پەرۋەردىگارنىڭ ئەييۇبقا بەرگەن بىرىنچى جاۋابى
38
1 بۇ چاغدا پەرۋەردىگار قۇيۇن ئىچىدىن ئەييۇبقا جاۋاب بېرىپ مۇنداق دېدى: 2 «ھېكمەتنى ئەقىلسىز سۆزلەر بىلەن قارايتقان كىم؟
3 ئەمدى بىر ئەر كىشىدەك بېلىڭنى باغلا.
مەن سەندىن سوئال سورايمەن، سەن ماڭا جاۋاب بەر.
4 مەن يەرنىڭ ئۇلىنى قويغاندا سەن قەيەردە ئىدىڭ؟
ئەگەر شۇنچە ئەقىل-پاراسىتىڭ بولسا، بايان قىل.
5 كىم ئۇنىڭ ئۆلچىمىنى بېكىتتى؟ سەن بىلمەمسەن؟
كىم ئۇنىڭ ئۈستىگە ئۆلچەش تانىسىنى تارتىپ قويدى؟
6 يەرنىڭ ئۇللىرى نېمىنىڭ ئۈستىگە توختىتىلغان؟
كىم ئۇنىڭ بۇرجەك تېشىنى قويدى؟
7 ئۇ قويۇلغاندا تاڭ يۇلتۇزلىرى بىرلىكتە ناخشا ياڭراتتى،
‹خۇدانىڭ ئوغۇللىرى›نىڭ ھەممىسى شادلىقتىن چۇقان سالدى. ■
8 كىم دېڭىزنى ئىشىكلەر بىلەن تاقىدى
ئۇ قورساقتىن چىققاندەك ئېتىلىپ چىققاندا؟
9 مەن بۇلۇتنى ئۇنىڭغا كىيىم قىلغاندا،
زۇلمەت قاراڭغۇلۇق بىلەن ئۇنى زاكىلىغاندا،
10 ئۇنىڭ ئۈچۈن چەكلىرىنى بېكىتىپ،
تاقاق ۋە ئىشىكلەر قويغاندا،
11 ‹بۇ يەرگىچە كېلىپ، ئۇنىڭدىن ئالدىغا ئۆتمەيسەن،
كىبىر دولقۇنلىرىڭ بۇ يەردە توختايدۇ› دېگىنىمدە،
سەن قەيەردە ئىدىڭ؟
12 سەن ئۆمرۈڭدە سەھەرگە ئەمىر قىلىپ باقتىڭمۇ؟
سەن سۈزۈلگەن تاڭغا ئۇنىڭ جايىنى كۆرسىتىپ باقتىڭمۇ؟
13 سەن ئۇنىڭغا: ‹سەن يەرنى ئۇچلىرىدىن تۇتۇپ،
يامانلارنى ئۇنىڭدىن ئىرغىتىۋەتكىن› دەپ ئېيتتىڭمۇ؟
14 لاي تامغا بىلەن شەكىللەندۈرۈلگەندەك،
يەرمۇ تاڭ نۇرىدا شەكىللەندۈرۈلۈپ، بىر لىباستەك ئوتتۇرىغا چىقىدۇ.
15 يامانلارنىڭ نۇرى ئېلىۋېلىنىدۇ،
ئېگىز كۆتۈرۈلگەن قول سۇندۇرۇلىدۇ. ■
16 سەن دېڭىزنىڭ بۇلاقلىرىغىچە چۈشتۈڭمۇ،
چوڭقۇر سۇلارنىڭ تېگىدە مېڭىپ باقتىڭمۇ؟
17 ئۆلۈمنىڭ دەرۋازىلىرى ساڭا ئاشكارىلاندىمۇ،
ئۆلۈم سايىسىنىڭ دەرۋازىلىرىنى كۆردۈڭمۇ؟
18 يەر يۈزىنىڭ كەڭلىكىنى بايقىدىڭمۇ؟
ئەگەر بۇنىڭ ھەممىسىنى بىلسەڭ، بايان قىل.
19 نۇرنىڭ ماكانىغا بارىدىغان يول نەدە؟
قاراڭغۇلۇقنىڭ تۇرار جايى قەيەردە؟
20 سەن ئۇلارنى ئۆز ماكانلىرىغا ئېلىپ بارالامسەن؟
ئۆيلىرىگە بارىدىغان يوللىرىنى تاپالامسەن؟
21 سەن ئۇ ۋاقىتتا تۇغۇلغاچقا،
كۈنلىرىڭنىڭ سانى كۆپ بولغاچقا،
سەن ئەلۋەتتە بىلىسەن!
