31
1 نەغمىچىلەرنىڭ بېشىغا تاپشۇرۇلسۇن دەپ، داۋۇد يازغان مەدھىيە ناخشىسى. 2 ئەي پەرۋەردىگار، مەن ساڭا تايىنىمەن.
مېنى ھەرگىز شەرمەندە قىلمىغىن.
ئادالىتىڭ بىلەن مېنى قۇتقۇزغىن.
3 قۇلاق سال ماڭا، تېز قۇتقۇز مېنى.
مۇستەھكەم بىر قورام تاش بول ماڭا،
قوغدايدىغان قورغان بول ماڭا.
4 چۈنكى سەن مېنىڭ قورام تېشىم ۋە قورغىنىمدۇرسەن.
ئۆز نامىڭ ئۈچۈن رەھبىرىم بولۇپ، يېتەكلىگىن مېنى.
5 ئۇلارنىڭ ماڭا قۇرغان قاپقان تۇزاقلىرىدىن مېنى تارتىپ چىقارغىن،
چۈنكى سەن مېنىڭ باشپاناھىمسەن.
6 مەن روھىمنى سېنىڭ قولۇڭغا تاپشۇرىمەن.
ئەي پەرۋەردىگار، ھەق خۇدا، سەن مېنى قۇتۇلدۇرىسەن.
7 مەن ئەرزىمەس بۇتلارغا چوقۇنىدىغانلارنى يامان كۆرۈپ،
پەرۋەردىگارغىلا تايىنىمەن.
8 مېھىر-شەپقىتىڭدىن خۇشال بولۇپ شادلىنىمەن،
چۈنكى سەن مېنىڭ تارتقان كۈلپەتلىرىمنى كۆرۈپ،
جېنىمنىڭ چەككەن ئازابلىرىنى بىلىسەن.
9 سەن مېنى دۈشمەننىڭ قولىغا تاشلاپ بەرمىدىڭ،
پۇتلىرىمنى كەڭ يەرگە تۇرغۇزدۇڭ.
10 ئەي پەرۋەردىگار، ماڭا رەھىم قىلغىن،
چۈنكى مەن ئازاب-ئوقۇبەتتە قالدىم.
مۇسىبەتتىن كۆزۈم ئاجىزلاشتى،
ۋۇجۇدۇم، جېنىم زەئىپلەشتى.
11 چۈنكى ئۆمرۈم غەم-قايغۇدا تۈگىمەكتە،
يىللىرىم ھەسرەت بىلەن ئۆتمەكتە.
گۇناھلىرىم تۈپەيلىدىن ماغدۇردىن كەتتىم،
سۆڭەكلىرىم قۇرۇپ كەتتى.
12 مەن بارلىق دۈشمەنلىرىم سەۋەبىدىن نومۇسقا قالدىم،
بولۇپمۇ قوشنىلىرىم ئالدىدا.
تونۇشلىرىم ئۈچۈن بىر ۋەھىمىگە ئايلاندىم.
مېنى كوچىدا كۆرگەنلەر مەندىن قاچىدۇ.
13 مەن ئۆلۈپ كەتكەن كىشىدەك ئەستىن چىقىرىلىپ كەتتىم،
چېقىق چىنىغا ئوخشاپ قالدىم.
14 چۈنكى نۇرغۇنلاردىن تۆھمەت ئاڭلاۋاتىمەن،
ھەر تەرەپنى ۋەھىمە قاپلىدى.
ئۇلار ماڭا قارشى مەسلىھەت قىلىشىپ،
جېنىمنى ئېلىشنى قەستلىۋاتىدۇ.
15 ئەمما، ئەي پەرۋەردىگار، مەن ساڭا تايىنىپ:
«سەن مېنىڭ خۇدايىم» دەيمەن.
16 مېنىڭ ۋاقتىم سېنىڭ قولۇڭدىدۇر.
قۇتقۇزغىن مېنى دۈشمەنلىرىمنىڭ
ۋە مېنى ئەزگۈچىلەرنىڭ قولىدىن.
17 يۈزۈڭنىڭ نۇرى بىلەن خىزمەتكارىڭنى نۇرلاندۇرغىن،
مېھىر-شەپقىتىڭدە مېنى قۇتقۇزغىن.
18 ئەي پەرۋەردىگار، مېنى شەرمەندە قىلمىغىن،
چۈنكى مەن ساڭا يالۋۇرۇپ ئىلتىجا قىلدىم.
يامانلار شەرمەندە بولسۇن،
ئۆلۈكلەر دىيارىدا زۇۋانى تۇتۇلسۇن.
19 ھەققانىيلارغا قارشى تەكەببۇرلۇق قىلىپ،
ئۇلارنى كۆزگە ئىلماي، يالغان سۆزلىگەن لەۋلەر يۇمۇلسۇن.
20 سېنىڭ ئادەم بالىلىرى ئالدىدا سەندىن قورقىدىغانلارغا ساقلاپ قويغان،
ساڭا تايانغانلارغا تەييارلاپ قويغان
نېمەتلىرىڭ نەقەدەر مولدۇر!
21 سەن ئۇلارنى ئىنساننىڭ سۇيىقەستلىرىدىن قوغداپ،
ئۆز ھۇزۇرۇڭدا پاناھىڭغا ئالىسەن.
سەن ئۇلارنى تىللارنىڭ چېقىشىدىن ساقلاپ،
سايىۋىنىڭگە يوشۇرۇپ قويىسەن.
22 پەرۋەردىگارغا ھەمدۇسانالار بولسۇن،
چۈنكى ئۇ قورشاۋدا قالغان شەھەردە
ماڭا ئاجايىپ مېھىر-شەپقىتىنى كۆرسەتتى.
23 مەن بولسام، ھودۇققىنىمدىن:
«كۆزلىرىڭنىڭ ئالدىدىن كېسىپ تاشلاندىم» دېگەنتىم.
لېكىن مەن نالە قىلغىنىمدا،
سەن پەريادىمغا قۇلاق سالدىڭ.
24 ئەي پەرۋەردىگارنىڭ ھەممە تەقۋادارلىرى، ئۇنى سۆيۈڭلار.
پەرۋەردىگار ۋاپادارلارنى قوغدايدۇ،
لېكىن ھاكاۋۇرلارغا يەتكۈدەك جازا بېرىدۇ.
25 ئەي پەرۋەردىگارغا ئۈمىد باغلىغانلار،
ھەممىڭلار غەيرەتلىك بولۇڭلار،
يۈرەكلىرىڭلار جەسۇر بولسۇن!