ئەييۇبنىڭ پەرۋەردىگارغا جاۋاب بېرىشى
40
1 پەرۋەردىگار ئەييۇبقا يەنە سۆز قىلىپ: 2 «تالاش-تارتىش قىلغۇچى ھەممىگە قادىر خۇدا بىلەن دەۋالاشماقچىمۇ؟
خۇدانى ئەيىبلىگۈچى جاۋاب بەرسۇن» دېدى.
3 ئاندىن ئەييۇب پەرۋەردىگارغا جاۋاب بېرىپ:
4 «مانا، مەن لايىق ئەمەس تۇرۇپ،
ساڭا قانداقمۇ جاۋاب بېرەلەيمەن؟
ئاغزىمنى قولۇم بىلەن ئېتىۋالىمەن.
5 مەن بىر-ئىككى قېتىم سۆزلىدىم، بىراق يەنە سۆزلىمەيمەن،
مەن يەنە سۆز باشلىمايمەن» دېدى.
پەرۋەردىگارنىڭ ئەييۇبقا بەرگەن ئىككىنچى جاۋابى
6 ئاندىن پەرۋەردىگار قۇيۇننىڭ ئىچىدىن ئەييۇبقا جاۋاب بېرىپ مۇنداق دېدى:
7 «سەن ئەركەكتەك بېلىڭنى باغلا.
ئەمدى مەن سەندىن سوئال سورايمەن، سەن ماڭا جاۋاب بەر.
8 سەن مېنىڭ ھۆكۈمۈمنى بىكار قىلماقچىمۇسەن؟
مېنى ئەيىبلەپ، ئۆزۈڭنى ئاقلىماقچىمۇسەن؟
9 سېنىڭ خۇدانىڭ بىلىكىدەك بىلىكىڭ بارمۇ؟
سەن ئۇنىڭدەك ئاۋازىڭنى گۈلدۈرلىتەلەمسەن؟
10 ئۇنداق بولسا، ئەمدى ئۆزۈڭنى ئىززەت ۋە ھەيۋەت بىلەن زىننەتلەندۈرۈپ،
شان-شەرەپ ۋە شەۋكەتكە پۈركىنىپ،
11 غەزىپىڭنىڭ قەھرىنى چېچىپ،
ھەممە تەكەببۇرلارغا نەزىرىڭنى سېلىپ
ئۇلارنى پەسلەشتۈر.
12 ھەربىر تەكەببۇرغا نەزەر سېلىپ، ئۇنى باش ئەگدۈر،
يامانلارنى تۇرغان جايىدا يەر بىلەن يەكسان قىل.
13 ئۇلارنىڭ ھەممىسىنى توپىغا كۆم،
يوشۇرۇن جايدا يۈزلىرىنى يۆگەپ قوي.
14 شۇنداق قىلالىساڭ،
‹ئوڭ قولۇڭ سېنى قۇتقۇزالايدۇ› دەپ تەن ئالىمەن. ■
15 مانا، مەن سېنىڭ بىلەن تەڭ ياراتقان بېگىموتقا قارىغىن.
ئۇ كالىدەك ئوت-چۆپ يەيدۇ. ■
16 قاراپ باق، ئۇنىڭ كۈچى بېلىدىدۇر،
قۇۋۋىتى قورسىقىنىڭ مۇسكۇللىرىدىدۇر.
17 ئۇ قۇيرۇقىنى بىر كېدىر دەرىخىدەك پۇلاڭشىتىدۇ،
پۇتلىرىنىڭ پەيلىرى بىر-بىرىگە چىڭ توقۇلغان،
18 ئۇنىڭ ئۇستىخانلىرى مىس تاياقلاردەكتۇر،
ئۇنىڭ پۇتلىرىنىڭ سۆڭەكلىرى تۆمۈر توقماقلاردەكتۇر.
19 ئۇ خۇدا ياراتقان مەخلۇقاتلارنىڭ بېشىدۇر،
پەقەت ئۇنىڭ ياراتقۇچىسىلا ئۇنىڭغا قىلىچىنى كۆتۈرەلەيدۇ.
20 ياۋايى ھايۋانلار ئويناپ يۈرىدىغان تاغلار
ئۇنىڭ رىزقىنى چىقىرىپ بېرىدۇ.
21 ئۇ سايىلىق دەرەخلەر تېگىدە ياتىدۇ،
قومۇشلۇق ۋە سازلىقنىڭ ئىچىدە يوشۇرۇنىدۇ.
22 سايىلىق دەرەخلەر ئۇنى سايىسى بىلەن ياپىدۇ،
ئېرىق بويىدىكى سۆگەتلەر ئۇنى ئورىۋالىدۇ.
23 ئەگەر دەريا تېشىپ كەتسىمۇ، ئۇ ئۈركۈمايدۇ،
ئىئورداننىڭ سۈيى ئۇنىڭ ئاغزىغىچە ئۆرلىسىمۇ، ئۇ خاتىرجەم تۇرىدۇ.
24 ئىنسان ئۇنىڭ ئالدىغا چىقىپ ئۇنى تۇتالامدۇ؟
ئۇنىڭ بۇرنىنى تېشىپ ھالقا ئۆتكۈزەلەمدۇ؟
25 لېۋىئاتان دېگەن ھايۋاننى قارماق سېلىپ تارتالامسەن؟
ئارغامچا بىلەن ئۇنىڭ تىلىنى بوغالالامسەن؟ ■
26 سەن ئۇنىڭ بۇرنىغا قومۇش ھالقا ئۆتكۈزۈلەمسەن؟
ئۇنىڭ ئېڭىكىنى نەيزە بىلەن تېشەلەمسەن؟
27 ئۇ ساڭا ئارقا-ئارقىدىن يالۋۇرامدۇ؟
ئۇ ساڭا سىلىق گەپ قىلامدۇ؟
28 ئۇ سەن بىلەن ئەھدە تۈزۈپ،
ھەمىشە ساڭا قۇل بولامدۇ؟
29 سەن قۇشقاچ بىلەن ئويناشقاندەك ئۇنىڭ بىلەن ئوينىشامسەن؟
سەن ئۇنى باغلاپ قىزلىرىڭغا بېرەلەمسەن؟
30 بېلىقچىلار ئۇنىڭ ئۈستىدە سودىلىشامدۇ؟
ئۇنى سودىگەرلەرگە بۆلۈشتۈرۈپ بېرەمدۇ؟
31 سەن ئۇنىڭ تېرىسىنى نەيزىلەر بىلەن،
ئۇنىڭ بېشىنى بېلىقچىنىڭ ئارىسى بىلەن سانجىپ تولدۇرالامسەن؟
32 سەن قولۇڭنى ئۇنىڭ ئۈستىگە قويۇپ سوقۇشۇپ باققىن.
ئىككىنچى مۇنداق قىلمايسەن.