۇرۇس ئادەم مەسخىرە نىشانى بولدى.
5 خاتىرجەم ئولتۇرغان كىشىلەر بالا-قازاغا سەل قارايدۇ،
ئۇلار «بالا-قازا پۇتلىرى تېيىلىپ كەتكەن ئادەملەرنىڭ تەقدىرى» دەپ ئويلايدۇ.
6 لېكىن بۇلاڭچىلارنىڭ چېدىرلىرى تىنچ-ئامان تۇرىدۇ،
خۇداغا ھاقارەت كەلتۈرگەنلەر خاتىرجەملىك ئىچىدە،
ئۆز ئىلاھىنى ئۆز قولىدا كۆتۈرۈپ يۈرىدۇ.
7 ئەمما ھايۋانلاردىن سورىساڭ، ئۇلار ساڭا تەلىم بېرىدۇ،
ئاسماندىكى قۇشلاردىن سورىساڭ، ئۇلار ساڭا بايان قىلىدۇ.
8 يەردىن سورىساڭ، ئۇ ساڭا ئۆگىتىدۇ،
دېڭىزنىڭ بېلىقلىرىدىن سورىساڭ، ئۇلار ساڭا چۈشەندۈرىدۇ.
9 بۇلارنىڭ ھەممىسىدىن
بۇنى پەرۋەردىگارنىڭ قولى قىلغانلىقىنى كىم بىلمەيدۇ؟
10 بارلىق جانلىقلارنىڭ جېنى،
ھەممە ئادەملەرنىڭ نەپىسى
ئۇنىڭ قولىدىدۇر.
11 ئېغىز تائامنى تېتىغاندەك،
قۇلاقمۇ سۆزلەرنى سىنىمامدۇ؟
12 ھېكمەت ئاقساقاللاردا،
ئەقىل-پاراسەت ياشانغانلاردىدۇر.
13 ھېكمەت ۋە قۇدرەت خۇدادا،
مەسلىھەت ۋە ئەقىل-پاراسەت ھەم ئۇنىڭدىدۇر.
14 ئۇ خاراب قىلغان قايتىدىن قۇرۇلۇپ تىكلەنمەيدۇ،
ئۇ قاماپ قويغان كىشىنى ھېچكىم ئازاد قىلالمايدۇ.
15 مانا، ئۇ سۇلارنى توختاتسا ئۇلار قۇرۇپ كېتىدۇ.
ئۇ ئۇلارنى قويۇپ بەرسە، ئۇلار يەرنى ئاستىن-ئۈستۈن قىلىدۇ.
16 كۈچ-قۇدرەت ۋە ھېكمەت ئۇنىڭدا،
ئازغۇچىمۇ، ئازدۇرغۇچىمۇ ئۇنىڭ قولىدا.
17 ئۇ مەسلىھەتچىلەرنى يالىڭاچلاپ ئېلىپ كېتىدۇ،
ھاكىملارنى ئەخمەق قىلىدۇ.
18 ئۇ پادىشاھلارنىڭ كىشەنلىرىنى بۇزۇپ تاشلايدۇ،
ئۇلارنىڭ بەللىرىنى باغلايدۇ.
19 ئۇ كاھىنلارنى يالىڭاچلاپ ئېلىپ كېتىدۇ،
ھۆكۈمرانلارنى يىقىتىدۇ.
20 ئۇ مۆتىۋەر كىشىلەرنىڭ ئاغزىنى ئېتىدۇ،
ئاقساقاللارنىڭ ئەقلىنى تارتىۋالىدۇ.
21 ئۇ ئېسىلزادىلەرنىڭ ئۈستىگە ھاقارەت ياغدۇرىدۇ،
كۈچلۈكلەرنىڭ بەلۋېغىنى بوشىتىدۇ.
22 ئۇ قاراڭغۇلۇقنىڭ چوڭقۇر سىرلىرىنى ئاشكارىلايدۇ،
ئۆلۈم سايىسىنى ئايدىڭلىققا چىقىرىدۇ.
23 ئۇ ئەللەرنى ئاۋاتلاشتۇرىدۇ ھەم ھالاك قىلىدۇ.
ئۇ ئۇلارنى كېڭەيتىدۇ ھەم تارىتىۋېتىدۇ.
24 ئۇ زېمىننىڭ سەردارلىرىنىڭ ئەقلىنى ئېلىپ كېتىدۇ،
ئۇلارنى يولى يوق چۆللەردە سەرسان قىلىدۇ.
25 ئۇلار نۇرسىز قاراڭغۇلۇقتا تەمتىلەپ يۈرىدۇ،
مەستلەردەك دەلدەڭشىپ ماڭىدۇ.