ئەييۇبنىڭ ئەلىفازغا بەرگەن ئۈچىنچى جاۋابى
23
1 ئەييۇب جاۋابەن مۇنداق دېدى: 2 «بۈگۈنمۇ پەريادىم ئاچچىقتۇر،
مېنى باسقان قول ئاھلىرىمدىن ئېغىردۇر..
3 كاشكى ئۇنى نەدىن تاپالايدىغىنىمنى بىلسەم،
ئولتۇرغان جايىغا بارالىغان بولسام!
4 شۇندا دەۋايىمنى ئۇنىڭ ئالدىدا بايان قىلاتتىم،
ئاغزىمنى دەلىللەر بىلەن تولدۇراتتىم.
5 ئۇنىڭ ماڭا بېرىدىغان جاۋابىنى بىلەلەيتتىم،
ماڭا نېمە دېمەكچى بولغىنىنى چۈشىنەتتىم.
6 ئۇ ئۇلۇغ قۇدرىتىنى ئىشلىتىپ، مەن بىلەن ئېيتىشامتى؟
ياق، ئۇ چوقۇم ماڭا قۇلاق سالاتتى.
7 ئۇ يەردە دۇرۇس بىر ئادەم ئۇنىڭ بىلەن دەۋالىشالايتتى،
مەن ئەبەدكىچە سوراقچىمدىن قۇتۇلاتتىم. ■
8 ئەمما مەن شەرققە بارسام، ئۇ ئۇ يەردە يوق.
غەربكە ماڭسام، ئۇنى تاپالمايمەن.
9 ئۇ شىمالدا بىر ئىش قىلسا، مەن ئۇنى بايقىيالمايمەن،
ئۇ جەنۇبقا بۇرۇلسا، مەن ھەم ئۇنى كۆرەلمەيمەن.
10 ئەمما ئۇ ئۆزى مېنىڭ ماڭغان يولۇمنى بىلىدۇ.
ئۇ مېنى سىنىسا، ئالتۇندەك ئوتتۇرىغا چىقاتتىم
11 پۇتلىرىم ئۇنىڭ قەدەملىرىگە ئىزچىل ئەگەشتى.
مەن ئۇنىڭ يولىدىن ھېچ چەتنىمەي،
ئۇنىڭ يولىنى چىڭ تۇتتۇم.
12 مەن ئۇنىڭ لەۋلىرىنىڭ بۇيرۇقلىرىدىن چىقمىدىم،
ئاغزىنىڭ سۆزلىرىنى لازىم تائامىمدىن بەكرەك قەدىرلىدىم.
13 لېكىن ئۇ ئۆزگەرمەي چىڭ تۇرىدۇ. كىم ئۇنى توسالايدۇ؟
ئۇ كۆڭلىدە نېمىنى خالىسا شۇنى قىلىدۇ.
14 ئۇ مەن ئۈچۈن بېكىتكەنلىرىنى ئەمەلگە ئاشۇرىدۇ،
ئۇنىڭ يەنە شۇنىڭغا ئوخشاش نۇرغۇن ئىشلىرى باردۇر.
15 شۇ سەۋەبتىن مەن ئۇنىڭ ئالدىدا تىترەپ ئەيمىنىمەن.
بۇنى ئويلىسام، ئۇنىڭدىن قورقۇپ كېتىمەن.
16 چۈنكى خۇدا كۆڭلۈمنى پاراكەندە قىلدى،
ھەممىگە قادىر خۇدا مېنى دەھشەتكە سالدى.
17 چۈنكى مەن قاراڭغۇلۇق ئالدىدا يوقالمىدىم،
يۈزۈمنى قاپلىغان زۇلمەتكە سۈكۈت قىلمىدىم.