ئەييۇبنىڭ ئۆزىنى ئاقلىشى
31
1 بىر قىزغا ھەرگىز قارىمايمەن دەپ، مەن ئۆز كۆزلىرىم بىلەن ئەھدە تۈزدۈم.
2 ھەممىدىن ئۈستۈن خۇدادىن ئىنسان نېمە نېسىۋىگە ئېرىشىدۇ؟
ئەرشتىئەلادىكى ھەممىگە قادىر خۇدادىن ئىنسان نېمە مىراس ئالىدۇ؟
3 ھالاكەت يامانلار ئۈچۈن ئەمەسمۇ؟
بالا-قازا ئەسكىلىك قىلغۇچىلار ئۈچۈن ئەمەسمۇ؟
4 ئۇ مېنىڭ يوللىرىمنى كۆرمەمدۇ،
ھەربىر قەدىمىمنى سانىمامدۇ؟
5 مەن يالغانچىلىق بىلەن يۈرگەن بولسام،
پۇتۇم ساختىپەزلىككە ئالدىرىغان بولسا،
6 مەن بىر ئادىل تارازىدا تارتىلاي،
شۇندا خۇدا مېنىڭ دۇرۇسلۇقۇم بىلگەي.
7 ئەگەر پۇتۇم يولدىن چىقىپ كەتكەن بولسا،
كۆڭلۈم كۆزلىرىمگە ئەگەشكەن بولسا،
قوللىرىمغا بىر داغ چاپلاشقان بولسا،
8
مېنىڭ تېرىغىنىمنى باشقىسى يېسۇن،
ئېتىزلىقتىكى زىرائەتلىرىم يىلتىزى بىلەن يۇلۇنسۇن.
9 ئەگەر كۆڭلۈم بىر ئايالغا ئالدىنىپ كەتكەن بولسا،
ياكى قوشنامنىڭ ئىشىكىنىڭ ئالدىدا ماراپ يۈرگەن بولسام،
10 مېنىڭ ئايالىم باشقىسىنىڭ تۈگمىنىنى تارتسۇن،
ياتلار ئۇنىڭ بىلەن ياتسۇن.
11 چۈنكى بۇ پەسكەشلىكتۇر،
جازالىنىشقا تېگىشلىك يامان ئىشتۇر.
12 چۈنكى بۇ ھەممىنى كۆيدۈرۈپ ۋەيران قىلىدىغان،
ھەممە ھوسۇلۇمنى يىلتىزىدىن تارتىپ يوقىتىدىغان بىر ئوتتۇر.
13 ئەگەر قۇلۇم ياكى دېدىكىم مەن بىلەن دەۋالاشقىنىدا،
مەن ئۇلارنىڭ ھەق-ھوقۇقىنى كۆزگە ئىلمىغان بولسام،
14 خۇدانىڭ ئالدىدا قانداق قىلىمەن؟
ئۇ مېنى سوراققا تارتقاندا مەن نېمە جاۋاب بېرىمەن؟
15 مېنى قورساقتا ياراتقۇچى ئۇلارنىمۇ ياراتقان ئەمەسمۇ؟
بىزگە قورساقتا شەكىل بەرگەنىۇ ئەمەسمۇ؟
16 مەن مىسكىنلەرنىڭ ئارزۇ قىلغىنىنى ئۇلاردىن ئايىدىممۇ؟
تۇل خوتۇننىڭ كۆزلىرىدىكى ئۈمىدىنى يوققا چىقاردىممۇ؟
17 ياكى نېنىمدىن يېتىملارغا بۆلۈپ بەرمەي،
ئۇنى يالغۇز ئۆزۈم يېدىممۇ؟
18 ياق، ئۇنداق ئەمەس، ئۇلار كىچىكىمدىن بېرى ئۆز ئاتىسىنىڭكىدە تۇرغاندەك
مېنىڭ قېشىمدا ئۆسۈپ تەربىيىلەندى.
مەن ئانامنىڭ قورسىقىدىن چىققان ۋاقىتتىن تارتىپ
تۇل خوتۇننىڭ يۆلەنچۈكى بولۇپ كەلدىم.
19 ئەگەر مەن بىر بىچارىنى كىيىمسىز
ياكى بىر يوقسۇلنى يېپىنچىسىز كۆرگەندە،
20 ئۇنىڭ پۇشتى ماڭا خەيرلىك دۇئا قىلمىغان بولسا،
ۋە ئەگەر ئۇ مېنىڭ قويلىرىمنىڭ يۇڭىدىن ئىسسىنمىغان بولسا،
21 ئەگەر دەرۋازا ئالدىدا ماڭا يۈز-خاتىرە قىلىنىدۇ دەپ،
يېتىمگە قارشى قولۇمنى كۆتۈرگەن بولسام،
22 ئۇنداقتا قولۇم تاغىقىدىن چىقىپ كەتسۇن،
بىلىكىم جەينىكىدىن سۇنۇپ كەتسۇن.
