بىلدادنىڭ ئىككىنچى سۆزى
18
1 شۇئاھلىق بىلداد يەنە سۆز قىلىپ مۇنداق دېدى: 2 «قاچانغىچە مۇنداق گەپلەرنى قىلىشتىن توختىمايسىلەر؟
ياخشى ئويلىشىپ، ئاندىن كېيىن سۆزلىشەيلى.
3 نېمىشقا بىز ھايۋان ھېسابلىنىمىز،
نېمىشقا سېنىڭ نەزىرىڭدە ئەخمەقتۇرمىز؟
4 ئەي غەزىپىڭدە ئۆز جېنىڭنى يىرتقۇچى،
سەن ئۈچۈن يەر-زېمىن تاشلىۋېتىلسۇنمۇ؟
قورام تاش ئۆز جايىدىن يۆتكىلىپ كەتسۇنمۇ؟
5 شەك-شۈبھىسىز يامان ئادەمنىڭ نۇرى ئۆچۈرۈلىدۇ،
ئۇنىڭ ئوتىنىڭ يالقۇنى يورۇماي قالىدۇ.
6 ئۇنىڭ چېدىرىدىكى نۇر قاراڭغۇلىشىدۇ،
ئۇنىڭ ئۈستىدىكى چىرىغى ئۆچۈرۈلىدۇ.
7 ئۇنىڭ مەزمۇت قەدەملىرى قىسقارتىلىدۇ،
ئۆزىنىڭ نەسىھەتلىرى ئۆزىنى يىقىتىدۇ.
8 چۈنكى ئۆز پۇتلىرى ئۇنى تورغا تارتىپ چۈشۈرىدۇ.
ئۇ قاپقانغا دەسسەيدۇ.
9 قىلتاق ئۇنى تاپىنىدىن ئىلىۋالىدۇ،
تۇزاق ئۇنى تۇتۇۋالىدۇ.
10 ئۇنى تۇتۇش ئۈچۈن يەرگە ئارغامچا يوشۇرۇپ قويۇلغان،
ئۇنىڭ يولىغا قارماق سېلىنغان.
11 دەھشەتلىك نەرسىلەر ھەر تەرەپتىن ئۇنى قورقۇتۇپ،
ئۇ قەيەرگە ماڭسۇن، ئۇنى قوغلاپ تۇرىدۇ.
12 ئۇنىڭ كۈچى ئاچلىقتىن تۈگەپ كېتىدۇ،
ئۇ ھالاكەت گىردابىدا تۇرىدۇ.
13 ئۇنىڭ تېرىسى سېسىپ كېتىدۇ،
ئەجەللىك ۋابا ئۇنىڭ ئەزالىرىنى يەپ كېتىدۇ.
14 ئۇ تىنچ-ئامان ئولتۇرغان چېدىرىدىن يۇلۇپ چىقىرىلىپ،
دەھشەتلىك پادىشاھنىڭ ئالدىغا كەلتۈرۈلىدۇ.
15 ياتلار ئۇنىڭ چېدىرىدا ئولتۇرىدۇ،
ئۇنىڭ ماكانىغا گۈڭگۈرت ياغدۇرۇلىدۇ.
16 ئۇنىڭ يىلتىزلىرى تېگىدىن قۇرۇيدۇ،
ئۈستىدىكى شاخلىرى كېسىلىدۇ.
17 يەر يۈزىدە ئۇنى ھېچكىم ئەسلىمەس،
مەيدانلاردا ئۇنىڭ نام-نىشانى قالماس.
18 ئۇ يورۇقلۇقتىن قاراڭغۇلۇققا ھەيدىلىدۇ،
بۇ دۇنيادىن قوغلاپ چىقىرىلىدۇ.
19 ئۆز خەلقىنىڭ ئارىسىدا ئۇنىڭ ئوغلىمۇ، نەۋرىسىمۇ بولماس،
ئۆزى تۇرغان يەردە ئۇنىڭ ھېچكىمى قالماس.
20 شەرقتىكىلەر ئۇنىڭ بېشىغا كەلگەن كۈننى كۆرۈپ ھەيران قالار،
غەربتىكىلەر دەھشەتكە چۈشەر.
21 شەكسىز، يامان كىشىنىڭ ئۆيلىرى شۇنداق بولىدۇ،
خۇدانى تونۇمىغان كىشىنىڭ جايى شۇنداق بولىدۇ».