6
1 نەغمىچىلەرنىڭ بېشىغا تاپشۇرۇلۇپ، تارىلىق سازلار بىلەن شىمىنىت دېگەن ئاھاڭدا ئېيتىلسۇن دەپ، داۋۇد يازغان مەدھىيە ناخشىسى. 2 ئەي پەرۋەردىگار، غەزىپىڭدە مېنى ئەيىبلىمىگىن،
قەھرىڭدە مېنى جازالىمىغىن.
3 ئەي پەرۋەردىگار، ماڭا رەھىم قىلغىن،
چۈنكى مەن سولىشىپ كەتتىم.
ئەي پەرۋەردىگار، ماڭا شىپالىق بەرگىن،
چۈنكى ئۇستىخانلىرىم بوشىشىپ تىترەپ كەتتى.
4 مېنىڭ جېنىم چۆچۈپ كەتتى.
ئەي پەرۋەردىگار، قاچانغىچە شۇنداق بولىدۇ؟
5 قايتىپ كەلگىن، ئەي پەرۋەردىگار، جېنىمنى ئازاد قىلغىن،
مېھىر-شەپقىتىڭ بىلەن مېنى قۇتقۇزغىن.
6 چۈنكى ئۆلۈمدىن كېيىن سېنى ياد ئېتىش يوقتۇر.
ئۆلۈكلەر دىيارىدا كىم ساڭا شۈكۈر ئېيتار؟
7 مەن نالە قىلىشتىن ھېرىپ كەتتىم.
ھەر كېچىسى ئورنۇمنى نەم قىلىپ،
كۆرپەمنى ياشلىرىم بىلەن ھۆل قىلىمەن.
8 كۆزلىرىم دەرد-ئەلەمدىن خىرەلىشىپ،
ھەممە دۈشمەنلىرىمنىڭ دەستىدىن ئاجىزلىشىپ كەتتى.
9 ئەي ئەسكىلىك قىلغۇچىلار، مەندىن يىراق تۇرۇڭلار
چۈنكى پەرۋەردىگار يىغا ئاۋازىمنى ئاڭلىدى.
10 پەرۋەردىگار پەريادىمغا قۇلاق سالدى.
دۇئايىمنى پەرۋەردىگار ئىجابەت قىلىدۇ.
11 دۈشمەنلىرىمنىڭ ھەممىسى
شەرمەندە بولۇپ ۋەھىمىگە چۈشىدۇ.
ئۇلار بىردىنلا كەينىگە يېنىپ خىجالەتتە قالىدۇ.