34
1 داۋۇدنىڭ ئابىمەلەك ئالدىدا ئۆزىنى ساراڭ كۆرسىتىپ، ئۇنىڭ ئالدىدىن قوغلانغىنىدا يازغان ناخشىسى. 2 مەن ھەر دائىم پەرۋەردىگارغا ھەمدۇسانا ئېيتىمەن،
ئۇنىڭغا بولغان مەدھىيەم ئاغزىمدىن كەتمەيدۇ.
3 جېنىم پەرۋەردىگاردىن پەخىرلىنىدۇ.
كەمتەرلەر بۇنى ئاڭلاپ خۇشال بولىدۇ.
4 ماڭا قوشۇلۇپ پەرۋەردىگارنى ئۇلۇغلاڭلار،
بىرلىكتە ئۇنىڭ نامىنى مەدھىيىلەيلى.
5 مەن پەرۋەردىگارنى ئىزدىدىم،
ئۇ ماڭا جاۋاب بەردى،
ھەممە قورقۇنچلىرىمدىن مېنى ئازاد قىلدى.
6 ئۇنىڭغا قارىغانلار نۇرلىنار.
ئۇلارنىڭ يۈزلىرى ھەرگىز ئۇياتتا قالماس.
7 بۇ بىچارە نالە قىلدى،
پەرۋەردىگار ئۇنىڭغا قۇلاق سېلىپ،
ئۇنى ھەممە قىيىنچىلىقلىرىدىن قۇتقۇزدى.
8 پەرۋەردىگارنىڭ پەرىشتىسى
ئۇنىڭدىن قورقىدىغانلارنىڭ ئەتراپىغا
بارگاھ قۇرۇپ ئۇلارنى قۇتقۇزىدۇ. ■
9 پەرۋەردىگارنىڭ شەپقىتىنىڭ تەمىنى تېتىپ بېقىڭلار.
ئۇنىڭغا تايانغانلار نەقەدەر بەختلىكتۇر!
10 ئەي ئۇنىڭ مۇقەددەسلىرى، پەرۋەردىگاردىن قورقۇڭلار،
چۈنكى ئۇنىڭ تەقۋادارلىرى ھېچ نەرسىگە موھتاج بولماس.
11 ئارسلانلار موھتاج بولۇپ ئاچ قالار،
ئەمما پەرۋەردىگارنى ئىزدىگۈچىلەرگە ياخشىلىق ھېچ كەم بولماس.
12 كېلىڭلار، ئەي بالىلار، ماڭا قۇلاق سېلىڭلار.
مەن پەرۋەردىگاردىن قورقۇشنى سىلەرگە ئۆگىتەي.
13 ئەگەر سەن ھاياتنى قەدىرلەپ،
ئۇزۇن ئۆمۈر كۆرۈپ بەختلىك بولاي دېگەن ئادەم بولساڭ،
14 تىلىڭنى يامان گەپتىن يىغقىن،
لەۋلىرىڭنى ھىيلىدىن ساقلىغىن.
15 يامانلىقنى تاشلاپ، ياخشىلىق قىلغىن.
تىنچ-ئامانلىقنى ئارزۇ قىلىپ، ئۇنى ئىزدىگىن.
16 پەرۋەردىگار ھەققانىيلارغا نەزەر سالار،
ئۇلارنىڭ نالە-پەريادىغا قۇلاق سالار.
17 لېكىن پەرۋەردىگار يامانلاردىن يۈز ئۆرەر،
ئۇ ئۇلارنىڭ ئىزىنى يەر يۈزىدىن يوقىتار.
18 ھەققانىيلار نالە قىلسا، پەرۋەردىگار ئاڭلايدۇ،
ئۇ ئۇلارنى ھەممە قىيىنچىلىقلىرىدىن قۇتقۇزىدۇ.
19 پەرۋەردىگار كۆڭلى سۇنۇقلارغا يېقىندۇر،
روھى ئېزىلگەنلەرنى قۇتقۇزىدۇ. ■
20 ھەققانىيلارنىڭ قىيىنچىلىقلىرى كۆپ بولسىمۇ،
پەرۋەردىگار ئۇلارنى ھەممىسىدىن قۇتقۇزىدۇ.
21 ئۇ ئۇنىڭ ھەممە سۆڭەكلىرىنى ساقلايدۇ،
ئۇلارنىڭ ھېچبىرى سۇندۇرۇلمايدۇ.
22 يامانلارنىڭ قىلمىشلىرى ئۆزلىرىنى ئۆلتۈرىدۇ،
ھەققانىيلارغا ئۆچلەر جازالىنىدۇ.
23 پەرۋەردىگار ئۆز خىزمەتكارلىرىنىڭ جېنىنى قۇتۇلدۇرىدۇ.
ئۇنىڭغا تايانغانلارنىڭ بىرىمۇ جازاغا تارتىلمايدۇ.