ئەييۇبنىڭ بىلدادقا بەرگەن ئۈچىنچى جاۋابى
26
1 ئاندىن ئەييۇب جاۋاب بېرىپ مۇنداق دېدى: 2 «سەن ئاجىز كىشىگە شۇنچە ياردەم بېرىپ،
قولىنىڭ كۈچى يوق ئادەمنى شۇنچە قۇۋۋەتلەپ،
3 نادان كىشىگە شۇنچە نەسىھەت بېرىپ،
كاتتا دانالىق كۆرسەتتىڭ ئەمەسمۇ؟
4 سەن كىمگە بۇ سۆزلەرنى قىلدىڭ؟
سەندىن چىققىنى كىمنىڭ روھى؟
5 ئەرۋاھلار دەھشەتكە چۈشىدۇ،
سۇلاردا ۋە ئۇنىڭ تېگىدە ياشايدىغانلار تىترەپ تەۋرىنىپ كېتىدۇ.
6 ئۇنىڭ ئالدىدا ئۆلۈكلەر دىيارى يالىڭاچتۇر،
ھالاكەت ھاڭى يېپىنچىسىزدۇر.
7 ئۇ شىمالدىكى ئاسمان گۈمبىزىنى بوشلۇقنىڭ ئۈستىگە يايغان،
يەرنى بوشلۇققا ئېسىپ قويغان.
8 ئۇ سۇلارنى قويۇق بۇلۇتلارغا يىغىپ قويسىمۇ،
بۇلۇتلار سۇنىڭ ئېغىرلىقىدىن يىرتىلمايدۇ.
9 ئۇ تەختىنىڭ يۈزىنى ياپىدۇ،
ئۇنىڭ ئۈستىگە بۇلۇتلىرىنى يايىدۇ.
10 ئۇ يورۇقلۇق بىلەن قاراڭغۇلۇق قوشۇلىدىغان جايدا
سۇلارنىڭ ئۈستىگە ئۇپۇق سىزىقى سىزدى.■
11 ئاسماننىڭ تۈۋرۈكلىرى ئۇنىڭ ئەيىبلىشىدىن
چۆچۈپ ئالاقزادە بولۇپ كېتىدۇ.
12 ئۇ قۇدرىتى بىلەن دېڭىزنى تىنچلاندۇرىدۇ،
ئۆز ھېكمىتى بىلەن راھابنى ئېزىۋېتىدۇ. ■
13 ئۇنىڭ روھى بىلەن ئاسمانلار روشەن قىلىنغان،
ئۇنىڭ قولى قاچقان يىلاننى سانجىيدۇ.
14 مانا، بۇ ئۇنىڭ يوللىرىنىڭ پەقەتلا بىر كىچىك قىسمىدۇر.
بىز ئۇ توغرىسىدا پەقەتلا بىر پىچىرلاش ئاڭلىيالىدۇق.
ئۇنىڭ قۇدرىتىنىڭ گۈلدۈرلىشىنى كىممۇ چۈشىنەلىسۇن».