ئەييۇبنىڭ زوفارغا بەرگەن ئىككىنچى جاۋابى
21
1 ئەييۇب جاۋاب بېرىپ مۇنداق دېدى: 2 «مېنىڭ سۆزلىرىمنى دىققەت بىلەن تىڭشاڭلار.
بۇ سىلەرنىڭ ماڭا بېرىدىغان تەسەللىلىرىڭلار بولسۇن.
3 سەۋر-تاقەتلىك بولۇڭلار، مەن سۆزلەي.
مەن سۆز قىلغاندىن كېيىن، ئاندىن زاڭلىق قىلىڭلار.
4 مېنىڭ پەريادىم ئىنسانغىمۇ؟
تاقەتسىزلىكىمنىڭ سەۋەبى يوقمۇ؟
5 سىلەر ماڭا قاراپ چۆچۈڭلار،
قولۇڭلار بىلەن ئاغزىڭلارنى ئېتىڭلار.
6 مەن بۇنى ئويلىغىنىمدا، بىئارام بولىمەن،
دەھشەتتىن ۋۇجۇدۇم تىترەپ كېتىدۇ.
7 نېمىشقا يامانلار ياشاۋېرىدۇ،
ئۇزۇن ئۆمۈر سۈرۈپ كۈچلىنىپ كېتىدۇ؟
8 ئۇلارنىڭ بالىلىرى ئۇلار بىلەن بىللىدۇر،
نەۋرىلىرى ئۇلارنىڭ كۆز ئالدىدا ئۆسىدۇ.
9 ئۇلارنىڭ ئۆيلىرى بىخەتەر، ۋەھىمىدىن ئۇزاق.
خۇدانىڭ تايىقى ئۇلارغا تەگمەيدۇ.
10 ئۇلارنىڭ كالىلىرى جۈپلەشسە، بىكارغا كەتمەس.
ئۇلارنىڭ قالىلىرى ئوڭاي تۇغۇپ، موزاي تاشلىماس.
11 ئۇلار بالىلىرىنى بىر پادىدەك تالاغا قويۇپ بېرىدۇ.
بالىلىرى سەكرەپ ئوينايدۇ.
12 ئۇلار داپ ۋە لىرا چېلىپ، ناخشا ئېيتىدۇ،
نەينىڭ ئاۋازىدىن شادلىنىدۇ. ■
13 ئۇلار كۈنلىرىنى بەختلىك ئۆتكۈزىدۇ،
ئاندىن كۆزنى يۇمۇپ ئاچقۇچە بولغان ئارىلىقتا گۆرگە چۈشىدۇ.
14 ئۇلار خۇداغا: «بىزدىن يىراق تۇرغىن،
چۈنكى سېنىڭ يوللىرىڭنى بىلىشنى خالىمايمىز.
15 ھەممىگە قادىر خۇدا كىمكەن، بىز ئۇنىڭغا ئىبادەت قىلغۇدەك؟
ئەگەر ئۇنىڭغا دۇئا قىلساق، بىزگە نېمە پايدىسى بولىدۇ؟» دەيدۇ.
16 ئەمما، ئۇلارنىڭ بەختى ئۆز قولىدا ئەمەس.
يامانلارنىڭ مەسلىھەتى مەندىن يىراق بولسۇن.
17 يامانلارنىڭ چىرىغى قاچان ئۆچۈرۈلىدۇ؟
ئاپەت قاچان ئۇلارنىڭ ئۈستىگە چۈشىدۇ؟
خۇدا قاچان غەزىپى بىلەن ئۇلارغا كۈلپەت يەتكۈزىدۇ؟
18 ئۇلار قاچان شامالنىڭ ئالدىدىكى ساماندەك،
بوران ئۇچۇرۇپ كېتىدىغان پاخالدەك بولىدۇ؟
19 ئۇنىڭ يامانلىقىنىڭ جازاسىنى خۇدا ئۇنىڭ بالىلىرى ئۈچۈن ساقلار، دەيسىلەر.
خۇدا ئۇنىڭ ئۆزىگە جازا بەرسۇن، ئۇ ئۆزى بۇنى تېتىسۇن!
20 ئۆزىنىڭ ھالاكىتىنى ئۇ ئۆز كۆزلىرى بىلەن كۆرسۇن،
ئۇ ئۆزى ھەممىگە قادىر خۇدانىڭ غەزىپىدىن ئىچسۇن.
21 چۈنكى كىشى يىل-ئايلىرى تۈگەپ، ئۆلۈپ كەتكەندىن كېيىن،
ئۆز ئائىلىسىدىكىلەر بىلەن نېمە كارى بولسۇن؟
22 ئۇلۇغلارنىڭ ئۈستىدىنمۇ ھۆكۈم چىقىرىدىغان خۇداغا
ئەقىل ئۆگەتكۈدەك بىرى بارمۇ؟
23 مانا، بىرى تىنچ-ئامان ياشاپ،
مۇكەممەللىكىگە يەتكەندە راھەت ئۆلىدۇ.
24 ئۇنىڭ بېقىنلىرى ياغ بىلەن تولغان،
ئۇنىڭ سۆڭەكلىرىنىڭ يىلىكى قۇرۇپ كەتمىگەن.
25 ئەمما يەنە بىرى ھېچقانداق ياخشىلىق كۆرمەي،
دەرد-ئەلەمدە ئۆلۈپ كېتىدۇ.
26 ئىككىلىسى ئوخشاش تەرىقىدە تۇپراقتا ياتىدۇ،
قۇرتلار ئۇلارنى قاپلايدۇ.
27 مانا، مەن ئوي-خىياللىرىڭلارنى،
ماڭا قارشى ئويلىغان يامان نىيەتلىرىڭلارنى بىلىمەن.
28 چۈنكى سىلەر: ‹ئېسىلزادىنىڭ ئۆيى قەيەردە قالدى؟
يامانلارنىڭ ئولتۇرغان چېدىرى قەيەردە؟› دەپ سورايسىلەر.
29 سىلەر يولۇچىلاردىن سورىمىدىڭلارمۇ؟
ئۇلارنىڭ بايانلىرىغا قۇلاق سالمىدىڭلارمۇ؟
30 ‹يامان ئادەم بالايىئاپەت كۈنىدە ساقلىنىپ قالىدۇ،
غەزەپ كۈنىدە قۇتقۇزۇلىدۇ› دېگەن گەپتىن خەۋىرىڭلار يوقمۇ؟
31 كىم مۇنداق كىشىنىڭ قىلمىشىنى ئۇنىڭ يۈزىگە سالىدۇ؟
كىم ئۇنىڭ ئىشلىرىچا يارىشا ئۇنىڭغا قايتۇرىدۇ؟
32 ئۇ گۆرگە ئېلىپ بېرىلىپ كۆمۈلىدۇ،
ئۇنىڭ قەبرىسىگە كۆزەتچى قويۇلىدۇ.
33 ۋادىنىڭ چالمىلىرى ئۇنىڭغا تاتلىق تېتىيدۇ.
ھەر ئىنسان ئۇنىڭ ئارقىسىدىن ئەگىشىدۇ،
ئۇنىڭدىن ئاۋۋال كەتكەنلەر بولسا سان-ساناقسىزدۇر.
34 نېمىشقا ماڭا قۇرۇق گەپ بىلەن تەسەللى بېرىسىلەر؟
بەرگەن جاۋابلىرىڭلار ھەممىسى يالغان بولۇپ چىقتى».