22 سەن قارنىڭ خەزىنىلىرىگە كىرگەنمۇ؟
مۆلدۈرنىڭ ئامبارلىرىنى كۆرگەنمۇ؟
23 مەن بۇلارنى ئازاب-ئوقۇبەتلىق زامان ئۈچۈن ساقلاپ قويدۇم،
ئۇرۇش ۋە جەڭ كۈنى ئۈچۈن تەييارلاپ قويدۇم.
24 نۇر قانداق يوللار بىلەن چېچىلىدۇ؟
شەرق شامىلى قانداق يوللار بىلەن يەر يۈزىگە تارقىتىلىدۇ؟
25 كىم كەلكۈن سۈيى ئۈچۈن بىر ئۆستەڭ چاپىدۇ؟
كىم گۈلدۈرمامىنىڭ چاقمىقى ئۈچۈن بىر يول ئاچىدۇ؟
26 كىم ئادەم ياشىمايدىغان زېمىنغا،
ھېچكىم تۇرمايدىغان چۆل-باياۋانغا يامغۇر ياغدۇرۇپ،
27 چۆللەشكەن قاقاس يەرلەرنى قاندۇرۇپ،
يېڭى ئوت-چۆپ ئۈندۈرىدۇ؟
28 يامغۇرنىڭ ئاتىسى بارمۇ؟
شەبنەم تامچىلىرىنى كىم پەيدا قىلىدۇ؟
29 مۇز كىمنىڭ قورسىقىدىن چىقىدۇ؟
ھاۋانىڭ قىروۋىنى كىم دۇنياغا كەلتۈرىدۇ؟
30 ئۇ چاغدا سۇلار تاشتەك قېتىپ قالىدۇ،
چوڭقۇر سۇلارنىڭ يۈزى توڭلاپ قالىدۇ.
31 سەن يەتتە ئۈكەر يۇلتۇز تۈركۈمىنىڭ زەنجىرىنى باغلىيالامسەن؟
ئورىئون يۇلتۇز تۈركۈمىنىڭ باغلىرىنى بوشىتالامسەن؟
32 سەن يۇلتۇز تۈركۈملىرىنى ئۆز پەسلىدە چىقىرالامسەن؟
چوڭ ئېيىق يۇلتۇز تۈركۈمىنى ئۆز بالىلىرى بىلەن يېتەكلىيەلەمسەن؟
33 سەن ئاسماننىڭ قانۇنىيەتلىرىنى بىلەمسەن؟
ئۇنىڭ سەلتەنىتىنى يەر يۈزىدە ئورنىتالامسەن؟
34 سېنى بېسىپ كەتكۈدەك تاشقىن كەلتۈرىدىغان بۇلۇتلارغا
ئاۋازىڭنى ئاڭلىتالامسەن؟
35 سەن چاقماقلارنى ئەۋەتىپ، ئۇلارغا بۇيرۇق بېرەلەمسەن؟
ئۇلار ساڭا: ‹مانا بىز تەييار› دەپ ئاۋاب بېرەمدۇ؟
36 كۆڭۈلگە كىم ھېكمەت قويغان؟
ئويلىرىمىزغا كىم ئەقىل-پاراسەت بېرگەن؟
37 كىم ئۆز دانالىقى بىلەن بۇلۇتلارنى سانىيالايدۇ؟
كىم ئاسماننىڭ سۇ تۇلۇملىرىنى تۆكۈپ،
38 توپا-چاڭلارنى ئىلەشتۈرۈپ قاتۇرۇپ، چالمىلارنى بىر-بىرىگە يېپىشتۇرىدۇ؟
39 سەن چىشى شىر ئۈچۈن ئوۋ ئوۋلىيالامسەن؟
ياش شىرلارنىڭ قارنىنى تويغۇزالامسەن؟
40 ئۇلار ئۆڭكۈرلىرىدا مۆكۈنۈپ ياتقاندا
ياكى بۆكتۈرمىدە ماراپ ياتقاندا،
سەن ئۇلارنىڭ ئاچلىقىنى قاندۇرالامسەن؟
41 قۇزغۇننىڭ بالىلىرى ئاچلىقتىن خۇداغا پەرياد قىلغاندا
،
قۇزغۇننىڭ رىزقىنى كىم بېرىدۇ؟