19
1 نەغمىچىلەرنىڭ بېشىغا تاپشۇرۇلسۇن دەپ، داۋۇد يازغان مەدھىيە ناخشىسى. 2 ئاسمانلار خۇدانىڭ شان-شەرىپىنى بايان قىلىدۇ.
ئاسمان گۈمبىزى ئۇنىڭ قوللىرىنىڭ ئىشلىرىنى نامايان قىلىدۇ.
3 ئۇلار كۈن-كۈنلەپ نۇتۇق سۆزلەيدۇ،
كېچە-كېچىلەپ ئىلىم نامايان قىلىدۇ.
4 بۇ بايانلار گەپ ۋە تىل بىلەن بولمىسىمۇ،
ئۇلارنىڭ ئاۋازى ئاڭلانمىسىمۇ،
5 پۈتۈن يەر يۈزىگە يېيىلىپ كېتىدۇ،
سۆزلىرى دۇنيانىڭ چەتلىرىگىچە يېتىدۇ.
خۇدا ئاسماندا قۇياش ئۈچۈن بىر چېدىر تىكتى.
6 ئۇ ھۇجرىسىدىن بىر تويى بولغان يىگىتتەك چىقىدۇ،
مۇسابىقىدە يۈگۈرىدىغان بىر پالۋاندەك شادلىنىدۇ.
7 ئۇ ئاسماننىڭ بىر چېتىدىن چىقىپ
ئايلىنىپ ئۇنىڭ يەنە بىر چېتىگە بارىدۇ.
ئۇنىڭ ھارارىتىدىن ھېچ نەرسە يوشۇرۇنالمايدۇ.
8 پەرۋەردىگارنىڭ تەۋرات قانۇنى مۇكەممەلدۇر،
ئۇ ئادەمنىڭ جېنىنى يېڭىلايدۇ.
پەرۋەردىگارنىڭ يوليورۇقلىرى ئىشەنچلىكتۇر،
ئۇلار نادان كىشىنى دانا قىلىدۇ.
9 پەرۋەردىگارنىڭ تەلىملىرى توغرا،
ئۇلار كۆڭۈلنى شادلاندۇرىدۇ. پەرۋەردىگارنىڭ ئەمرلىرى روشەن،
ئۇلار كۆزلەرنى يورۇتىدۇ.
10 پەرۋەردىگاردىن قورقۇش پاك ئىشتۇر ۋە ئەبەدكىچە قالىدۇ.
پەرۋەردىگارنىڭ ھۆكۈملىرى ھەق ۋە تامامەن ئادىلدۇر.
11 ئۇلار ئالتۇندىن ئەۋزەل، نۇرغۇن ساپ ئالتۇندىنمۇ قىممەتلىك.
ئۇلار ھەسەلدىن، ھەرە كۆنىكىدىن ئاققان بال-ھەسەلدىنمۇ شېرىندۇر.
12 ئۇلاردىن خىزمەتكارىڭ تەلىم ئالىدۇ،
ئۇلارغا ئىتائەت قىلسا چوڭ ئىنئام ئالىدۇ.
13 كىم ئۆزىنىڭ خاتالىقلىرىنى كۆرەلەيدۇ؟
مېنى بىلىپ-بىلمەي قىلغان خاتالىقلىرىمدىن پاكلىغىن.
14 خىزمەتكارىڭنى يېنىكلىك بىلەن قىلغان گۇناھلاردىن ساقلىغىن،
ئۇلارنىڭ ماڭا ھۈكۈمران بولۇشىغا يول قويمىغىن.
شۇنىڭ بىلەن، مەن ئەيىبسىز بولۇپ،
ئېغىر گۇناھتىن قۇتۇلۇپ قالىمەن.
15 ئەي پەرۋەردىگار، ئەي مېنىڭ قورام تېشىم،
ئەي مېنىڭ قۇتۇلدۇرغۇچىم،
ئاغزىمنىڭ سۆزلىرى ۋە كۆڭلۈمنىڭ ئويلىرى
سېنىڭ نەزىرىڭدە مەقبۇل بولسۇن.