23 لېكىن ئۇنداق ئەمەس،
چۈنكى مەن خۇدادىن كېلىدىغان ئاپەتتىن قورقتۇم.
ئۇنىڭ ئۇلۇغ ھەيۋىتى ئالدىدا ھېچنېمە قىلالمىدىم.
24 ئەگەر مەن ئالتۇنغا ئىشەنچ باغلىغان بولسام،
ياكى ساپ ئالتۇنغا: ‹سەن مېنىڭ تايانچىم› دېگەن بولسام،
25 ئەگەر بايلىقىمنىڭ كۆپلۈكىدىن،
قولۇم تاپقان مال-دۇنيادىن سۆيۈنگەن بولسام،
26 ئەگەر مەن كۈننىڭ پارلىغىنىنى كۆرگەندە،
ياكى ئاينىڭ ئايدىڭلىقتا ماڭغىنىغا قارىغاندا،
27 كۆڭلۈم خۇپىيانە ئازدۇرۇلغان بولسا،
ئۇلارغا باش ئېگىپ، ئاغزىم قولۇمنى سۆيگەن بولسا،
28 بۇمۇ جازالىنىشقا تېگىشلىك يامان ئىش بولاتتى،
چۈنكى بۇ ئەرشىئەلادىكى خۇدانى ئىنكار قىلغىنىم بولاتتى.
29 مېنى يامان كۆرگۈچىنىڭ ھالاكىتىگە مەن خۇشال بولدۇممۇ،
بالا-قازا ئۇنىڭ بېشىغا كەلگەندە كۆڭلۈم يايرىدىمۇ؟
30 ياق، ئۇنداق بولمىغان، مەن لەنەت ئوقۇپ ئۇنىڭ ئۆلۈمىنى تىلىمىدىم،
ئاغزىمنىڭ گۇناھ ئۆتكۈزۈشىگە يول قويمىدىم.
31 چېدىرىمدىكىلەر:
‹كىم ئۇنىڭ بەرگەن گۆشىدىن يەپ تويمىغان بىرىنى تاپالايدۇ؟› دېمىگەنمۇ؟
32 مەن مۇساپىرلارغا ئىشىكلىرىمنى ئاچقاچقا،
ھېچبىر مۇساپىر كوچىدا قالمايتتى.
33 ئادەمئاتىمىزدەك ئۆز ئاسىيلىقىمنى يېپىپ،
يامانلىقىمنى كۆڭلۈمگە يوشۇرۇپ قويدۇممۇ؟
34 خالايىقتىن قورقۇپ،
ئۆز جەمەتىمنىڭ ھاقارىتىدىن دەھشەتكە چۈشۈپ،
جىم بولۇپ، ئىشىكىمدىن چىقالماي قالدىممۇ؟
35 كاشكى مېنى تىڭشايدىغان ئادەم بولسىدى!
مانا، مەن ئۆز سۆزۈمنى دەپ بولدۇم.
ئەمدى ھەممىگە قادىر خۇدا ماڭا جاۋاب بەرسۇن.
دەۋاگارىم ئۈستۈمدىن بىر ئەرز خېتى يازسۇن.
36 شەكسىز، مەن ئۇنى ئۆز مۈرەمدە كۆتۈرەتتىم،
بېشىمغا تاج قىلىپ كىيىۋالاتتىم.
37 مەن ھەممە قەدەملىرىمدىن ئۇنىڭ ئالدىدا ھېساب بېرەتتىم،
بىر ئەمىردەك ئۇنىڭ ھۇزۇرىغا باراتتىم.
38 ئەگەر ئۆز ئېتىزلىقىم ماڭا قارشى پەرياد قىلغان بولسا،
چۆنەكلىرى ئۇنىڭغا قوشۇلۇپ يىغلاشقان بولسا،
39 ئەگەر مەن ھەق تۆلىمەي ئۇنىڭ ھوسۇلىنى يەپ كەتكەن بولسام،
ئۇنىڭدا ئىشلەيدىغان دېھقانلارنىڭ جېنىنى قىينىغان بولسام،
40 ئۇنداقتا بۇغداينىڭ ئورنىدا تىكەن ئۈنسۇن،
ئارپىنىڭ ئورنىدا ئوت-چۆپ ئۆسسۇن».
شۇنىڭ بىلەن ئەييۇب سۆزلىرىنى تاماملىدى.