33
1 ئەي ھەققانىيلار، شادلىق بىلەن پەرۋەردىگارنى كۈيلەڭلار، ئۇنى مەدھىيىلەش دۇرۇسلارغا يارىشار.
2 لىرا چېلىپ پەرۋەردىگارغا شۈكۈر ئېيتىڭلار،
ئون تارلىق چىلتار چېلىپ،
مەدھىيە ناخشىلىرىنى ياڭرىتىڭلار. ■
3 ئۇنىڭ ئۈچۈن يېڭى ناخشا ئېيتىڭلار،
ماھىرلىق بىلەن ساز چېلىپ، ئۈنلۈك ئاۋازدا ناخشا ئېيتىڭلار.
4 پەرۋەردىگارنىڭ سۆزى ھەقىقەتتۇر،
ئۇ ھەممە ئىشلىرىنى ساداقەت بىلەن قىلار.
5 ئۇ ھەققانىيلىق ۋە ئادالەتنى سۆيەر.
يەر-زېمىن پەرۋەردىگارنىڭ مېھىر-شەپقىتى بىلەن تولغان.
6 ئاسمانلار پەرۋەردىگارنىڭ سۆزى بىلەن يارىتىلدى،
ھەممە يۇلتۇزلار ئۇنىڭ ئېغىزىدىكى نەپەس بىلەن يارىتىلدى.
7 ئۇ دېڭىزنىڭ سۇلىرىنى يىغىپ دۆۋىلەيدۇ،
چوڭقۇر سۇلارنى ئامبارلاردا ساقلاپ قويىدۇ.
8 پۈتۈن دۇنيا پەرۋەردىگاردىن قورقسۇن،
يەر يۈزىدىكى ھەممە ئادەملەر ئۇنىڭدىن ھېيىقىپ ئەيمەنسۇن.
9 ئۇ سۆزىدە «بولسۇن» دېسە، دېگىنى بولدى،
ئۇ بۇيرۇسا، بۇيرۇغىنى پەيدا بولدى.
10 پەرۋەردىگار ئەللەرنىڭ نىيەتلىرىنى بۇزۇۋېتەر،
خەلقلەرنىڭ خىياللىرىنى بەربات قىلار.
11 پەرۋەردىگارنىڭ چارارلىرى ئەبەدكىچە تۇرار،
كۆڭلىنىڭ مەقسەتلىرى نەسىلدىن نەسىلگە داۋام قىلار.
12 پەرۋەردىگارنى خۇدايمىز دەپ بىلگەن خەلق بەختلىكتۇر!
ئۇ ئۆزىگە مىراس قىلىپ تاللىغان خەلق نەقەدەر بەختلىكتۇر!
13 پەرۋەردىگار ئەرشتىن نەزەر سېلىپ،
ئادەم بالىلىرىنىڭ ھەممىسىنى كۆزىتىپ تۇرار.
14 ئۇ ئۆز دەرگاھىدا تۇرۇپ، يەر يۈزىدىكى ھەممە ئىنسانلارغا نەزەر سالار.
15 ئۇ ئىنسانلارنىڭ كۆڭۈللىرىنى ياراتقاچقا،
ئۇلارنىڭ ھەممە ئىشلىرىنى بىلىپ تۇرار.
16 قوشۇنلىرىنىڭ كۆپلۈكى بىلەن پادىشاھلار قۇتۇلماس،
پالۋان قالتىس كۈچى بىلەن ئۆزىنى قۇتقۇزالماس.
17 قۇتۇلۇش ئۈچۈن ئاتقا تايىنىش بىكاردۇر،
ئۇنىڭ قالتىس كۈچىمۇ قۇتقۇزالماس.
18 مانا، پەرۋەردىگارنىڭ كۆزى، ئۇنىڭدىن قورقۇپ،
مېھىر-شەپقىتىگە ئۈمىد باغلىغانلاردىن ئۈزۈلمەس.
19 ئۇلارنىڭ جېنىنى ئۆلۈمدىن قۇتقۇزۇش ئۈچۈن
ۋە قەھەتچىلىكتە ئۇلارنىڭ ھايات قېلىشى ئۈچۈن.
20 روھىمىز پەرۋەردىگارغا ئىنتىزاردۇر،
ئۇ بىزنىڭ ياردەمچىمىز ۋە قالقىنىمىزدۇر.
21 ئۇنىڭ بىلەن شادلىنار قەلبىمىز،
چۈنكى ئۇنىڭ مۇقەددەس نامىغا تايىنىمىز.
22 ئەي پەرۋەردىگار، بىز ساڭا ئۈمىد باغلىغاچ،
سېنىڭ مېھىر-شەپقىتىڭ بىزگە يار بولغاي!