29
1 داۋۇد يازغان مەدھىيە ناخشىسى. پەرۋەردىگارنى مەدھىيىلەڭلار، ئەي خۇدانىڭ ئوغۇللىرى،
پەرۋەردىگارنىڭ شان-شەرىپى ۋە قۇدرىتىنى مەدھىيىلەڭلار. ■
2 پەرۋەردىگارغا ئۆز نامىغا لايىق شان-شەرەپ كەلتۈرۈڭلار،
مۇقەددەس لىباس كىيىپ پەرۋەردىگارغا سەجدە قىلىڭلار.
3 پەرۋەردىگارنىڭ ئاۋازى سۇلارنىڭ ئۈستىدە ئاڭلىنىدۇ،
شانۇ-شەۋكەتلىك خۇدا گۈلدۈرماما گۈلدۈرلىتىدۇ،
پەرۋەردىگار ئۇلۇغ سۇلارنىڭ ئۈستىدىدۇر.
4 پەرۋەردىگارنىڭ ئاۋازى قۇدرەتلىكتۇر،
پەرۋەردىگارنىڭ ئاۋازى شەۋكەتلىكتۇر.
5 پەرۋەردىگارنىڭ ئاۋازى كېدىر دەرىخىنى سۇندۇرۇۋېتىدۇ،
پەرۋەردىگار لىۋاننىڭ كېدىر دەرەخلىرىنى پارە-پارە قىلىۋېتىدۇ.
6 ئۇ ئۇلارنى موزايدەك سەكرىتىدۇ،
لىۋان بىلەن سىريون تاغلىرىنى ياۋا كالىنىڭ بالىسىدەك ئويناقلىتىدۇ.
7 پەرۋەردىگارنىڭ ئاۋازى ئوتنىڭ يالقۇنلىرىنى يېرىۋېتىدۇ.
8 پەرۋەردىگارنىڭ ئاۋازى چۆل-باياۋاننى تەۋرىتىدۇ،
پەرۋەردىگار قادەش چۆلىنى تىترىتىدۇ.
9 پەرۋەردىگارنىڭ ئاۋازى ماراللارنىڭ ئوغلاقلىرىنى چۈشۈرۈۋېتىدۇ
ۋە ئورمانلارنى يالىڭاچ قىلىۋېتىدۇ.
ئۇنىڭ ئىبادەتخانىسىدىكى ھەممىسى ئۇنىڭ شان-شەرىپىنى بايان قىلىدۇ.
10 پەرۋەردىگار توپان ئۈستىگە تەخت قۇردى،
پەرۋەردىگار ئەبەدكىچە پادىشاھ بولۇپ ئولتۇرىدۇ.
11 پەرۋەردىگار ئۆز خەلقىگە كۈچ بېرىدۇ،
پەرۋەردىگار ئۆز خەلقىگە تىنچ-ئامانلىق ئاتا قىلىدۇ.