زوفارنىڭ ئىككىنچى سۆزى
20
1 ئاندىن نائاماتلىق زوفار يەنە سۆز قىلىپ مۇنداق دېدى: 2 «ئىچىم قايناپ، ئويلىرىم مېنى جاۋاب بېرىشكە قىستاۋاتىدۇ.
3 ماڭا دەشنام بېرىپ، مېنى ئەيىبلەيدىغان سۆزلەرنى ئاڭلىدىم،
لېكىن روھىم مېنى دانالىق بىلەن جاۋاب بېرىشكە قىستاۋاتىدۇ.
4 سەن بىلمەمسەنكى،
ئەزەلدىن بېرى، ئىنسان يەر يۈزىدە پەيدا بولغاندىن تارتىپ،
5 يامانلارنىڭ تەنتەنىسى قىسقىدۇر،
بۇزۇقلارنىڭ خۇشاللىقى بىر دەملىكتۇر.
6 ئۇنىڭ تەكەببۇرلۇقى ئاسمانغا يەتسىمۇ،
ئۇنىڭ بېشى بۇلۇتلارغا تاقاشسىمۇ،
7 ئۇ خۇددى ئۆز پوقىدەك ئەبەدكىچە يوقىلىدۇ.
ئۇنى ئىلگىرى كۆرگەنلەر: ‹ئۇ نەدە؟› دەپ سورايدۇ.
8 ئۇ بىر چۈشتەك ئۇچۇپ كېتىپ، قايتا تېپىلمايدۇ.
كېچىدە چۈشتە كۆرگەن كۆرۈنۈشلەردەك غايىب بولىدۇ.
9 ئۇنى كۆرگەن كۆز ئۇنى تەكرار كۆرمەيدۇ،
ئۇنىڭ تۇرغان جايى ئۇنى قايتا تونۇمايدۇ.
10 ئۇنىڭ بالىلىرى قەمبەغەللەرنىڭ ئىلتىپاتىنى ئىزدەيدىغان بولىدۇ.
ئۇ تاپقان پايدىسىنى ئۆز قوللىرى بىلەن قايتۇرۇپ بېرىدۇ.
11 ئۇنىڭ ئۇستىخانلىرى ياشلىقنىڭ كۈچ-قۇۋۋىتىگە تولغان بولسىمۇ،
ئۇنىڭ بىلەن بىللە تۇپراقتا ياتىدۇ.
12 يامانلىق ئۇنىڭ ئاغزىدا تاتلىق بولسىمۇ،
ئۇ ئۇنى تىلىنىڭ ئاستىغا يوشۇرسىمۇ،
13 ئۇ ئۇنى ياندۇرغۇسى كەلمەي، ئۇنى ساقلاپ،
ئاغزىنىڭ ئىچىدە تۇتۇپ تۇرسىمۇ،
14 ئۇنىڭ غىزاسى قورسىقىدا ئۆزگىرىپ،
ئۇنىڭ ئىچىدە يىلاننىڭ زەھىرىگە ئايلىنىدۇ.
15 ئۇ بايلىق-دۆلەتنى يۇتۇۋەتسىمۇ، ئۇنى يەنە قۇسۇۋېتىدۇ.
خۇدا ئۇنى ئۇنىڭ قورسىقىدىن چىقىرىۋېتىدۇ.
16 ئۇنداق كىشى يىلاننىڭ زەھىرىنى شورايدۇ،
يىلاننىڭ نەشتىرى ئۇنى ئۆلتۈرىدۇ.
17 ئۇ ئاۋات دەريا-ئېقىنلارنى كۆرەلمەيدۇ،
بال ۋە قايماق ئاقىدىغان دەريالاردىن ھۇزۇرلىنالمايدۇ.
18 ئۇ ئىشلەپ تاپقىنىنى يۇتالمەي قايتۇرىدۇ،
يىغقان بايلىقىدىن ھۇزۇرلىنالمايدۇ.
19 چۈنكى ئۇ مىسكىنلەرگە زۇلۇم قىلىپ، ئۇلارنى تاشلىۋەتكەن.
ئۇ ئۆزى سالمىغان ئۆيلەرنى مەجبۇرىي تارتىۋالغان.
20 ئۇنىڭ قارنى ھېچ تويمايدۇ،
ئۇ ئەتىۋارلىغان نەرسىلىرىنىڭ ھېچبىرىنى ساقلاپ قالالمايدۇ.
21 ئۇ ھەممە نەرسىنى يۇتۇۋېلىپ ھېچنېمىنى قالدۇرمايدۇ.
شۇڭا ئۇنىڭ باياشاتلىقى ئۇزۇنغا بارمايدۇ.
22 ئۇ توق ۋە باياشات تۇرمۇش ئىچىدە پاراكەندىچىلىككە ئۇچرايدۇ.
ھەر ئېزىلگۈچىنىڭ قولى ئۇنىڭ ئۈستىگە چۈشىدۇ. ■
23 ئۇ قورسىقىنى تويدۇرۇۋاتقاندا،
خۇدا ئۇنىڭ ئۈستىگە غەزەپ ئوتىنى چۈشۈرىدۇ،
ئۆز قەھرىنى ئۇنىڭ ئۈستىگە ياغدۇرىدۇ.
24 ئۇ تۆمۈر قورالدىن قېچىپ قۇتۇلسىمۇ،
يانىڭ مىس ئوقى ئۇنى تېشىپ ئۆتىدۇ.
25 ئۇ ئۆزى ئوقنى بەدىنىدىن سۇغۇرۇپ،
ئۇچى پارقىرايدىغان ئوقنى ئۆز ئۆتىدىن چىقىرىۋالغاندا،
ئۇنى ئۆلۈم دەھشىتى باسىدۇ.
26 زۇلمەت قاراڭغۇلۇق ئۇنىڭ خەزىنىلىرىنى پايلاپ ياتىدۇ.
ئادەم پۈۋلىمىگەن بىر ئوت ئۇنى كۆيدۈرۈپ،
ئۇنىڭ چېدىرىدا قالغان نەرسىلىرىنى يۇتۇۋېتىدۇ.
27 ئاسمان ئۇنىڭ يامانلىقىنى ئاشكارىلايدۇ،
يەر ئۇنىڭغا قارشى قوزغىلىدۇ.
28 ئۇنىڭ مال-دۇنياسى يوقىلىدۇ،
خۇدانىڭ غەزىپى كەلگەن كۈندە كەلكۈن سۈيى ھەممىنى ئېقىتىپ كېتىدۇ.
29 بۇ خۇدا تەرىپىدىن بەلگىلەنگەن يامان ئادەمنىڭ نېسىۋىسىدۇر،
بۇ خۇدا ئۇنىڭغا بېكىتكەن مىراستۇر».