27
1 داۋۇد يازغان ناخشا. پەرۋەردىگار مېنىڭ نۇرۇم ۋە نىجاتكارىم،
مەن يەنە كىمدىن قورقاي؟
پەرۋەردىگار ھاياتىمنىڭ قورغىنى،
كىمدىن قورقۇپ تىترەي؟
2 يامانلار گۆشۈمنى يېگىلى كەلگەندە،
دۈشمەنلىرىم ۋە كۈشەندىلىرىم ماڭا ھۇجۇم قىلغاندا،
ئۆزلىرى پۇتلىشىپ دۈم چۈشتى.
3 ئەگەر بىر قوشۇن كېلىپ مېنى قورشىۋالسىمۇ،
كۆڭلۈم ئەنسىرىمەيدۇ.
ئۇلار ماڭا قارشى جەڭگە ئاتلانسىمۇ،
خاتىرجەم تۇرىۋەرىمەن.
4 بىرلا نەرسىنى پەرۋەردىگاردىن تەلەپ قىلدىم، تىلىكىم شۇكى:
ئۆمۈرۋايەت پەرۋەردىگارنىڭ بەيتىدە تۇرۇپ،
پەرۋەردىگارنىڭ گۈزەللىكىنى تاماشا قىلىپ،
ئۇنىڭ ئىبادەتخانىسىدا ئىزدەنسەم.
5 چۈنكى بېشىمغا ئاپەت كەلگەن كۈندە
ئۇ مېنى ئۆز سايىۋىنىگە يوشۇرۇۋالىدۇ.
ئۇ مېنى ئۆز چېدىرىنىڭ پاناھىدا ساقلايدۇ،
مېنى ئېگىز كۆتۈرۈپ قورام تاش ئۈستىگە تۇرغۇزىدۇ.
6 شۇڭا چۆرەمدىكى دۈشمەنلىرىمنىڭ ئالدىدا بېشىم كۆتۈرۈلىدۇ.
پەرۋەردىگارنىڭ چېدىرىدا خۇشاللىقتىن تەنتەنە قىلىپ
قۇربانلىقلارنى سۇنىمەن.
مەن پەرۋەردىگارنى كۈيلەيمەن،
ئۇنىڭ ئۈچۈن مەدھىيە ناخشىلىرىنى ياڭرىتىمەن.
7 ئەي پەرۋەردىگار، پەرياد قىلسام، قۇلاق سال ماڭا،
شەپقىتىڭنى كۆرسىتىپ جاۋاب بەر ماڭا.
8 كۆڭلۈمدە سەن سۆزلەپ: «دىدارىمنى ئىزدەڭلار» دەيسەن.
ئەي پەرۋەردىگار، مەن سېنىڭ دىدارىڭنى ئىزدەيمەن.
9 مەندىن يۈزۈڭنى يوشۇرمىغىن،
غەزىپىڭدە خىزمەتكارىڭنى قوغلىۋەتمىگىن.
ئەي مېنىڭ نىجاتكارىم بولغان خۇدا،
سەن ماڭا مەدەتكار بولۇپ كەلدىڭ،
مەندىن ئايرىلمىغىن ۋە مېنى تاشلاپ كەتمىگىن.
10 ئاتا-ئانام مېنى تاشلىسىمۇ،
پەرۋەردىگار مېنى قۇچىقىغا ئالىدۇ.
11 ئەي پەرۋەردىگار، يولۇڭنى ماڭا ئۆگەتكىن،
مېنى راۋان يولغا باشلىغىن.
چۈنكى دۈشمەنلىرىم مېنى پايلاپ تۇرىدۇ.
12 مېنى دۈشمەنلىرىمنىڭ ئىختىيارىغا تاپشۇرۇپ بەرمىگىن.
چۈنكى يالغان گۇۋاھچىلار ماڭا قارشى قوزغالدى،
ئۇلار نەپەسلىرىدىن زوراۋانلىق ياغدۇرىدۇ.
13 تىرىكلەرنىڭ زېمىنىدا پەرۋەردىگارنىڭ مېھرىبانلىقىنى كۆرىدىغىنىمغا
ئىشەنمىگەن بولسام ئەگەر!
14 پەرۋەردىگارنى سەۋرچانلىق بىلەن كۈتكىن،
مەردانە بولغىن، يۈرىكىڭ جەسۇر بولسۇن،
ئەلۋەتتە پەرۋەردىگارنى سەۋرچانلىق بىلەن كۈتكىن.