37
1 شۇ سەۋەبتىن يۈرىكىم قاتتىق سوقۇپ، قېپىدىن چىقىپ كېتەي دېدى.
2 ئاڭلا ئۇنىڭ كۈچلۈك ئاۋازىنى،
ئاغزىدىن چىققان گۈلدۈرلەشنى.
3 ئۇ ئاۋازىنى پۈتۈن ئاسمان ئاستىدىكى ھەر يەرگە يەتكۈزۈپ،
چاقماقلىرىنى يەرنىڭ ئەڭ چەتلىرىگىچە ئەۋەتىدۇ.
4 چاقماقتىن كېيىن ئۇنىڭ كۈچلۈك ئاۋازى ئاڭلىنىدۇ،
ئۇ ھەيۋەتلىك ئاۋازى بىلەن گۈلدۈرلەيدۇ.
ئۇنىڭ ئاۋازى ئاڭلانغاندا ئۇ چاقماقلارنى توختىتىپ قويمايدۇ.
5 خۇدا ئاجايىپ ئاۋازى بىلەن گۈلدۈرلەيدۇ،
ئۇ بىزنىڭ ئەقلىمىز يەتمەيدىغان ئۇلۇغ ئىشلارنى قىلىدۇ.
6 مانا، ئۇ قارغا: ‹يەرگە چۈش› دەپ بۇيرۇيدۇ،
شار-شۇر يامغۇرغا ‹يەرگە تۆكۈل› دەپ بۇيرۇق بېرىدۇ.
7 ئۇ ئادەملەر ئۆز ياراتقۇچىسىنىڭ ئىشلىرىنى بىلسۇن دەپ،
ھەممە ئىنساننىڭ قوللىرىنى مۆھۈرلەپ قويىدۇ. ■
8 ئۇ ۋاقىتتا ياۋايى ھايۋانلار ئۆز ئۇۋىلىرىغا كىرىۋالىدۇ،
ئۇلار ئۆز غارىدا يېتىۋالىدۇ.
9 جەنۇب تەرەپتىن بوران چىقىدۇ،
شىمال تەرەپتىن سوغۇق كېلىدۇ.
10 خۇدانىڭ پۈۋلىشى بىلەن مۇز پەيدا بولىدۇ،
بىپايان سۇلار مۇزغا ئايلىنىدۇ.
11 ئۇ قېلىن بۇلۇتقا نەملىكنى يۈكلەيدۇ،
چاقماق چاقىدىغان بۇلۇتلارنى يايىدۇ.
12 ئۇلار ئۇنىڭ ئىرادىسى بىلەن ھەريان چېپىپ،
ئۇنىڭ بۇيرۇقىنى يەر يۈزىدە ئورۇنلايدۇ.
13 مەيلى جازا ئۈچۈن بولسۇن،
مەيلى يەرنىڭ پايدىسى ئۈچۈن بولسۇن،
مەيلى رەھىمدىللىقىنى كۆرسىتىشى ئۈچۈن بولسۇن
ئۇ ئۇلارنى ئەۋەتىدۇ.
14 ئەي ئەييۇب، بۇنىڭغا قۇلاق سېلىپ شۈك تۇرغىن،
خۇدانىڭ ئاجايىپ ئىشلىرىنى ئويلىغىن.
15 خۇدانىڭ ئۇلارنىڭ يۈرۈشىنى قانداق باشقۇرىدىغانلىقىنى،
بۇلۇتلىرىنىڭ چاقماقلىرىنى قانداق چاقتۇرىدىغانلىقىنى بىلەمسەن؟
16 سەن بۇلۇتلارنىڭ ھاۋا بوشلۇقىدا قانداق تۇرىدىغانلىقىنى،
بىلىمى مۇكەممەل بولغان خۇدانىڭ ئاجايىپ ئىشلىرىنى بىلەمسەن؟
17 ئۇ جەنۇب شامىلى بىلەن يەرنى تىنچلاندۇرۇپ،
كىيىملىرىڭنى قانداق ئىسسىتقىنىنى بىلەمسەن؟
18 ئەينەككە ئوخشاش قۇيۇلۇپ مۇستەھكەم قىلىنغان ئاسمان گۈمبىزىنى
سەن ئۇنىڭغا ھەمراھ بولۇپ يايدىڭمۇ؟
19 ئۇنىڭغا نېمە دېيىشىمىز كېرەكلىكىنى بىزگە ئۆگەت.
چۈنكى بىز بۇ قاراڭغۇلۇقتا نېمە دېيىشنى بىلەلمىدۇق.
20 مەن ئۇنىڭغا گەپ قىلماقچى بولسام،
ئۇنىڭغا خەۋەر بېرىش كېرەكمۇ؟
ئۇنداق گەپ قىلغۇچى ھالاكەتكە چۈشمەمدۇ؟
21 ئادەم بۇلۇتنىڭ ئۈستىدىكى پارقىراپ تۇرغان قۇياش نۇرىنى كۆرەلمەيدۇ.
لېكىن شامال چىقىپ، بۇلۇتلارنى ھەيدىۋەتسە،
22 ئالتۇن نۇر شىمالدىن كۆرۈنىدۇ،
خۇدانىڭ ئۇلۇغ ھەيۋىتى نامايان بولىدۇ.
23 ھەممىگە قادىر خۇدانى بىز چۈشىنەلمەيمىز.
ئۇ قۇۋۋەتتە ئۇلۇغ بولۇپ،
ھەققانىيلىقى ۋە تەڭداشسىز ئادالىتىدىن ھەرگىز چەتنىمەس.
24 شۇ سەۋەبتىن ئادەملەر ئۇنىڭدىن قورقىدۇ.
كۆڭلىدە ئۆزىنى دانا ھېسابلىغان ھېچبىرىگە ئۇ ئېتىبار قىلمايدۇ».