39
1 سەن تاغدىكى ياۋا ئۆچكىلەرنىڭ قاچان تۇغىدىغانلىقىنى بىلەمسەن؟ ماراللارنىڭ قوزىلىشىنى سەن كۆزىتەمسەن؟
2 ئۇلارنىڭ بوغاز بولىدىغان ئايلىرىنى ھېسابلىيالامسەن؟
ئۇلارنىڭ تۇغىدىغان ۋاقتىنى بىلەمسەن؟
3 ئۇلار ئېڭىشىپ بالىلىرىنى تۇغۇپ،
تولغىقىدىن قۇتۇلىدۇ.
4 ئۇلارنىڭ بالىلىرى ئوچۇق دالادا ئۆسۈپ كۈچلىنىدۇ.
ئۇلار كەتكەندىن كېيىن تەكرار قايتىپ كەلمەيدۇ.
5 ياۋا ئېشەكنى كىم ئەركىن قويۇۋەتكەن؟
كىم شاش ئېشەكنىڭ باغلىرىنى يەشكەن؟
6 مەن باياۋاننى ئۇنىڭ ئۆيى قىلدىم،
شورلۇقنى ئۇنىڭغا ماكان قىلىپ بەردىم.
7 ئۇ شەھەرنىڭ ۋاراڭ-چۇرۇڭلىرىغا كۈلىدۇ،
ھەيدىگۈچىنىڭ ۋارقىشىنىمۇ ئاڭلىمايدۇ.
8 ئۇنىڭ يايلىقى تاغلارنىڭ ئارىسىدىدۇر،
ئۇ شۇ يەردە ئوت-گىياھلارنى ئىزدەپ يۈرىدۇ.
9 ياۋا بۇقا ساڭا بويسۇنۇشنى خالامدۇ؟ ئۇ سېنىڭ ئوقۇرۇڭدا قونامدۇ؟
10 سەن ياۋا بۇقىنى تانا بىلەن باغلاپ، ساپانغا قاتالامسەن؟
ئۇ ساڭا ئەگىشىپ ۋادىلاردا يەر ئاغدۇرامدۇ؟
11 ئۇنىڭ كۈچى چوڭ بولغىنى ئۈچۈن سەن ئۇنىڭغا تايىنامسەن؟
ياكى سەن ئىشىڭنى ئۇنىڭغا تاپشۇرالامسەن؟
12 ئۇنىڭ ئاشلىقنى ئۆيگە ئېلىپ كېلىدىغانلىقىغا،
ھوسۇلنى يىغىپ، خامانغا توشۇيدىغانلىقىغا ئىشەنەمسەن؟
13 تۆگىقۇش خۇشاللىقتا قاناتلىرىنى قاقىدۇ،
بىراق ئۇنىڭ قاناتلىرى لەيلەكنىڭكى بىلەن سېلىشتۇرغىلى بولمايدۇ.
14 چۈنكى ئۇ تۇخۇملىرىنى يەرگە تاشلاپ قويۇپ،
ئۇلارنى قۇمنىڭ ئىچىدە قىزىتىدۇ،
15 لېكىن: ‹ئۇلار ئاياغ ئاستىدا يانجىلىپ كېتەرمىكىن›،
ياكى ‹دالادىكى ياۋايى ھايۋانلار ئۇلارنى دەسسەپ ئېزىۋېتەرمىكىن›
دەپ ئويلىمايدۇ.
16 ئۇ بالىلىرىغا ئۆزىنىڭ بالىلىرى ئەمەستەك باغرىنى قاتتىق قىلىدۇ،
ئۆز ئۇرۇقىنىڭ يوق بولۇپ كېتىشىنىڭ ئەندىشىسىنى قىلمايدۇ.
17 چۈنكى خۇدا ئۇنى ھېكمەتتىن مەھرۇم قىلغان،
ئۇنىڭغا ئەقىل-پاراسەت ئاتا قىلمىغان.
18 ھالبۇكى ئۇ قاناتلىرىنى يېيىپ سەكرىگەندە،
ئاتقا ھەم ئۇنىڭ مىنگۈچىسىگە كۈلىدۇ.
19 ئاتقا سەن كۈچ بەرگەنمۇ؟
ئۇنىڭ بوينىغا يەلپۈنۈپ تۇرىدىغان يايلىنى سەن كىيگۈزگەنمۇ؟
20 سەن ئۇنى چېكەتكىدەك سەكرىتەلەمسەن؟
ئۇنىڭ ھەيۋەتلىك كىشنەشلىرى ۋەھىمىلىكتۇر.
21 ئۇ ۋادىدا يەرنى تېپىپ، كۈچىدىن خۇش بولۇپ،
قوراللىق قوشۇن بىلەن ئۇچرىشىشقا ئاتلىنىدۇ.
22 ئۇ قورقۇنچنى مەسخىرە قىلىپ، ھېچنېمىدىن قورقمايدۇ.
ئۇ قىلىچتىن قېچىپ ئارقىغا يانمايدۇ.
23 ئۇنىڭ چۆرىسىدە ئوقدان، پارقىرايدىغان خەنجەر
ۋە نەيزە
تاراقشىپ تۇرسىمۇ،
24 ئۇ ھاياجانلىنىپ، ئاچچىقىدا يەرنى تاتلاپ يۇتۇۋېتىدۇ.
بۇرغىنىڭ ئاۋازى ئاڭلانسا، ئۆزىنى تۇتالمايدۇ. ■
25 بۇرغىلار چېلىنسا، ئۇ «ھاي ھاي» دەپ كىشنەيدۇ.
ئۇ يىراقتىن جەڭ پۇرىقىنى پۇراپ،
سەردارلارنىڭ ۋارقىرىشىنى ۋە جەڭ چۇقانلىرىنى ئاڭلايدۇ.
26 سېنىڭ ھېكمىتىڭ بىلەن قارچىغا ئېگىز ئۇچۇپ
قاناتلىرىنى جەنۇبقا قاراپ ئاچامدۇ؟
27 بۈركۈت سېنىڭ بۇيرۇقۇڭ بىلەن يۇقىرىغا چىقىپ
ئۇۋىسىنى ئېگىزلىكتە ياسامدۇ؟
28 ئۇ قورام تاشنى ماكان قىلىدۇ،
قىيا تاش ۋە تىك تاغنىڭ چوققىسىغا ئۇۋىسىنى قۇرىدۇ.
29 شۇ يەردىن ئۇ ئوۋنى پايلاپ تۇرىدۇ،
كۆزلىرى بىلەن يىراقلارنى كۆزىتىدۇ.
30 ئۇنىڭ بالىلىرىمۇ قان شورايدۇ،
ئۆلۈكلەر قايەردە بولسا ئۇ شۇ يەردە بولىدۇ».