ئەلىھۇنىڭ ئىككىنچى سۆزى
34
1 ئەلىھۇ يەنە سۆز قىلىپ مۇنداق دېدى: 2 «ئەي دانالار، سۆزلىرىمنى ئاڭلاڭلار.
ئەي دانىشمەنلەر، ماڭا قۇلاق سېلىڭلار.
3 چۈنكى تاڭلاي تائامنى تېتىغاندەك،
قۇلاقمۇ سۆزلەرنى سىنايدۇ.
4 بىز ئەمدى ئۆزىمىز ئۈچۈن توغرا بولغىنىنى تاللايلى،
نېمىنىڭ ياخشى ئىكەنلىكىنى بىلەيلى.
5 چۈنكى ئەييۇب: ‹مەن ھەققانىيدۇرمەن،
بىراق خۇدا مېنىڭ ھەققىمنى تارتىۋالدى.
6 ھەقدار بولساممۇ، يالغانچى سانالدىم.
خاتالىقىم بولمىسىمۇ، يارامغا داۋا يوق› دەيدۇ.
7 ئەييۇبقا ئوخشايدىغان كىم بار؟
كىم ئۇنىڭدەك مەسخىرىنى سۇدەك ئىچىدۇ؟
8 ئۇ يامانلىق قىلغۇچىلارنىڭ ھەمراھى بولۇپ،
يامانلار بىلەن بىللە ماڭىدۇ.
9 چۈنكى ئۇ: ‹كىشى خۇدادىن سۆيۈنسىمۇ،
ئۇنىڭ ھېچ پايدىسى بولمايدۇ› دېدى.
10 شۇڭا، ئەي ئەقىللىق كىشىلەر، ماڭا قۇلاق سېلىڭلار.
خۇدا يامانلىق قىلىشتىن ئۇزاقتۇر،
ناتوغرا ئىش ھەممىگە قادىر خۇدادىن يىراقتۇر.
11 چۈنكى ئۇ ھەر ئادەمگە ئۇنىڭ ئەمەللىرىگە يارىشا قايتۇرىدۇ،
ھەركىمگە ئۇنىڭ ئىش-ھەرىكىتىگە قاراپ ئىنئام بېرىدۇ.
12 ھەقىقەتەن خۇدا يامانلىق قىلمايدۇ،
ھەممىگە قادىر خۇدا ئادالەتنى بۇزمايدۇ.
13 كىم ئۇنىڭغا يەر-زېمىننى تاپشۇردى؟
كىم ئۇنى پۈتۈن دۇنيانى باشقۇرۇشقا تەيىنلىدى؟
14 ئەگەر ئۇ كۆڭلىدە ئىنسانغا قارشى چىقىپ،
ئۆزىنىڭ روھى ۋە نەپىسىنى قايتۇرۇۋالسا،
15 بارلىق تىرىك جانلار بىر دەمدىلا ھالاك بولاتتى،
ئىنسانلار يەنە تۇپراققا قايتاتتى. ■
16 ئەمدى سېنىڭ ئەقلىڭ بولسا، بۇنى ئاڭلىغىن،
سۆزلىرىمنىڭ ساداسىغا قۇلاق سالغىن.
17 ئادالەتتىن نەپرەتلەنگۈچى ھۆكۈمرانلىق قىلالامدۇ؟
سەن ھەممىدىن ئادىل بولغۇچىنى ئەيىبلەمسەن؟
18 كىشى بىر پادىشاھقا: ‹ئەي يارىماس›،
ئېسىلزادىلەرگە: ‹ئەي يامانلار› دېيەلەمدۇ؟
19 خۇدا بولسا ئەمىرلەرگە يان باسمايدۇ،
باينى كەمبەغەلدىن ئۈستۈن كۆرمەيدۇ،
چۈنكى ئۇلارنىڭ ھەممىسى ئۆز قوللىرىنىڭ ئىشلىرىدۇر.
20 مانا، كۆز يۇمۇپ ئاچقۇچە ئادەملەر ئۆلۈپ كېتىدۇ،
يېرىم كېچىدە خەلق تەۋرىنىپ ھالاك بولىدۇ.
