ئەلىھۇنىڭ بىرىنچى سۆزى
32
1 بۇنىڭ بىلەن ئۇ ئۈچ كىشى ئەييۇبنىڭ ئۆز-ئۆزىنى ھەققانىي دەپ سانىغىنى ئۈچۈن ئۇنىڭغا جاۋاب بېرىشتىن توختاپ قالدى. 2 ئۇ ۋاقىتتا رام جەمەتىدىن بولغان، بۇزلۇق باراخەلنىڭ ئوغلى ئەلىھۇنىڭ ئاچچىقى كېلىپ، ئەييۇبنىڭ خۇدانى ئەمەس، بەلكى ئۆزى-ئۆزىنى ھەققانىي سانىغىنىغا غەزەپلەندى. 3 ئۇ ئەييۇبنىڭ ئۈچ دوستىغىمۇ ئاچچىقلاندى، چۈنكى ئۇلار ئۇنىڭ سۆزلىرىگە جاۋاب تاپالماي تۇرۇپ، يەنىلا ئۇنى ئەيىبلەشتى. 4 ئەلىھۇ بۇلار مەندىن چوڭ دەپ، ئەييۇبقا سۆز قىلماي كۈتۈپ تۇرغانىدى. 5 ئەلىھۇ بۇ ئۈچ ئادەمنىڭ ئاغزىدا ھېچ جاۋاب يوقلۇقىنى كۆرۈپ، غەزەپلەندى. 6 شۇنىڭ بىلەن باراخەلنىڭ ئوغلى ئەلىھۇ سۆز باشلاپ مۇنداق دېدى: «مەن بولسام ياش، ئەمما سىلەر ياشانغانسىلەر.
بۇ سەۋەبتىن مەن تارتىنىپ ئۆز بىلگەنلىرىمنى
سىلەرگە ئېيتقىلى جۈرئەت قىلالمىدىم.
7 مەن: ‹ياشانغانلار سۆزلىسۇن،
يىللار بويى توپلانغان ھېكمەتنى ئۆگەتسۇن› دەپ ئويلىدىم.
8 بىراق ھەربىر ئادەمدە روھ بار.
ھەممىگە قادىر خۇدانىڭ نەپىسى ئۇلارغا ئەقىل-پاراسەت ئاتا قىلىدۇ.
9 كىشى ياشقا چوڭ بولغىنى بىلەن دانا بولماسلىقى مۇمكىن،
قېرى بولغىنى بىلەن ھەق-ناھەقنى ئايرىيالماسلىقى مۇمكىن.
10 شۇنىڭ ئۈچۈن ماڭا قۇلاق سالساڭلار،
مەن ئۆز بىلگەنلىرىمنى ئېيتىپ باقاي.
11 مانا، مەن سىلەر سۆز ئىزدەۋاتقاندا كۈتۈپ تۇردۇم،
سىلەرنىڭ پىكىرلىرىڭلارغا قۇلاق سېلىپ تۇردۇم.
12 مەن سىلەرنى دىققەت بىلەن تىڭشاپ تۇردۇم.
بىراق مانا، ھېچقايسىڭلار ئەييۇبنىڭ ھاتالىقىنى كۆرسىتەلمىدىڭلار،
ھېچبىرىڭلار ئۇنىڭ سۆزىگە جاۋاب بېرەلمىدىڭلار.
13 سىلەر: ‹بىز ھېكمەت تاپتۇق،
پەقەت خۇدا ئۆزى ئۇنىڭ ئۈستىدىن غالىب كېلىدۇ، ئىنسان ئەمەس› دېمەڭلار.
14 ئەمدى ئۇ سۆزلىرىنى ماڭا قارىتىپ ئېيتمىغان،
مەنمۇ ئۇنىڭغا سىلەرنىڭ پىكىرلىرىڭلار بويىچە جاۋاب بەرمەيمەن.
15 مانا، ئۇلار ھەيران قېلىپ، ئارتۇق جاۋاب بېرەلمەي قالدى،
ئېيتقىلى سۆز تاپالماي قالدى.
16 مەن كۈتۈپ تۇردۇم، لېكىن ئۇلار سۆز قىلمىدى.
ئۇلار جىم بولۇپ، قايتا جاۋاب قايتۇرمىدى.
17 ئەمدى مەن ئۆز نۆۋىتىمدە جاۋاب بېرەي،
مەنمۇ بىلگەنلىرىمنى ئېيتىپ باقاي.
18 چۈنكى ئىچىم سۆزلەر بىلەن تولدى،
ئىچىمدىكى روھ مېنى زورلاۋاتىدۇ.
19 مانا، قورسىقىم ئېچىلمىغان شاراب تۇلۇمىدەك،
يېرىلىشقا تەييار يېڭى تۇلۇمدەكتۇر.
20 شۇنىڭ ئۈچۈن ئىچىمنى بوشىتىپ سۆزلەي،
لەۋلىرىمنى ئېچىپ جاۋاب بېرەي.
21 مەن ھېچكىمگە يۈز-خاتىرە قىلمايمەن،
ھېچ كىشىگە خۇشامەت قىلمايمەن.
22 چۈنكى مەن خۇشامەت قىلىشنى بىلمەيمەن،
بولمىسا ياراتقۇچىم مېنى دەرھال ئېلىپ كېتەتتى.