41
1 مانا، ئۇنى بويسۇندۇرۇش خىيالى يوققا چىقىدۇ. بىر قاراشتىلا ئۇنىڭدىن ئۈمىد ئۈزۈلىدۇ.
2 ھېچقانداق پالۋان ئۇنى يىقىتىشقا جۈرئەت قىلالمىسا،
ئۇنداقتا مېنىڭ ئالدىمدا كىم تۇرالايدۇ؟
3 مەن قايتۇرغۇدەك كىم ماڭا بىر نەرسە بەرگەن؟
ئاسماننىڭ تېگىدىكى ھەممە نەرسە مېنىڭكىدۇر.
4 ئەمما بۇ ھايۋاننىڭ ئەزالىرى، زور كۈچى
ۋە چىرايلىق تۈزۈلۈشى توغرىسىدا سۆز بولسا، مەن سۈكۈتتە تۇرمايمەن.
5 كىم ئۇنىڭ تونىنى سالدۇرالايدۇ؟
كىم قوش قاتلىق چىشلىرىنىڭ ئارىسىغا كىرگىلى جۈرئەت قىلايدۇ؟
6 ئۇنىڭ قاتار-قاتار چىشلىرى ۋەھىمىلىك بولغاچ،
كىم ئۇنىڭ ئاغزىنىڭ ئىشىكلىرىنى ئاچالايدۇ؟
7 ئۇنىڭ قاسىراقلىرىنىڭ رەتلىك سەپلىرى
مۆھۈر بېسىلغاندەك چىڭ چاپلاشتۇرۇلغان.
8 ئارىسىغا شامال كىرمىگۈدەك تەرىقىدە
ئۇلار بىر-بىرىگە ھىم يېپىشقان.
9 ئۇلار بىر-بىرىگە چاپلاشقاندۇر،
ئاجرىمايدىغان تەرىقىدە بىر-بىرىگە ئىلىشقاندۇر.
10 ئۇ چۈشكۈرسە نۇر چاقنايدۇ،
ئۇنىڭ كۆزلىرى سەھەرنىڭ كىرپىكلىرىدەكتۇر.
11 ئۇنىڭ ئاغزىدىن ئوت يالقۇنلىرى چاچراپ تۇرىدۇ،
ئوت ئۇچقۇنلىرى ئېتىلىپ چىقىدۇ.
12 كۆيۈۋاتقان قومۇش ئۈستىدە قايناۋاتقان قازاندىن ھور چىققاندەك
ئۇنىڭ بۇرۇن تۆشۈكلىرىدىن تۈتۈن چىقىدۇ.
13 ئۇنىڭ تىنىقى كۆمۈرنى چوغ قىلىدۇ،
ئاغزىدىن يالقۇنلار چىقىدۇ.
14 ئۇنىڭ بوينىدا كۈچ ياتىدۇ،
دەھشەت ئۇنىڭ ئالدىدا سەكرەيدۇ.
15 قورسىقىنىڭ تۈرۈلگەن ئەتلىرى بىر-بىرىگە چاپلىشىپ،
ئۇنىڭغا مەھكەم يىپىشىپ، مىدىرلىماي تۇرىدۇ.
16 ئۇنىڭ يۈرىكى تاشتەك قاتتىق بولۇپ،
تۈگمەننىڭ ئەڭ ئاستىدىكى تېشىدەك مۇستەھكەمدۇر.
17 ئۇ ئورنىدىن قوزغالسا، پالۋانلار قورقۇپ كېتىپ،
ۋەھىمىدىن پاراكەندە بولۇپ كېتىدۇ.
18 ئۇنىڭغا تەگكەن قىلىچ، نەيزە، يا ئوقى ياكى خەنجەر
ئۇنى ھېچنېمە قىلمايدۇ.
19 ئۇ تۆمۈرنى سامان،
مىسنى پور ياغاچ سانايدۇ.
20 يانىڭ ئوقى ئۇنى قاچۇرالمايدۇ،
سالغا تاشلىرى ئۇنىڭ ئالدىدا سامانغا ئايلىنىدۇ.
21 ئۇ توقماقلارنى پاخال سانايدۇ،
نەيزىنىڭ پۇلاڭلىشىغا كۈلىدۇ.
22 ئۇنىڭ ئاستى سۇنۇق ساپالنىڭ ئۆتكۈر قىرلىرىدەكتۇر،
ئۇ پاتقاقتىن خامان غالتىكىدەك ئىز قالدۇرۇپ ئۆتىدۇ.
23 ئۇ چوڭقۇر سۇلارنى بىر قازاندەك قاينىتىۋېتىدۇ،
دېڭىزنى قازاندىكى مەلھەمدەك ۋاراقشىتىدۇ.
24 چوڭقۇر سۇلار خۇددى چاچلىرى ئاقارغاندەك،
ئارقىسىدىكى يولىنى كۆپۈكلەشتۈرۈپ ئاقارتىپ تاشلايدۇ.
25 يەر يۈزىدە ئۇنىڭ تەڭدىشى يوقتۇر.
ئۇ قورقماس يارىتىلغان.
26 ئۇ يوغان ھەر نەرسىگە قورقماي قارايدۇ.
ئۇ ھەممە مەغرۇر ھايۋانلارنىڭ پادىشاھىدۇر».