كۈچلۈكلەرمۇ ئىنسان قولى تەگمەستىن يوق بولۇپ كېتىدۇ.
21 چۈنكى ئۇنىڭ كۆزلىرى ئادەملەرنىڭ يوللىرىدىدۇر،
ئۇلارنىڭ ھەممە قەدەملىرىنى كۆرىدۇ.
22 يامانلىق قىلغۇچىلارغا ئۆزىنى يوشۇرغىلى
نە قاراڭغۇ جاي نە ئۆلۈم سايىسى تېپىلماس.
23 چۈنكى ئىنسانغا ھۆكۈم قىلىش ئۈچۈن،
خۇدانىڭ ئۇزۇنغىچە كۆزىتىشى لازىم ئەمەس.
24 ئۇ كۈچلۈكلەرنى تەكشۈرمەيلا پارچىلاپ،
ئۇلارنىڭ ئورنىغا باشقىلارنى قويىدۇ.
25 چۈنكى ئۇ ئۇلارنىڭ قىلغانلىرىنى بىلىدۇ،
ئۇلارنى كېچىدە دۈم كۆمتۈرۈپ ھالاك قىلىدۇ.
26 ئۇ ئۇلارنى يامانلارنىڭ ئارىسىدا،
ئادەملەرنىڭ كۆز ئالدىدا ئۇرىدۇ.
27 چۈنكى ئۇلار ئۇنىڭغا ئەگىشىشتىن باش تارتتى،
ئۇنىڭ يوللىرىنىڭ ھېچقايسىسىغا ئېتىبار بەرمىدى.
28 ئۇلارنىڭ قىلمىشلىرى سەۋەبىدىن
مىسكىنلەرنىڭ پەريادى ئۇنىڭ ئالدىغا كەلدى،
زۇلۇم تارتقانلارنىڭ نالىسى ئۇنىڭ قۇلىقىغا يەتتى.
29 ئەگەر ئۇ جىم تۇرسا، كىم ئۇنى ئەيىبلىيەلەيدۇ؟
ئۇ يۈزىنى يوشۇرۇۋالسا، كىم ئۇنى كۆرەلەيدۇ؟
ئۇ، مەيلى بىر خەلق بولسۇن ياكى بىر ئادەم بولسۇن،
ھەممىسىنىڭ ئۈستىدە تۇرىدۇ.
30 ئۇ خەلققا تۇزاق قۇرمىسۇن دەپ
مۇناپىقلارنىڭ ھۆكۈمرانلىق قىلىشىغا يول قويمايدۇ.
31 لېكىن بىرسى خۇداغا: ‹مەن تەكەببۇرلۇق قىلدىم،
ئەمدى يەنە يامانلىق قىلمايمەن.
32 مېنىڭ بىلمىگىنىمنى سەن ماڭا ئۆگەتكىن.
مەن يامانلىق قىلغان بولسام، يەنە قىلمايمەن›
دېگەن بولسا ياخشى بولاتتى.
33 ئەمدى سەن ئۇنىڭ بېكىتكىنىنى رەت قىلغىنىڭ ئۈچۈن،
ئۇ سېنىڭ خالىغىنىڭ بويىچە ئىش تۇتامدۇ؟
قارار قىلغۇچى سەن، مەن ئەمەس، ئۇنداقتا ئۆز بىلگىنىڭنى سۆزلە.
34 لېكىن ئەقىللىق كىشىلەر،
سۆزلىرىمنى ئاڭلىغان دانا ئادەملەر ماڭا دەيدۇكى:
35 ‹ئەييۇب ھېچنېمىنى بىلمەي گەپ قىلدى،
ئۇ ئويلىماي سۆزلىدى›.
36 كاشكى ئەييۇب ئاخىرغىچە سىنالسا ئىدى.
چۈنكى ئۇ يامان ئادەملەردەك جاۋاب بەردى.
37 ئۇ ئۆز گۇناھىغا ئىسياننىمۇ قوشۇپ،
ئارىمىزدا چاۋاك چېلىپ،
خۇداغا قارشى نۇرغۇن سۆز قىلدى».